وڭىرلىك كوممۋنيكاتسيالار قىزمەتى الاڭىندا وتكەن ءباسپاسوز ءماسليحاتىندا اباي وبلىسى مادەنيەت, تىلدەردى دامىتۋ جانە ارحيۆ ءىسى باسقارماسىنىڭ باسشىسى جانجىگىت ومارحانوۆ باستاعان اتقارۋشى بيلىك وكىلدەرى بايانداما جاسادى. وندا حالىقارالىق, رەسپۋبليكالىق جانە وڭىرلىك دەڭگەيدە 100-دەن اسا اۋقىمدى ءىس-شارا بەكىتىلگەنى ايتىلدى.
«اۋقىمدى باعدارلاما 1 تامىز كۇنى «Abay Academiyasy» ەنتسيكلوپەديالىق پورتالىنىڭ اشىلۋىمەن باستالادى. بۇل بىرەگەي پلاتفورما اقىن مۇراسىن تسيفرلاندىرۋ, جۇيەلەۋ جانە عىلىمي ورتاعا قولجەتىمدى ەتۋگە باعىتتالعان», دەدى جانجىگىت ابزالبەك ۇلى.
2–6 تامىز ارالىعىندا قازاقستاننىڭ حالىق ءارتىسى مايرا يلياسوۆانىڭ ابايعا ارنالعان گاسترولدىك كونتسەرتى سەمەيدەن باستالىپ, اۋدانداردا جالعاسادى. 3 تامىزدا اباي تەاترىندا «اباي الەمى» رۋحاني كەشى وتەدى (قازاقستاننىڭ حالىق ءارتىسى رامازان ستامعازى, مادەنيەت قايراتكەرى ەركىن شۇكىمان, ەرلان رىسقالي ونەر كورسەتەدى). 4 تامىزدا سەكەن تۇرىسبەكوۆ پەن «اق جاۋىن» وركەسترىنىڭ كونتسەرتى قويىلادى. 5 تامىزدا «وي تولعاۋ – حاكىم اباي» مونووپەراسى ساحنالانادى جانە 6 تامىز كۇنى اباي الاڭىندا «اباي ەلى – ونەر كەنىشى» كونتسەرتى مەن ءاليحان بوكەيحان ۋنيۆەرسيتەتىندە «ولەڭ – ءسوزدىڭ پاتشاسى» اتتى جاس اقىندار ءمۇشايراسى وتپەك.
«7 تامىزعا حالىقارالىق «الاش» سىيلىعىنىڭ يەگەرى اسقار التايدىڭ شىعارماشىلىق كەشى اياسىندا «اباي جولى» ەنتسيكلوپەدياسى مەن باعاشار تۇرسىنبايدىڭ «اباي قۇنانباي ۇلى كىم؟» كىتابىنىڭ تۇساۋكەسەرى جوسپارلانعان. 8 تامىزدا سەمەيدە «ادامزاتتىڭ ابايى» رەسپۋبليكالىق اقىندار ايتىسى, اباي اۋدانىندا «جەتى قازىنا» ۇلتتىق بايقاۋىنىڭ اشىلۋى وتسە, 9 تامىزدا شاكارىم ۋنيۆەرسيتەتىندە حالىقارالىق عىلىمي كونفەرەنتسيا, «جيدەباي-ءبورىلى» مۋزەيىندە كورمە, اباي كىتاپحاناسىندا كىتاپتار توپتاماسىنىڭ تۇساۋكەسەرى مەن 15 ەلدىڭ قاتىسۋىمەن حالىقارالىق اقىندار فەستيۆالى ۇيىمداستىرىلادى. ال كەشكىسىن ورتالىق الاڭدا «ابايعا تارتۋ» كونتسەرتى وتەدى», دەدى سپيكەر.
9 تامىز كۇنى شاكارىم ۋنيۆەرسيتەتىندە «ادامزاتتىڭ ابايى: رۋحانيات, پاراسات, تانىم» حالىقارالىق عىلىمي-تاجىريبەلىك كونفەرەنتسيا بەلگىلەندى. كونفەرەنتسيادا ابايتانۋ عىلىمىنىڭ وزەكتى ماسەلەلەرى تالقىلانىپ, ماقالالار جيناعى جارىققا شىعادى. ابايدىڭ «جيدەباي-ءبورىلى» مەملەكەتتىك تاريحي-مادەني جانە ادەبي-مەموريالدىق مۋزەي-قورىعىندا «اباي. ۋاقىت. ونەر» تاقىرىبىندا بەينەلەۋ ونەرى تۋىندىلارىنىڭ كورمەسى اشىلادى. اباي اتىنداعى وبلىستىق امبەباپ كىتاپحانادا رەسپۋبليكالىق «اباي» باسپاسىنىڭ «اباي الەمى: اۋدارما, تاعىلىم, مۇرا» كىتاپتار توپتاماسىنىڭ تۇساۋكەسەرى وتەدى. بۇعان قوسا «اباي» باسپاسىنىڭ تارتۋى رەتىندە دانيال ىسقاقوۆتىڭ كوركەم اۋدارمالارى, بازاربەك اتىعايدىڭ «ابايدىڭ اۋدارما مەكتەبى» عىلىمي مونوگرافياسى, «شاكارىم قۇدايبەردى ۇلى تۋرالى ەستەلىكتەر مەن مۇراعاتتىق قۇجاتتار» كىتابى وقىرمانعا جول تارتادى.
