ء«بىلىمدى بىرىكتىرىپ, بولاشاقتى قالىپتاستىرامىز» اتتى جاھاندىق بۇل جيىن 18 تامىزدا استانانىڭ ەكسپو كونگرەسس-حولىندا باستالىپ, 22 تامىزدا قورىتىندىلانادى. وعان الەمنىڭ 114 ەلىنەن 1 مىڭ 600-دەن استام دەلەگات قاتىسادى. قازاق جەرىنە الەمدىك كىتاپحاناشىلار قاۋىمىن IFLA پرەزيدەنتى, كۆينسلەند (اۋستراليا) كىتاپحاناسىنىڭ باس ديرەكتورى ۆيكي ماكدونالد باستاپ كەلەدى.
ەلىمىز تاراپىنان «Kazakh Tourism», استانا قالاسىنىڭ اكىمدىگى, عىلىم جانە جوعارى ءبىلىم مينيسترلىگىنە قاراستى جوو كىتاپحانالارى قاۋىمداستىعى بىرلەسىپ ۇيلەستىرگەن وسى ءىس-شارا مادەنيەت, ءبىلىم, تۋريزم سالاسىنا سەرپىن بەرەدى.
IFLA – كىتاپحانا ىسىندەگى كاسىبي مامانداردىڭ ەڭ ءىرى جاھاندىق ۇيىمى. ول 1927 جىلى شوتلانديانىڭ ەدينبۋرگ قالاسىندا قۇرىلعان. قازىر بۇل مادەني ۇيىمنىڭ شتاب-پاتەرى نيدەرلاندتىڭ كورول كىتاپحاناسىندا (گااگا) ورنالاسقان. حالىقارالىق ۇيىم ءتۇرلى ەلدەردەگى كىتاپحانا ءىسىنىڭ وزىق تاجىريبەسىن جيناقتاپ, تالداپ, قىزمەت كورسەتۋ مەن اقپارات الماسۋ ءىسىن ۇيىمداستىرىپ وتىرادى.
استانادا وتەتىن IFLA-نىڭ دۇنيەجۇزىلىك كونگرەسى ەلىمىزدىڭ ىسكەرلىك تۋريزم ۇستانىمىن نىعايتۋدى, سونداي-اق سالا ماماندارىنىڭ كاسىبي دەڭگەيىن جەتىلدىرۋ مەن اقپاراتتىق قىزمەت ساپاسىن ارتتىرۋدى كوزدەيدى. ماڭىزدى جيىن ورتالىق ازيا كىتاپحانا قاۋىمداستىعىنىڭ كاسىبي بەدەلىن دە كوتەرەدى.
پرەزيدەنت قاسىم-جومارت توقاەۆ ۇلتتىق قۇرىلتايدىڭ اتىراۋدا وتكەن وتىرىسىندا كىتاپحانا سالاسىنا مەملەكەتتىك, قوعامدىق كوزقاراستىڭ جۇيەلى, دايەكتى بولۋىن اتاپ وتكەنى ءمالىم. جۋىردا عانا «100 كىتاپ» ۇلتتىق ساۋالناماسىنىڭ قورىتىندىسى جاريالاندى. IFLA كونگرەسى ءار ەلدەگى كىتاپحاناعا قاتىستى تىڭ جوبالار مەن الەمدىك مادەني ىقپالداستىقتى تولىق قولدايدى.
«IFLA-نىڭ دۇنيەجۇزىلىك كونگرەسىن وتكىزۋگە قازاقستان جوو كىتاپحانالار قاۋىمداستىعىنىڭ ساتىمەن اتسالىسقانى – ماڭىزدى قادام. ويتكەنى جوعارى مەكتەپتىڭ نەگىزگى باعىتى كىتاپحانا جۇيەسىن جەتىلدىرۋگە جانە الەمدىك جاڭا ادەبيەتتەردى قولجەتىمدى ەتۋگە باعىتتالعان. ۋنيۆەرسيتەتتەر – قاشاندا ءبىلىم, عىلىم, مادەنيەت ۇشتاعانىنىڭ ۇيلەسىمى», دەيدى عىلىم جانە جوعارى ءبىلىم ءمينيسترى ساياسات نۇربەك.
تۋريزم باعىتىنا كەلسەك, بۇل كونگرەسس استاناعا شامامەن 2 ملن ەۋرو تابىس اكەلۋگە ءتيىس. قارجىلىق كىرىس شەتەلدىك دەلەگاتتاردىڭ قوناقۇي, كولىك, تاماقتانۋ, ت.ب. قىزمەتتەرگە جۇمساعان شىعىندارى ەسەبىنەن قۇرالادى.
كونگرەسس اياسىندا استاناداعى جوعارى وقۋ ورىندارى مەن مادەنيەت مەكەمەلەرىندە ايتۋلى كەزدەسۋلەر, پىكىر الماسۋلار وتەدى.
سابىر ءشارىپ
