حاكىمگە ارنالعان تسيفرلىق جوبا
حاكىم ابايدىڭ 180 جىلدىق مەرەيتويىنا ارنالعان ونكۇندىك سەمەي قالاسىنداعى مۇحتار اۋەزوۆ اتىنداعى پەداگوگيكالىق كوللەدجدىڭ «ەس-ايماق» رۋحاني ورتالىعىندا «Abai akademiasy» اتتى ەنتسيكلوپەديالىق پورتالدىڭ تۇساۋكەسەرىنەن باستالدى. اقىن شىعارماشىلىعىنا ارنالعان تۇڭعىش ەنتسيكلوپەديالىق پورتالدىڭ تانىستىرىلىمىنا وبلىس اكىمى بەرىك ءۋالي, زيالى قاۋىم وكىلدەرى, ابايتانۋشى عالىمدار قاتىستى.
ەنتسيكلوپەديالىق پورتالدىڭ تۇساۋكەسەرىندە ءسوز سويلەگەن ءوڭىر باسشىسى اباي تويى بيىل تۇڭعىش رەت 10 كۇندىك رەتىندە اتاپ وتىلەتىنىن ايتىپ, 1-10 تامىز ارالىعىندا سەمەي قالاسى مەن اباي اۋدانىندا, وبلىستىڭ وزگە دە وڭىرلەرىندە ءتۇرلى مادەني-رۋحاني, تانىمدىق, ينتەللەكتۋالدىق ءىس-شارالاردىڭ جوسپارلانىپ وتىرعانىنا توقتالدى.
اتالعان ونكۇندىكتىڭ وتۋىنە قارجىنى تۇگەلدەي جاناشىر دەمەۋشىلەر كوتەرىپ وتىر. اباي تويىنىڭ وڭىرىمىزگە ەڭ باستى سىيلىعى – مەملەكەت باسشىسىنىڭ قولداۋىمەن باستالعان «ابايعا قۇرمەت» اكتسياسى. حاكىمنىڭ تويىندا ەلىمىزدىڭ ءار ءوڭىرى جاڭادان قۇرىلعان وبلىسىمىزعا ءبىر نىساننان سالىپ بەرەتىن بولدى. ماڭعىستاۋ «دوستىق ءۇيىن», شىمكەنت شىعارماشىلىق ورتالىق, تۇركىستان كورمە ورتالىعىن, استانا جايلى مەكتەپ, اقتوبە جەكپە-جەك ورتالىعىن, پاۆلودار وبلىسى ۇستەل تەننيسى ورتالىعىن سالۋعا, شىعىس قازاقستان ەرتىس جاعالاۋىن جاساندىرىپ بەرەمىز دەپ وتىر. وزگە وڭىرلەر دە حابارلاسىپ, ىقىلاس-نيەتتەرىن ءبىلدىرىپ جاتىر», دەدى وبلىس اكىمى.
سونىمەن قاتار ەنتسيكلوپەديالىق پورتال اباي مۇراسىن زاماناۋي فورماتتا جەتكىزۋ تۇرعىسىندا ماڭىزدى ەكەنىن جەتكىزدى.
«مەملەكەت باسشىسى قاسىم-جومارت توقاەۆ «اباي جانە ءححى عاسىرداعى قازاقستان» اتتى ماقالاسىندا «ابايدىڭ شىعارمالارىنا زەر سالساق, ونىڭ ۇنەمى ەلدىڭ العا جىلجۋىنا, ءوسىپ-وركەندەۋىنە شىن نيەتىمەن تىلەۋلەس بولعانىن, وسى يدەيانى بارىنشا دارىپتەگەنىن بايقايمىز. ال ىلگەرىلەۋدىڭ نەگىزى ءبىلىم مەن عىلىمدا ەكەنىن انىق بىلەمىز. اباي قازاقتىڭ دامىلسىز وقىپ-ۇيرەنگەنىن بار جان-تانىمەن قالادى. «عىلىم تاپپاي ماقتانبا» دەپ, ءبىلىمدى يگەرمەيىنشە, بيىكتەردىڭ باعىنا قويمايتىنىن ايتتى» دەپ ابايدىڭ مۇراتىن, ماقساتى مەن ارمانىن جىلىكتەپ ايتىپ, بۇگىنگى قازاق بالاسىنا وي سالدى. دەمەك بۇگىن كوپكە جول تارتاتىن ابايعا ارنالعان ەنتسيكلوپەديالىق پورتال, حاكىم مۇرالارىن وسكەلەڭ ۇرپاققا ناسيحاتتاۋ جولىندا نەگىزگى باعدارشام بولماق. سونداي-اق اباي تۋرالى اقپارات ىزدەگەن ادام «Abai akademiyasy» پورتالى ارقىلى تولىققاندى قول جەتكىزە الادى. ەڭ باستىسى, بۇل پورتال ابايدىڭ 180 جىلدىق مەرەيتويىنان كەيىن دە جۇمىسىن جالعاستىرا بەرەدى», دەدى ءوڭىر باسشىسى.
