فوتو: primeminister.kz
جالپى قۇنى 13,8 ملرد تەڭگە بولاتىن بۇل جوبانى ىسكە اسىرۋ 2024 جىلى باستالعان.
بۇگىندە جوبا اياسىندا ەكى قۇبىرلى جۇيەمەن 5,5 شاقىرىم جىلۋ جەلىسى تارتىلدى. ەسكى بولات قۇبىرلار بولشەكتەلىپ, ولاردىڭ ورنىنا 530 مم-دەن 1020 مم-گە دەيىنگى ديامەترلى كوبىكتى پوليۋرەتان وقشاۋلاعىشپەن جابدىقتالعان زاماناۋي قۇبىرلار ورناتىلىپ جاتىر. سونداي-اق 2024-2025 جىلعى جىلىتۋ ماۋسىمىندا انىقتالعان 375 اقاۋ تولىعىمەن جوندەلدى.
اقتاۋ قالاسىنىڭ جىلۋ جەلىلەرىنىڭ جالپى ۇزىندىعى 562 شاقىرىم. توزۋ دەڭگەيى – 79%. اتالعان جوبا ىسكە اسىرىلعاننان كەيىن جەلىلەردىڭ توزۋ دەڭگەيى 75%-عا دەيىن قىسقارادى. بۇل تۇرعىنداردى جىلىتۋ ماۋسىمىندا ۇزدىكسىز جىلۋمەن قامتاماسىز ەتۋگە, ىستىق سۋ جەتكىزۋ وتكىزۋ قابىلەتىن ارتتىرۋعا جانە پايدالانۋ شىعىندارىن ازايتۋعا مۇمكىندىك بەرەدى.
الداعى ۋاقىتتا «ەنەرگەتيكا جانە كوممۋنالدىق سەكتوردى جاڭعىرتۋ» ۇلتتىق جوباسىن جۇزەگە اسىرۋ اياسىندا 2025-2029 جىلدارعا ارنالعان قارجىلاندىرۋ كولەمىن ايقىنداي وتىرىپ, 2029 جىلعا دەيىن 175 شاقىرىم جىلۋ جەلىلەرى مەن جىلۋمەن جابدىقتاۋ كوزدەرىن رەكونسترۋكتسيالاۋ جانە سالۋ جوسپارلانىپ وتىر. جوبا جەلىلەردىڭ توزۋىن ازايتۋعا جانە ينۆەستيتسيا تارتۋ ارقىلى كوممۋنالدىق قىزمەتتەردىڭ ساپاسىن ارتتىرۋعا باعىتتالعان.
