فوتو: تجم
1 ناۋرىزدان باستاپ تجم جانىنان سۋ تاسقىنىنا قارسى جەدەل شتاب جۇمىس ىستەپ كەلەدى. سونىمەن قاتار ءار وڭىردە ازاماتتىق قورعاۋ قىزمەتتەرى مەن مۇددەلى ورگانداردىڭ ءىس-قيمىلىن ۇيلەستىرەتىن وبلىستىق شتابتار قۇرىلعان.
قازىرگى تاڭدا ەلدىڭ وڭتۇستىك جانە باتىس وڭىرلەرىندە سۋ تاسقىنىنىڭ بەلسەندى كەزەڭى اياقتالۋعا جاقىن, ال نەگىزگى قاۋىپ اقمولا وبلىسىندا تىركەلىپ وتىر.
شوپتىكول بوگەتىندەگى قازىرگى احۋال: سابىندى اۋىلىندا سۋ تاسقىنى قاۋپى جويىلدى
سونىمەن قاتار سولتۇستىك قازاقستان مەن شىعىس قازاقستان وبلىستارى تۇراقتى باقىلاۋدا تۇر.
سۋ تاسقىنىنىڭ سالدارىن بولدىرماۋ ءۇشىن كەڭ كولەمدى الدىن الۋ شارالارى قولعا الىنعان. اتاپ ايتقاندا:
- 9 ملن-نان استام تەكشە مەتر قار شىعارىلدى;
- 1,3 ملن-نان استام تەكشە مەتر ەرىگەن سۋ سورىلدى;
- 79 مىڭنان استام قاپ جانە 103 مىڭ توننا ينەرتتى ماتەريال توسەلدى;
- 1,9 ملن مەتردەن استام ارىقتار مەن كانالدار تازارتىلدى;
- 5 مىڭنان استام ۋاقىتشا بوگەندەر تۇرعىزىلدى.
سونىمەن قاتار 43 اۋەدەن بارلاۋ جۇرگىزىلىپ, 305 سۋ تاسقىنى قاۋپى بار ەلدى مەكەن تەكسەرىلدى.
سۋ تاسقىنىنىڭ شارىقتاۋ شەگى اقمولا وڭىرىندە ءوتىپ جاتىر. قورعالجىن اۋدانىنداعى شوپتىكول بوگەتىنىڭ ءىشىنارا بۇزىلۋى دەر كەزىندە قالپىنا كەلتىرىلدى, ەلدى مەكەندەرگە قاۋىپ جوق. سونداي-اق قالقۇتان وزەنىندەگى سۋ دەڭگەيىنىڭ كوتەرىلۋىنە بايلانىستى ەسكى قالقۇتان اۋىلىنا كىرەبەرىس ۋاقىتشا جابىلدى, بىراق ەلدى مەكەنگە قاۋىپ جوق.
ال سولتۇستىك قازاقستان وبلىسىندا تاۋلىك بويى مونيتورينگ جۇرگىزىلىپ جاتىر.
- 28 مىڭ قاپ دايىندالدى, 10 مىڭ قاپ توسەلدى;
- ەسىل وزەنى بويىنا 2 مىڭ مەتر پوليەتيلەن توسەمى توسەلدى;
- اۋەدەن قار قورى مەن سۋ نىساندارى تەكسەرىلدى;
- جاعداي تولىق باقىلاۋعا الىنعان.
شىعىس قازاقستان وبلىسىندا تجم اسكەري بولىمدەرى سۋ تاسقىنىنا قارسى جۇمىستاردى اياقتادى.
- 4,9 كم ارىق تازارتىلدى;
- 6 كوپىر, 2 كانال جانە 27 سۋ وتكىزۋ نىسانى تازارتىلدى;
- 1220 قاپ ينەرتتى ماتەريال قولدانىلدى.
قوستاناي وڭىرىندە سۋ تاسقىنى جاعدايى تۇراقتى, سۋ دەڭگەيى قاۋىپتى مەجەدەن اسپايدى, سۋ باسۋ فاكتىلەرى تىركەلمەگەن.
اباي جانە قاراعاندى وبلىستارىندا سۋ تاسقىنىنىڭ بەلسەندى كەزەڭى اياقتالىپ, جاعداي تۇراقتى. اباي وبلىسىندا قار جامىلعىسى شامامەن 8% عانا, وزەندەر شتاتتىق رەجيمدە.
سۋ تاسقىنى: قازاقستاننىڭ بىرنەشە وڭىرىندە تاسجولداردى سۋ باستى
سۋ تاسقىنىمەن كۇرەسكە 700-دەن استام ادام, 227 تەحنيكا, 40 موتوپومپا جانە 5 ءجۇزۋ قۇرالى جۇمىلدىرىلعان. سونىمەن قاتار اسكەري بولىمدەر سولتۇستىك قازاقستانداعى قاۋىپتى ۋچاسكەلەردە شوعىرلانعان.
قازىرگى تاڭدا ەلدەگى سۋ تاسقىنى جاعدايى تۇراقتى باقىلاۋدا, نەگىزگى قاۋىپتەر ازايتىلعان. دەگەنمەن گيدرولوگيالىق مونيتورينگ تاۋلىك بويى جالعاسۋدا, ال بارلىق قىزمەتتەردىڭ جۇمىسى كۇشەيتىلگەن رەجيمدە جۇرگىزىلىپ جاتىر.
