فوتو: senate.parlam.kz
سەناتورلار قارماقشى اۋدانىندا ءدۇر وڭعار, يىركول جانە تورەباي بي اۋىلدارىنداعى گاز تارتۋ جۇمىستارىنىڭ جاي-كۇيىن باقىلاپ, بۇل جوبالار اۋىل حالقىنىڭ تۇرمىس ساپاسىن جاقسارتۋعا باعىتتالعانىن اتاپ ءوتتى. ولار شالعايداعى ەلدى مەكەندەر نەگىزگى ينفراقۇرىلىممەن تولىق قامتاماسىز ەتىلۋى قاجەت ەكەنىن ايتتى.
سونىمەن قاتار ساپار اياسىندا سەناتورلار كۇرىش وڭدەۋگە ماماندانعان «جاڭاجول» جشس-دە بولىپ, ونداعى تەحنولوگيالىق ۇدەرىس, ەڭبەك جاعدايى جانە ءوندىرىس كورسەتكىشتەرىمەن تانىستى. اتالعان كاسىپورىننىڭ ازىق-ت ۇلىك قاۋىپسىزدىگىن قامتاماسىز ەتۋدەگى جانە اگروونەركاسىپ كەشەنىن دامىتۋداعى ءرولى ەرەكشە اتالدى.
قازالى اۋدانىندا دەپۋتاتتار سىرداريا وزەنى ارقىلى وتەتىن كوپىردىڭ قۇرىلىسىمەن تانىستى. بۇرىن توقتاپ قالعان نىسان قۇرىلىسى قايتا جاندانىپ, قازىرگى تاڭدا جۇمىستار قارقىندى جۇرگىزىلىپ جاتىر.
ساپار بارىسىندا مادەني مۇرانى ساقتاۋ ماسەلەلەرىنە دە ەرەكشە نازار اۋدارىلدى. سەناتورلار جانكەنت اۋىلىندا ورنالاسقان رەسپۋبليكالىق ماڭىزى بار تاريحي ەسكەرتكىش ماڭىندا جەرگىلىكتى حالىقپەن, مادەنيەت جانە ءبىلىم سالاسىنىڭ وكىلدەرىمەن كەزدەستى. كەزدەسۋ بارىسىندا ءتۋريزمدى دامىتۋ, نىساندى قايتا جاڭعىرتۋ جانە ىشكى تۋريستىك مارشرۋتتارعا قوسۋ قاجەتتىلىگى تالقىلاندى.
«قارماقشى جانە قازالى اۋداندارىنىڭ تاريحي جانە مادەني الەۋەتى زور. بىراق ادام جانە ونىڭ كۇندەلىكتى قاجەتتىلىگى, ينفراقۇرىلىمعا قول جەتىمدىلىك, ەرتەڭگى كۇنگە دەگەن سەنىمى ارقاشان ءبىزدىڭ نازارىمىزدا. اۋىلداردى دامىتۋ, گازبەن, سۋمەن, جولمەن جانە الەۋمەتتىك ينفراقۇرىلىممەن قامتاماسىز ەتۋدى ءدال وسى ماقساتتا جۇيەلى تۇردە كوتەرە بەرەمىز», دەدى سەناتور رۋسلان رۇستەموۆ.
