اباي ەلىندەگى ولكەتانۋ مۋزەيىنىڭ قۇندى جادىگەرلەرىنىڭ ءبىرى – ءحىح عاسىرعا تيەسىلى ات ابزەلدەرىنىڭ جيىنتىعى. مۇنى 1912 جىلى مۋزەي قورىنا سىيعا تاپسىرعان نۇرعالي قۇلجانوۆ (ينۆەنتارلى ءنومىرى – 449, ەتن 94).
ءبىرىنشىسى – جۇگەن. وزەگى بىلعارىدان تۇيىلگەن. تىسى قىزىل كۇرەڭ بارقىتپەن قاپتالىپ, ءتۇرلى-ءتۇستى جىبەكپەن كەستەلەنگەن. ۇشتارى كۇمىس پلاستينالارمەن اشەكەيلەنگەن, بەتىن ۇساق كوگىلدىر اقىقپەن (بيريۋزا) كومكەرگەن.
ەكىنشىسى – قۇيىسقان. ونىڭ دا بەتى قىزىل كۇرەڭ بارقىتپەن قاپتالىپ, ءتۇرلى-ءتۇستى جىپتەرمەن ادىپتەلگەن. ەكىگە ايقاسقان تۇسى كۇمىسپەن كۇپتەلىپ, سىرتى ۇساق اقىقپەن كومكەرىلگەن. قۇيىسقاننىڭ ۇزىندىعى – 69 سم.
ءۇشىنشىسى – قۇيىسقان ۇزبەسى. بۇل ابزەلدىڭ ورتا تۇسى دوعال, كۇمىستەن جاسالعان ۇلكەن پلاستينا. ونىڭ بەتى ۇساق اقىقپەن كومكەرىلگەن. پلاستينانىڭ ەكى جاعىنا ءتورت باۋدان سەگىز باۋ جىبەرىلگەن. باۋدىڭ ۇشتارى كۇمىسپەن شاشاقتالعان. ۇزبەنىڭ ۇزىندىعى – 16,3 سم.
ءتورتىنشىسى – ومىلدىرىك. ول دا بىلعارىدان جاسالعان, بەتى بارقىتپەن تىستالىپ, ءتۇرلى ءتۇستى جىپپەن كەستەلەنگەن. شاشاق تۇپتەرى كۇمىس پلاستينالارمەن قاپتالعان, سونداي-اق ول دا اينالدىرا اقىقپەن اشەكەيلەنگەن. ومىلدىرىكتىڭ ولشەمى – 62 سم.
اباي وبلىسى
