سۋرەت: inbusiness.kz
ەندى جاڭاشىلدىقتارعا توقتالساق, ءبىرىنشى رەت «زەرتتەۋشى» جانە «پەداگوگ شەبەر» ساناتىن راستاعان پەداگوگتەر اتتەستاتتاۋ تەستىنەن بوساتىلادى. بىراق سونىڭ ەسەسىنە ولار 5 جىل ىشىندە ءوزىنىڭ تاجىريبەسىن تاراتىپ, شەبەرلىگىن كورسەتىپ, ارىپتەستەرىنە ادىستەمەلەرىن دالەلدەۋى كەرەك. مەملەكەتتىك گرانتتا وقىعان, ديپلومىنداعى GPA كورسەتكىشى 3,33-تەن جوعارى بولسا, كەز كەلگەن مەكتەپكە كونكۋرسسىز جۇمىسقا قابىلدانا الادى.
قازاقستان رەسپۋبليكاسىندا جالپىعا مىندەتتى ءبىلىم ستاندارتى بار. بيىل قاڭتاردا سول قۇجاتقا وزگەرىستەر ەنگىزىلدى. بۇل وزگەرىستەر 2027 جىلدىڭ 1 قىركۇيەگىنەن باستاپ كۇشىنە ەنەدى. وعان دەيىن وسى جاڭالىقتار تۋرالى قوعامعا, اتا-انالارعا, پەداگوگ قاۋىمعا ءتۇسىندىرىپ, وزگەرىستەردى قاناتقاقتى جوبا رەتىندە اپروباتسيادان وتكىزەمىز. الەمدىك بانك ءوز زەرتتەۋلەرىنىڭ ناتيجەسىندە قازاقستانداعى مەكتەپ وقۋشىلارىندا وقۋ جۇكتەمەسى تىم كوپ, اۋىر ەكەنىن كورسەتكەن. وسىعان وراي جاڭارتىلعان ستاندارت نەگىزىندە ءبىز مەكتەپتەرگە ەركىندىك بەرگەلى وتىرمىز. بۇل – الەمدىك تاجىريبە. مىسالى, قازىر ەلىمىزدەگى مەملەكەتتىك مەكتەپتەردە 15 مىندەتتى ءپان بار, سونىڭ سانىن 8 پانگە ازايتامىز, قالعان 7 ءپان تاڭداۋ ءپانى بولادى. سوندا پەداگوگيكالىق ۇجىم, سىنىپ, اتا-انا قاۋىمداستىعى بىرلەسىپ, سول 7 ءپاننىڭ قايسىسىن وقيتىنىن تاڭدايدى. ايتالىق, ءبىر سىنىپ تۇگەلىمەن گۋمانيتارلىق باعىتتى تاڭدايتىن شىعار, ولار سوعان سايكەس كەرەك ءپاندى اپتالىق وقۋ جۇكتەمەسىنەن اسىرماي وزدەرى ىرىكتەيدى. ەگەر تاڭداۋ باعىتى ەكى بولەك بولسا, ءبىر سىنىپ ەكىگە ءبولىنىپ تاڭداۋ جاساي الادى. 2027 جىلى كۇشىنە ەنەتىن ستاندارتتا قوعامدا قىزۋ تالقىلانىپ جاتقان الگەبرا مەن گەومەتريا پاندەرىنە قاتىستى ايتايىق. نەگىزى ءبىر نارسەنى ەسكەرۋ كەرەك, تمد ەلدەرىنەن باسقا مەملەكەتتەردە گەومەتريا دەگەن ءپان جوق. وسى ەكى ءپاندى ماتەماتيكا پانىنە كىرىكتىرىپ, مەكتەپتەردىڭ وزىنە تاڭداۋعا مۇمكىندىك بەرەمىز, ەگەر وقي بەرەمىز دەسە, وقي بەرەدى. ستاندارتقا قاتىستى تاعى ءبىر وزگەرىس تاربيە ماسەلەسىنە بايلانىستى. قازىر وقۋشىلاردىڭ تاربيەسىنە سىنىپ جەتەكشىسى, ديرەكتوردىڭ تاربيە جونىندەگى ورىنباسارى عانا جاۋاپتى. ەندى سول ستاندارت تالابىنا سايكەس ءار پەداگوگ ءوزى جۇرگىزەتىن وقۋ ۇدەرىسىندە ۇلتتىق قۇندىلىققا نەگىزدەلگەن تاربيە ۇلگىلەرىن پايدالانىپ, جوسپارىن سوعان قاراي قۇرۋى قاجەت.
قانىبەك جۇماشەۆ,
وقۋ-اعارتۋ مينيسترلىگى ورتا ءبىلىم بەرۋ كوميتەتىنىڭ توراعاسى