«Abai akademiasy» جوباسىنىڭ جەتەكشىسى ايجان تاباراكقىزى جينالعاندارعا پورتالدى تانىستىردى. ونىڭ ايتۋىنشا, «Abai akademiyasy» پورتالى – اباي مۇراسىن وسكەلەڭ ۇرپاققا ناسيحاتتايتىن, اقىن تۋرالى تولىق مالىمەت ۇسىناتىن عىلىمي-تانىمدىق دەرەككوز. پلاتفورمادا اقىننىڭ ادەبي, عىلىمي, پۋبليتسيستيكالىق جانە ەپيستوليارلىق ەڭبەكتەرى تەكستولوگيالىق ساراپتامامەن, ءتۇرلى فورماتتا جيناقتالعان. ماتەريالدار اباي ينستيتۋتتارى, عىلىمي ورتالىقتار, ارحيۆتەر مەن مۇراجايلاردان الىنىپ, تسيفرلى تۇردە ەنگىزىلگەن. سونداي-اق تەلە-راديو حابارلار مەن دەرەكتى فيلمدەر دە قامتىلعان.
ايتۋلى ءىس-شارادا ابايتانۋشى اراپ ەسپەنبەتوۆ, «جيدەباي-ءبورىلى» مۋزەي-قورىعىنىڭ ديرەكتورى ۇلان ساعاديەۆ, ادەبيەتتانۋشى-عالىم, PhD قارلىعاش اۋباكىر ەنتسيكلوپەديالىق پورتال تۋرالى پىكىرلەرىن ايتتى.
«بۇگىن اشىلىپ وتىرعان «Abai akademiasy» ەنتسيكلوپەديالىق پورتالى – ەلىمىزدىڭ عىلىمي, مادەني, اقپارات ايدىنىنداعى ەلەۋلى جاڭالىق. پورتال جاس عالىمعا دا, ىزدەنۋشىگە دە, ستۋدەنتكە دە, وقۋشىعا دا, قاراپايىم جۇمىسشىعا دا ورتاق. ءوزىنىڭ دوسى سياقتى اڭگىمەلەسىپ, قاجەتتى دەرەكتەرىن قابىلداپ, ءارى قاراي ۇلى اقىن تۋرالى ويلارى مەن تانىمىن دامىتاتىنى ءسوزسىز. ابايدى بىلەمىن, تانيمىن, ۇعامىن, تۇسىنەمىن دەيتىن جاننىڭ بارلىعىنا كومەك بەرەتىن ەڭ ۇلكەن باستى قۇرال, ەنتسيكلوپەديا», دەدى اراپ ەسپەنبەتوۆ.
ءبىر سوزبەن ايتقاندا, ەنتسيكلوپەديالىق پورتال حالىقتىڭ اباي مۇراسىن تانۋىنا كومەگىن تيگىزە بەرمەك. كەلەشەكتە تسيفرلىق جوبانىڭ مۇمكىندىكتەرى جەتىلە تۇسەدى, جاساندى ينتەللەكتىگە نەگىزدەلگەن ۆيرتۋالدى كومەكشى – اباي چات-بوتى دا قولدانۋشىلاردىڭ يگىلىگىنە جۇمىس ىستەمەك. ول ءاربىر سۇراققا اباي جاۋاپ قاتقانداي اسەر بەرەتىن بولادى.
