اتاپ ايتقاندا, تالاپكەرلەرگە ساعادات نۇرماعامبەتوۆ اتىنداعى قۇرلىق اسكەرلەرىنىڭ اسكەري ينستيتۋتى, تالعات بيگەلدينوۆ اتىنداعى اۋە قورعانىسى كۇشتەرىنىڭ اسكەري ينستيتۋتى جانە راديوەلەكترونيكا جانە بايلانىس اسكەري-ينجەنەرلىك ينستيتۋتىنىڭ ەسىگى ايقارا اشىق. قۇجات قابىلداۋ 31 شىلدەگە دەيىن جالعاسىپ, قابىلداۋ ەمتيحاندارى 1-20 تامىز ارالىعىندا وتپەك. ولارعا كاسىبي-پسيحولوگيالىق ىرىكتەۋ, سوڭعى مەديتسينالىق تەكسەرۋ, دەنە شىنىقتىرۋ سكرينينگى جانە ماندات كوميسسياسى كىرەدى. بيىلدان باستاپ «ەلەكتروندىق ۇكىمەت» (e-Gov) پورتالىنداعى جەكە كابينەت ارقىلى قۇجات تاپسىرۋعا بولادى.
بولاشاق وفيتسەرلەردى دايارلاۋدىڭ وقۋ باعدارلامالارى كوماندالىق جانە تەحنيكالىق باعىتتاردان ينجەنەرلىك باعىتتارعا دەيىنگى نەگىزگى اسكەري ماماندىقتاردى قامتيدى. اسكەري وقۋ ورىندارىنىڭ كۋرسانتتارى ءتورت جىل مەملەكەتتىك ءبىلىم بەرۋ باعدارلامالارى بويىنشا وقىپ, تەگىن جاتاقحانامەن, شاكىرتاقىمەن قامتاماسىز ەتىلەدى. تاماعى تەگىن, وعان قوسا, باسقا دا ماتەريالدىق كومەك كورسەتىلەدى, سونداي-اق مەديتسينالىق قىزمەت تە قاراستىرىلعان.
اسكەري جوعارى وقۋ ورنىنا ءتۇسۋ ءۇشىن ازاماتتار تۇرعىلىقتى جەرى بويىنشا جەرگىلىكتى اسكەري باسقارۋ ورگانىنا جۇگىنۋى, ارنايى تەكسەرۋدەن ءوتۋى, سونداي-اق ۇبت ناتيجەلەرىن ۇسىنۋى قاجەت. ءبىرىنشى كۋرسقا قابىلدانعان كۋرسانتتار اراسىندا جاقىن جانە الىس شەتەلدەردىڭ اسكەري جوعارى وقۋ ورىندارىندا وقۋعا ىرىكتەۋ جۇرگىزىلەدى. شەتەلدە وقىعىسى كەلەتىندەر وقۋ ءتىلىن ءبىلۋ تەستىنەن جانە ۇبت ناتيجەلەرىنىڭ رەيتينگىسىنەن وتەدى.
اسكەري وقۋ ورىندارىندا ءبىلىم الۋعا, دەنە شىنىقتىرۋعا جانە كاسىبي تۇرعىدا وسۋگە بارلىق جاعداي جاسالعان. وقۋدى اياقتاعان تۇلەكتەرگە «لەيتەنانت» اسكەري اتاعى بەرىلەدى. ولار «باكالاۆر» اكادەميالىق دارەجەسىن الۋ ارقىلى سۇرانىسقا يە ماماندىقتى يەلەنىپ قانا قويماي, جۇمىسقا ورنالاسۋعا, تۇرعىن ۇيمەن قامتاماسىز ەتىلۋگە مۇمكىندىك الماق.