سونىمەن بىرگە كىتاپحانادا «ادامزاتتىڭ ءبارىن ءسۇي, باۋىرىم دەپ...» حالىقارالىق اقىندار ايتىسى وتەدى. وعان 15 ەلدەن اقىندار قاتىسادى. تۇركسوي جانە حالىقارالىق ەمينەسكۋ پوەزيا اكادەمياسىنىڭ قولداۋىمەن ۇيىمداستىرىلاتىن ءىس-شارادا اباي ولەڭدەرى 15 تىلگە اۋدارىلىپ, انتولوگيالار شىعارىلادى.
10 تامىز – اباي كۇنى. بۇل كۇن تاڭەرتەڭ جيدەبايدا ۇلى اقىن رۋحىنا قۇران باعىشتالىپ, قۇرباندىق شالۋ راسىمىنەن باستاۋ الادى. ەلىمىزدىڭ بارلىق وڭىرىندە اباي ەسكەرتكىشىنە گۇل شوقتارى قويىلادى.
سەمەيدەگى ساۋىق
سەمەي قالاسى اكىمىنىڭ مىندەتىن اتقارۋشى بەكجان باپىشەۆتىڭ مالىمدەۋىنشە, 1 تامىز قالالىق ءىس-شارالار باعدارلاماسى بەيبىتشىلىك ارالىنداعى ەتنواۋىلدا ساعات 09:00-دە باستاۋ الادى. وندا 10 كيىز ءۇي مەن التىباقان قۇرىلىپ, ۇلتتىق سپورت ويىندارى, كونتسەرتتەر مەن كورمەلەر, ۇلتتىق تاعامدار جارمەڭكەسى وتەدى. سول كۇنى اباي ولەڭدەرىنەن حالىقارالىق مارافون باستالىپ, شەتەلدەگى جاستار ونلاين قاتىسادى. سونىمەن قاتار ساعات 11:00-دە زاعيپ جانە ناشار كورەتىن ازاماتتارعا ارنالعان ارنايى كىتاپحانا ءوز ەسىگىن ايقارا اشادى.
2 تامىز كۇنى «ارەنادا» ساعات 15:00-دە 180 كوماندانىڭ قاتىسۋىمەن زياتكەرلىك «اباي Quiz» ويىنى وتەدى. رەسپۋبليكالىق ويىنعا مەرەيتويمەن مازمۇنداس ەتىپ, 180 كوماندانى قاتىستىرۋ جوسپارلانىپ وتىر ء(ار كوماندادا 6 ادامنان 1 080 قاتىسۋشى). ال 3 تامىزدا «ارەنا» سپورت كەشەنىندە ساعات 10:00-دە قازاق كۇرەسىنەن رەسپۋبليكالىق چەمپيونات وتكىزىلەدى. 200-دەن استام بالۋان كۇرەسەدى. سونىمەن قاتار «اباي مۇراسى – حالىق دانالىعى» اتتى رەسپۋبليكالىق ادەبي كەش ۇيىمداستىرىلادى.
4 تامىز كۇنى ەرتىس جاعاسىندا ەلگە كەڭىنەن تانىمال «سەمەي باتىرى» كۇشتىك ەكستريم ءتۋرنيرى رەسپۋبليكالىق دەڭگەيدە وتەدى. مىسالى, قاپ كوتەرىپ جۇگىرۋ, زەرحەردى ۋاقىتقا كوتەرۋ, گىر تاسىن جۇلقا كوتەرۋ, بورەنەمەن وتىرىپ-تۇرۋ, تاعىسىن تاعى.
5 تامىز كۇنى «تايقازان» مەيرامحاناسىندا ءۇش كۇندىك حالىقارالىق مادەني-شىعارماشىلىق ءسان كورسەتىلىمى باستالماق. ال 6 تامىزدا Alikhan Bokeikhan University-دە «ولەڭ – ءسوزدىڭ پاتشاسى» اتتى حالىقارالىق اقىندار ءمۇشايراسىنا 7 مەملەكەتتەن جانە ەلىمىزدىڭ بارلىق وڭىرىنەن اقىندار قاتىسپاق. 7 تامىز كۇنى سەمەي قالاسىنان قاراۋىل توبەگە دەيىنگى 2 كۇنگە سوزىلاتىن 180 شاقىرىمدىق حالىقارالىق مارافون باستالادى. قالا تۇرعىندارىنا ارنالعان 3 شاقىرىمدىق مارافون دا قاراستىرىلعان.
