جالپى, «كەلەشەك مەكتەپتەرىن» ەلىمىزدەگى ورتا ءبىلىم سالاسىنىڭ زەرتحاناسى, تاجىريبە جاساۋ الاڭى دەۋگە بولادى. ويتكەنى ءبىلىم جۇيەسىنە ەنگىزىلەتىن وزگەرىستەر مەن جاڭالىقتاردىڭ بارلىعى الدىمەن «كەلەشەك مەكتەپتەرىندە» اپروباتسيادان وتكىزىلەدى. نەگىزىنەن «كەلەشەك مەكتەپتەرىنىڭ» كادىمگى مەكتەپتەردەن اسا ءبىر ايىرماشىلىعى جوق, باستى ەرەكشەلىگى – ماتەريالدىق بازاسى مەن جابدىقتالۋىندا. كادىمگى مەكتەپتەرگە قاراعاندا «كەلەشەك مەكتەپتەرىنە» 30 پايىزعا كەڭ اۋماق قاراستىرىلعان, جابدىقتالۋى ءتورت ەسە جوعارى. مىسالى, ارنايى جابدىقتالعان ءپان كابينەتتەرى, كىتاپحانا, دەمالىس ايماقتارى, بي زالى, باستاۋىش سىنىپتارعا بولەك, جوعارى سىنىپتارعا بولەك سپورت زالدارى بار. دەسە دە وقۋ جۇيەسى بارلىق مەكتەپتە بىردەي, بارىنە ورتاق ءبىر ستاندارت, ءبىر باعدارلاما بويىنشا جۇمىس ىستەيمىز. «كەلەشەك مەكتەپتەرى» – قاندايدا ءبىر الەۋمەتتىك, ەكونوميكالىق ەرەكشەلىگىنە, اۋىلدا, يا قالادا تۇراتىنىنا قاراماستان, كەز كەلگەن وقۋشىعا قولجەتىمدى جايلىلىق, بارلىعىنا تەڭ جاقسى جاعداي جاساۋدىڭ كورسەتكىشى. بۇل – ليتسەي دە, گيمنازيا دا, دارىندى بالالارعا ارنالعان وقۋ وشاعى دا, زياتكەرلىك ءبىلىم ۇياسى دا ەمەس, جالپى ءبىلىم بەرەتىن مەكتەپ.
«كەلەشەك مەكتەپتەرىنە» ديرەكتورلار كونكۋرسپەن قابىلدانادى, بىراق ء«بىلىم بەرۋدەگى وزگەرىستەردىڭ 1000 كوشباسشىسى» جوباسىنىڭ تۇلەكتەرى ديرەكتور قىزمەتىنە ءبىرىنشى كەزەكتە كونكۋرسسىز قابىلدانادى. مەن دە سول جوبانىڭ الدىڭعى جىلعى تۇلەگىمىن, بىرنەشە كەزەڭنەن ءوتىپ, 1000 كوشباسشىنىڭ ءبىرى بولدىم. ال «كەلەشەك مەكتەپتەرىنە» مۇعالىمدەردى جۇمىسقا الۋدىڭ ەكى جولى بار, ءبىرىنشىسى – كونكۋرس ارقىلى تۇرۋ, ەكىنشى رەتتە ارنايى تەستىلەۋدەن وتكەن, وقۋ-اعارتۋ مينيسترلىگى جاساقتاعان پەداگوگيكالىق ماماندىقتاردى بىتىرگەن ۇزدىك تۇلەكتەردىڭ بازاسىنداعى جاس ماماندار قابىلدانادى. بۇل – «كەلەشەك مەكتەپتەرىنە» عانا بەرىلەتىن مۇمكىندىك.
بەكارىس سەرىكقالي,
اقتاۋ قالاسىنداعى №32 جالپى ءبىلىم بەرەتىن كەلەشەك مەكتەبىنىڭ ديرەكتورى
