ساحنادا 85 ادام ونەر كورسەتتى. رەجيسسەر فارحاد مولداعالي قويعان سپەكتاكلدە جاس سۇلتان بەيبارىستىڭ ءرولىن «دارىن» مەملەكەتتىك جاستار سىيلىعىنىڭ لاۋرەاتى اسەت ەسجان سومداسا, ەرەسەك بەيبارىس كەيپىنە بەلگىلى ارتيست وڭداسىن بەسىكباسوۆ ەندى.
بيىل XVII ا.پ.چەحوۆ اتىنداعى حالىقارالىق تەاتر فەستيۆالىنە قازاقستان, قىتاي, برازيليا, ءۇندىستان, وڭتۇستىك افريكا رەسپۋبليكاسى, يران, ارمەنيا, ارگەنتينا, كولۋمبيا جانە باحرەين تەاترلارى قاتىسىپ جاتىر. مۇندا كورەرمەنگە ۇسىنباس بۇرىن ۇيىمداستىرۋشىلار ءار سپەكتاكلدى مۇقيات ىرىكتەپ, ۇزدىكتەرىن عانا تاڭدايدى. بيىل «الاتاۋ» ءداستۇرلى ونەر تەاترى قازاقستاننان شاقىرتۋ العان جالعىز ۇجىم ەكەن.
«العاش رەت تەاترلاندىرىلعان ساۋندراما جانرىن تاماشالادىم. ءبىر جارىم ساعات كوزدى اشىپ-جۇمعانشا وتە شىقتى. موسسوۆەت تەاترى ساحناسىندا قازاقتىڭ نايزاسى مەن بالتاسى جارق ەتتى. بۇعان دەيىن بۇل ساحنادان چەحوۆ پەن پۋشكين تۋىندىلارىن عانا كورىپ كەلگەن ەدىك. ال «ماملۇك» – مۇلدە وزگەشە دۇنيە. تاريح ءتىرىلىپ, جۇرەككە جەتتى. ساۋندراما جانرى مىندەتتى تۇردە جالعاسىن تابۋى كەرەك. قويىلىم سوڭىندا كورەرمەندەر اكتەرلەردى جىبەرگىسى كەلمەدى. مۇنىڭ ايعاعى ون مينۋتتىق تولاسسىز شاپالاق» دەيدى «مير» تەلەكانالىنىڭ ءتىلشىسى رومان بەلۋكوۆ.
قويىلىمدا ءسوز از, قيمىل, پلاستيكا, بي جانە ءتىرى مۋزىكا ەموتسياعا تولى. جانرى دا, بايانداۋ ءتاسىلى دە وزگەشە. كەڭ تىنىستى بۇل تۋىندى پوەتيكالىق فورمادا ءورىلىپ, زاماناۋي رەجيسسەرلىك شەشىممەن دارالانعان. كوركەم پوەتيكالىق بايانداۋعا قۇرىلعان.
«ماملۇك. سۇلتان بەيبارىس» سپەكتاكلىنىڭ كورسەتىلىمى ا.پ.چەحوۆ اتىنداعى حالىقارالىق تەاتر فەستيۆالىنىڭ شىن مانىندەگى ايتۋلى وقيعاسىنا اينالدى. بۇل — قازاق تەاترىنىڭ زاماناۋي تاريحىنداعى ايشىقتى, ەرەكشە بەلەس. قويىلىمدا حالىقتىڭ رۋحىن كوتەرەتىن تاريح پەن بۇگىنگى تەاتر ونەرىنىڭ وزىق تاسىلدەرى شەبەر ۇيلەسىم تاپقان. ماسكەۋ كورەرمەنى ەكى كۇن بويى ورنىنان تىك تۇرىپ قوشەمەت كورسەتتى. بۇل – ورتاق ەڭبەكتىڭ, مادەني ۇندەستىكتىڭ جارقىن جەمىسى», دەدى ا.پ.چەحوۆ اتىنداعى حالىقارالىق تەاتر فەستيۆالىنىڭ باس ديرەكتورى كارينا تساتۋروۆا.
ينارا اۋباكىروۆا,
«الاتاۋ» ءداستۇرلى
ونەر تەاترى
ادەبيەت ءبولىمىنىڭ باسشىسى
الماتى
