اقتاۋ قالاسىنىڭ اكىمدىگى, حالىقارالىق تۇركسوي ۇيىمى جانە قازاقستان جازۋشىلار وداعى بىرلەسىپ ۇيىمداستىرعان حالىقارالىق ادەبي ىنتىماقتاستىقتى دامىتۋ ماقساتىنداعى فەستيۆالعا قازاقستان, قىرعىزستان, وزبەكستان, ازەربايجان, تۇركيا, تۇرىكمەنستان مەملەكەتتەرىنەن 20-40 جاس ارالىعىنداعى قالامگەرلەر قاتىستى. «پروزا», «پوەزيا», «دراما» جانرلارى بويىنشا اتالعان ەلدەردەن
59 تالاپكەر قاتىسىپ, قازىلار 12 جۇيرىكتى انىقتادى.
ءا.كەكىلباي ۇلى اتىنداعى وبلىستىق تاريحي-ولكەتانۋ مۋزەيىنە ساياحاتتان سوڭ فەستيۆال ق.سىديىقوۆ اتىنداعى وبلىستىق امبەباپ كىتاپحانادا ادەبي فورۋممەن جالعاستى. فورۋمدا اقىن, مەملەكەتتىك سىيلىقتىڭ يەگەرى سۆەتقالي نۇرجان «كوركەم ادەبيەت جانە تۇركى الەمى», اقىن شەرحان تالاپ «تۇركى ەلدەرى ادەبيەتىنىڭ بايلانىسىن نىعايتۋ جانە جاستار ادەبيەتىن قولداۋ», جازۋشى ىرىسبەك دابەي «قازىرگى تۇركى ادەبيەتىندەگى اۋدارما ماسەلەلەرى», اقىن اسىلان قۋانىش ۇلى «زاماناۋي تۇركى حالىقتارى پوەزياسى جانە تسزيان جۋڭنىڭ ء«بورى توتەمى» كىتابى», اقىن باقتىباي جايلاۋ ء«ابىش كەكىلباي ۇلىنىڭ تۇركى دۇنيەسىنە قىزمەتى» تاقىرىبىندا بايانداما جاسادى. ءار جانر بويىنشا ۇزدىك قالامگەرلەر ماراپاتتالدى. دراما جانرىندا مۇرات قولعانات, پوەزيا جانرىندا شەرحان تالاپ ۇلى, پروزا جانرىندا نۇربەك نۇرجان ۇلى
1 ورىندى يەلەندى.
ادەبي فورۋم اقىندار ايتىسىنا ۇلاستى. «ماڭعىستاۋ – تۇركى مادەنيەتىنىڭ ءتورى» اتتى رەسپۋبليكالىق كوماندالىق ايتىستىڭ اقتىق سايىسىندا ايتباي جۇماعۇلوۆ جەتەكشىلىك ەتكەن قاراعاندى جانە بەكارىس شويبەكوۆ باستاعان تۇركىستان وبلىسىنىڭ كوماندالارى باق سىنادى. ءسوز شەبەرلەرى سۇرە مەن تۇرە ايتىستا قوعامداعى وزەكتى ماسەلەلەردى وتكىر سىناسا, وتىرىك ايتىس پەن قايىم ايتىستا قاعىتپا قالجىڭمەن كورەرمەنگە كوتەرىڭكى كوڭىل كۇي سىيلادى. جىرشىلار قازاقتىڭ قاھارماندىق-تاريحي جىرلارىن قوبىزدىڭ قوڭىر ۇنىمەن تەربەپ, دومبىرانىڭ كۇمبىرىمەن ارلەدى. كۇيشىلەر كۇي تارتىسقا ءتۇسىپ, ءداستۇرلى ءان سايىسى دا عاجاپقا قالدىردى.
– ءار كوماندا تەك سۋىرىپسالما ونەرىمەن عانا ەمەس, ءوز ولكەسىنىڭ سازىن, ماقامىن, بولمىسىن الا كەلدى. قوس ءوڭىردىڭ ونەرپازدارىن ءبىر-بىرىنەن ۇستەم دەۋ قيىن. باستىسى – حالىقتىڭ كوكەيىندەگى ماسەلە ايتىلدى, ۇلتتىق سانا جاڭعىردى, – دەدى قازىلار القاسىنىڭ توراعاسى نۇرتورە ءجۇسىپ.
ەكى جىلعا سوزىلعان رەسپۋبليكالىق كوماندالىق ايتىستا قاراعاندى مەن تۇركىستان كوماندالارى تەڭ ءتۇسىپ, 1 ورىندى ءوزارا ءبولىستى. 2 ورىن استانا قالاسى مەن اقتوبە وبلىسىنا بۇيىرسا, 3 ورىندى قىزىلوردا مەن سولتۇستىك قازاقستان وبلىستارىنىڭ اقىندارى قانجىعاسىنا بايلادى.
