جيىنعا جانىبەك جانە قازتالوۆ اۋداندارىنان اسكەري مىندەتتى 206 ازامات تارتىلعان. قازتالوۆ اۋدانىنىڭ اكىمى اسلانبەك سارقۇلوۆتىڭ ايتۋىنشا, بۇل شارا ەل قورعانىسىن نىعايتىپ, جاستاردىڭ بويىندا پاتريوتتىق رۋحتى كوتەرۋ ماقساتىندا وتكىزىلىپ وتىر.
- بۇگىن اۋدانىمىز ءۇشىن ەرەكشە مانگە يە شارا باستالدى. اۋماقتىق اسكەري-تاكتيكالىق وقۋ-جاتتىعۋ – بەيبىت كۇندە دە ەل قورعانىسىن ويلايتىن, وتان الدىنداعى بورىشىن ابىرويمەن اتقارۋعا دايىن ازاماتتاردىڭ بىرلىگىن, ەرىك-جىگەرىن, كاسىبي دايارلىعىن شىڭدايتىن ماڭىزدى كەزەڭ. مەملەكەت باسشىسى اتاپ وتكەندەي, ەل قاۋىپسىزدىگى – ءاربىر قازاقستاندىقتىڭ قاسيەتتى پارىزى. وسى تۇرعىدان العاندا, بۇگىنگى جاتتىعۋلار تەك اسكەري ماشىقتى جەتىلدىرۋمەن شەكتەلمەيدى, ول – ءبىزدىڭ ورتاق وتانىمىزعا دەگەن سۇيىسپەنشىلىكتىڭ, جاۋاپكەرشىلىكتىڭ ايقىن كورىنىسى. ءبىز بەيبىت ءومىردىڭ باعاسىن بىلەمىز. بىراق بەيبىتشىلىكتى ساقتاۋ – كۇشتى قورعانىس قابىلەتىنە, مىقتى رۋح پەن تەمىردەي تارتىپكە نەگىزدەلەدى. ۇلت قاھارمانى باۋىرجان مومىش ۇلى ايتقانداي: ء«تارتىپسىز ەل بولمايدى, تارتىپكە باس يگەن قۇل بولمايدى». بۇل ءسوز – ءاربىر ساربازدىڭ جادىندا بەرىك ساقتالۋى ءتيىس وسيەت, – دەدى اۋدان اكىمى.
وقۋ-جاتتىعۋ كەزىندە اسكەري مىندەتتى جاستار اسكەري ءبىلىمىن جەتىلدىرىپ, تاكتيكالىق ماشىعىن شىڭدايدى جانە توتەنشە جاعدايلاردا ءىس-قيمىل جاساۋ قابىلەتىن ارتتىرادى.
جيىنعا قاتىسۋشىلار اۋىلدىق وكرۋگتەردەن اۋدان ورتالىعىنا جەتكىزىلگەن. قورعانىس ءىسى جونىندەگى ءبولىم ارقىلى بارلىق ۇيىمداستىرۋ جۇمىسى ۇيلەسىپ جاتىر. تولىق قۇرام قاجەتتى جابدىقتارمەن قامتاماسىز ەتىلگەن.