ۇلتتىق اۋىل ەسىگىن ايقارا اشتى
سەمەيدەگى تۇيەمويناق ارالىندا اباي تويىنىڭ ءمانى مەن سانىنە اينالعان ەتنواۋىلدىڭ كەلۋشىلەرگە رەسمي تۇردە ەسىگى اشىلدى. حالىقتىڭ ۇلتتىق مۇراسى مەن باي مادەنيەتىن ناسيحاتتايتىن اۋىل الداعى ون كۇن بويى تويشى قاۋىم مەن تۋريستەرگە قىزمەت كورسەتەدى. ءبىر ايتارلىعى, ءدۇبىرلى توي بارىسىندا ءىس-شارانىڭ دەنى وسى ارالىقتا وتەدى. ەتنواۋىل اۋماعىندا وننان اسا كيىز ءۇي تىگىلگەن, جاستاردىڭ كوڭىل كوتەرۋىنە ءۇش التىباقان ورناتىلعان. قالا جۇرتى مەن قوناقتارى اۋىلعا ءتۇسىپ, ۇلتتىق تاعامداردان ءدام تاتىپ, ءتۇرلى كورمەگە كوزايىم بولىپ, كونتسەرتتىك كەشتەردى تاماشالاي الادى.
كەشە وندا «اسىل مۇرا» قولونەر شەبەرلەرىنىڭ وبلىستىق فەستيۆالى باستالدى. فەستيۆالدا ءوڭىردىڭ ۇزدىك شەبەرلەرى بۇيىمدارىن كوپتىڭ نازارىنا ۇسىندى. ۇلتتىق مۇرانى ناسيحاتتاۋعا, شىعارماشىلىق باستامالاردى قولداۋعا باعىتتالعان ءىس-شارا بيىل ءۇشىنشى مارتە ءوتىپ وتىر. فەستيۆال قورىتىندىسىندا «الامان قۇراق-2025» بايقاۋىنىڭ جەڭىمپازدارى ماراپاتتالادى.
ۇيىمداستىرۋشىلاردىڭ ايتۋىنشا, ەتنواۋىل اۋماعىندا 1-10 تامىزدا قازاق كۇرەسى, تاەكۆوندو, ساداق اتۋ, قول كۇرەسى, دويبى, توعىزقۇمالاق, تۋرنيككە تارتىلۋ, گىر تاسىن كوتەرۋ, اسىق اتۋ سىندى ۇلتتىق جانە زاماناۋي سپورت تۇرلەرىنەن قالالىق اشىق چەمپيوناتتار وتەدى.
ارباتتاعى كورمە
سەمەيدىڭ اربات الاڭىندا دا مەرەكەلىك ءىس-شارالار باستالدى. سونىڭ ءبىرى – تانىمال يلليۋستراتور, سۋرەتشى اڭساعان مۇستافانىڭ «كوڭىلگە ءتۇرلى وي سالار» كورمەسى. ۇلى اقىننىڭ مەرەيتويىنا وراي ۇيىمداستىرىلعان كورمەدە ءومىر, رۋحانيات, ىشكى الەم, قوعام تۋرالى ونەر تۋىندىلارى فيلوسوفيالىق تولعانىس پەن زاماناۋي وبرازدار ارقىلى جۇرت نازارىنا ۇسىنىلعان. ەكسپوزيتسيا قالا تۇرعىندارى مەن قوناقتارىنا ەستەتيكالىق اسەر سىيلاپ, توي كوركىنە كورىك قوستى.
اڭساعان مۇستافا – ايەل قۇقىعى, رۋحاني قۇندىلىق, وتباسىلىق قارىم-قاتىناس جانە ىشكى الەم تاقىرىبىن قوزعايتىن تۋىندىلارىمەن تانىمال. سۋرەتشىنىڭ جۇمىستارى بىرنەشە حالىقارالىق كورمەگە قاتىسىپ, وتاندىق باق-تا كەڭىنەن تالقىلانىپ كەلەدى.
بۇدان سوڭ «اسپان سينەما» جوباسى اياسىندا اباي تۋرالى فيلمدەردىڭ كورسەتىلىمى ءوتىپ, كەش «ارەنا» مادەني-سپورت كەشەنىندە «ادامزاتتىڭ الىبى – حاكىم اباي» اتتى مەرەيتويلىق گالا-كونتسەرتكە ۇلاستى.
اباي تويىنىڭ العاشقى كۇنى وسىلاي باستالدى. بۇل توي جاي عانا توي ەمەس, رۋحاني جاڭارۋعا جول سىلتەيتىن ۇستىنعا اينالارىنا سەنەمىز.
اباي وبلىسى