ونىمەن بىرگە 10 تامىز كۇنى ساعات 19:00-دە سەمەي قالاسىنىڭ ورتالىق الاڭىندا الەمگە تانىمال « ۇلىتاۋ» توبى, جۇبانىش جەكسەن, انار باتىرحان سىندى انشىلەر قاتىسۋىمەن «قۇلاقتان كىرىپ بويدى الار, اسەم ءان مەن ءتاتتى كۇي» اتتى گالا-كونتسەرت وتەدى.
قاراۋىلداعى قىزىق
10 تامىز – اباي كۇنى اباي اۋدانىندا «بالا ابايدان دانا ابايعا» اتتى تەاترلاندىرىلعان قويىلىم ساحنالانادى. ساعات 11.30-دا «اباي كۇنى» مەرەكەسى سالتاناتتى تۇردە اشىلادى. 12.00–13.00 ارالىعىندا «ولەڭگە اركىمنىڭ-اق بار تالاسى» اتتى كۇندىزگى كونتسەرت ۇيىمداستىرىلادى. 13.00–14.30 قاراۋىلتوبەدە اس بەرىلەدى. 14.30–17.00 ارالىعىندا ۇلتتىق ات سپورت ويىندارى وتەدى (توپ بايگە, جورعا, الامان بايگە). 15.30–17.30 قازاق كۇرەسىنەن رەسپۋبليكالىق ءتۋرنيردىڭ فينالدىق باسەكەلەرى (تۇيە جانە وگىز پالۋان). 19.00–21.00 ونەر جۇلدىزدارىنىڭ «جەلسىز تۇندە جارىق اي» گالا كونتسەرتىمەن اياقتالادى. اباي اۋدانىنىڭ اكىمى مەيىرجان سماعۇلوۆتىڭ ايتۋىنشا, 8–10 تامىز كۇندەرى تۇڭعىش رەت رەسپۋبليكالىق «جەتى قازىنا» ۇلتتىق مادەنيەت, سپورت جانە تۋريزم فەستيۆالى وتەدى. «بابامىزدىڭ سۇيىكتى ويىنى توعىزقۇمالاققا, ۇلتتىق ات سپورتى مەن قازاق كۇرەسى (وگىز پالۋان, تۇيە پالۋان) جارىستارىنا جيىنى 1000-عا جۋىق قاتىسۋشى قامتىلادى دەپ جوسپارلانىپ وتىر», دەدى اۋدان اكىمى.
قاراۋىل توبەدە كەڭ اۋقىمدى ەتنو-قالاشىق قۇرىلىپ, 200-دەن اسا كيىز ءۇي تىگىلەدى. 8–10 تامىز ارالىعىندا ارنايى قوعامدىق كولىك مارشرۋتتارى, 12 اۆتوبۋس قىزمەت كورسەتەدى. مۇگەدەكتىگى بار ادامدارعا 10 ينۆاتاكسي قاراستىرىلعان.
اباي تويى قارساڭىنداعى ءىس-شارالارعا 30 مىڭنان استام ادامنىڭ قاتىسۋى جوسپارلانعان. مەملەكەت باسشىسىنىڭ تاپسىرماسىنا سايكەس بارلىق ءىس-شارا مازمۇندى, تاربيەگە نەگىزدەلگەن, ىسىراپسىز وتەدى.
1–10 تامىز ارالىعىندا وتەتىن ابايدىڭ 180 جىلدىق مەرەيتويىنىڭ ون كۇندىگىنىڭ تاقىرىبى:
1 تامىز – «ارتىق عىلىم كىتاپتا...»
2 تامىز – «تۋعان جەرگە تاعزىم»
3 تامىز – «ۇيىقتاپ جاتقان جۇرەكتى ءان وياتار...»
4 تامىز – «ادامنىڭ كەيبىر كەزدەرى...»
5 تامىز – ء«اندى سۇيسەڭ, مەنشە ءسۇي...»
6 تامىز – «ادامزاتتىڭ ءبارىن ءسۇي, باۋىرىم دەپ...»
7 تامىز – «دۇنيە دە ءوزى, مال دا ءوزى – عىلىمعا كوڭىل بەرسەڭىز...»
8 تامىز – «ماقسۇتىم – ءتىل ۇستارتىپ, ونەر شاشپاق...»
9 تامىز – «اقىل, قايرات, جۇرەكتى بىردەي ۇستا, سوندا تولىق بولاسىڭ ەلدەن بولەك...»
10 تامىز – «جازدىم ۇلگى جاستارعا بەرمەك ءۇشىن»
اباي وبلىسى
