كەش بارىسىندا كۇي ونەرىنىڭ دارابوزى, مەملەكەتتىك سىيلىقتىڭ لاۋرەاتى سەكەن تۇرىسبەكوۆتىڭ سىرلى سازدى, تەرەڭ فيلوسوفيالىق مازمۇنعا تولى كۇي تولعاۋلارى ورىندالىپ, كورەرمەندى كوركەم سەزىمگە بولەدى. كۇي كەرۋەنى حاكىم ابايدىڭ ولەڭدەرىمەن ورنەكتەلىپ, سەكەن اندەرىمەن ارلەندى. كۇي مەن پوەزيا, ءان مەن اڭگىمە ۇشتاسقان كەشكە كورەرمەن ىقىلاسى ەرەكشە بولدى.
– اباي تويى باستالعان كۇننەن باستاپ «اق جاۋىن» كامەرالىق وركەسترىمەن بىرگە اباي وبلىسىنىڭ ماقانشى, ءۇرجار, اياگوز اۋداندارىندا كونتسەرت قويىپ كەلدىك. ءبىر قىزىعى, «اق جاۋىن» وركەسترى بارعان اۋدانداردىڭ بارىندە اق جاۋىن بولدى. «اق جاۋىن – اللانىڭ نۇرى» دەيتىن اجەلەرىمىز. تاعى ءبىر ايتا كەتەر جايت, وبلىس اكىمى بەرىك ءۋاليدىڭ ۇسىنىسىمەن وبلىستىق تەلەارنادا اۋا رايى باعدارلاماسىنىڭ فونىنا «اق جاۋىن» كۇيىن بەرىپتى. قىتايداعى قازاق تەلەارنالارىندا دا «اق جاۋىن» كۇيى بەرىلەتىنىن كورگەم. سودان با, كەيبىر كىسىلەر «اۋا رايىن» تارتىپ بەرىڭىزشى دەيتىن بولىپتى», دەپ اعىنان جارىلدى كۇيشى.
كۇي كەشىنە كوپتەپ جينالعان وبلىس تۇرعىندارى مەن قالا قوناقتارى, جالپى ونەرسۇيەر قاۋىم بەكزات ونەرگە شىنايى ريزاشىلىقتارىن جەتكىزىپ, قايتا-قايتا شاتىرلاعان قوشەمەت ءبىلدىردى.
«اق جاۋىن» مەملەكەتتىك كامەرالىق وركەسترى ءداستۇرلى ساز ونەرى مەن زاماناۋي كلاسسيكانى شەبەر ۇشتاستىرىپ, اباي شىعارمالارىنا ارنالعان مۋزىكالىق ينتەرپرەتاتسيالاردى جوعارى دەڭگەيدە ورىندادى. وركەستر رەپەرتۋارىنداعى ءاربىر شىعارما كورەرمەنگە تەرەڭ وي سالىپ, اسەرلى اۋەن تىڭداۋشى جۇرەگىنە اسەم ءىز قالدىرعانى ءسوزسىز.
اباي وبلىسى
