دەپۋتاتتار قايناربۇلاق اۋىلدىق وكرۋگىنىڭ تاسكەشۋ ەلدى مەكەنىندە ورنالاسقان «Gen Group Kazakhstan» جشس-نىڭ بانان وسىرىلەتىن جىلىجاي كەشەنىمەن تانىستى. 5,3 گەكتار اۋماقتى الىپ جاتقان كەشەندە تمد كەڭىستىگىندە العاشقىلاردىڭ ءبىرى بولىپ تروپيكالىق ءونىم جەرسىندىرىلىپ, بانان ءوسىرۋ ءىسى قولعا الىنعان. مۇندا جىلىنا مىڭ توننا ءونىم ءوندىرىلىپ, ىشكى نارىقتى قامتاماسىز ەتىپ جاتىر. كەشەن ديرەكتورى تيمۋر وتەشەۆتىڭ ايتۋىنشا, 2023 جىلى جۇمىسىن باستاعان جوبانىڭ العاشقى كەزەڭىنىڭ قۇنى 1,056 ملرد تەڭگەنى قۇراپ وتىر.
ءماجىلىس دەپۋتاتتارى كاسىپكەردىڭ باستاماسىنا قولداۋ ءبىلدىرىپ, ەلىمىزگە عانا ەمەس, تۇتاس تمد كەڭىستىگىنە تاڭسىق بانان شارۋاشىلىعىن تابىستى جۇزەگە اسىرىپ جاتقانىنا ريزاشىلىقتارىن جەتكىزدى. جۇمىسشى ماماندىقتارى جىلى شەڭبەرىندە وتاندىق اگرارلىق سالا ماماندارىن جاڭا تەحنولوگيالارعا ۇيرەتۋگە شاقىردى.
مەملەكەت باسشىسىنىڭ وتاندىق اگروونەركاسىپ كەشەنىن دامىتۋ باعىتىندا بەرگەن تاپسىرمالارىنا توقتالعان ءماجىلىس دەپۋتاتتارى اۋىل شارۋاشىلىعى باسەكەگە قابىلەتتى وزىق سالا رەتىندە ەكونوميكاداعى باستى قوزعاۋشى كۇشتىڭ بىرىنە اينالۋعا ءتيىس ەكەنىن جەتكىزدى. بيزنەس تە, مەملەكەت تە وسىعان مۇددەلى ەكەنىن ايتا كەلە, اۋىل تۇرعىندارىنىڭ تابىسىن ارتتىرۋ ماسەلەسىنە باسا ءمان بەرىلەتىنىن مالىمدەدى.
ءماجىلىستىڭ ءباسپاسوز قىزمەتىنىڭ مالىمدەۋىنشە, سونىمەن قاتار دەپۋتاتتار سارىارىق ەلدى مەكەنىندەگى «كومەش بالىق» جشس-نىڭ بالىق ءوسىرۋ جوباسىمەن دە تانىستى. داۋلەتالى ابدرامانوۆ جەتەكشىلىك ەتەتىن بۇل كاسىپورىن شاباق ءوسىرىپ, تاۋارلى بالىق ءوندىرۋ ءىسىن جولعا قويعان. 259 گەكتار جەردە توعاندار سالىپ, اتالىق-انالىق بالىق تۇرلەرىن ءوسىرىپ جاتقان كاسىپورىن جىلىنا 721,6 توننا ءونىم الىپ, ىشكى نارىقتى ساپالى بالىقپەن قامتىپ وتىر. جوبا قۇنى 750 ملن تەڭگەنى قۇرايدى جانە مۇندا تۇراقتى جۇمىس ورىندارى اشىلعان.
ءماجىلىس دەپۋتاتى قايرات بالابيەۆ جاستارعا قولداۋ كورسەتۋدىڭ, قابىلدانعان زاڭداردى حالىققا ءتۇسىندىرۋدىڭ ءمانى مەن ماڭىزىنا توقتالدى.
«بۇل كەزدەسۋلەردىڭ ماقساتى – «AMANAT» فراكتسياسى باستاماشى بولعان زاڭداردىڭ پايداسىن جۇرتشىلىققا ءتۇسىندىرۋ. مەملەكەت باسشىسىنىڭ جارلىعىمەن 2025 جىل «جۇمىسشى ماماندىقتار جىلى» بولىپ جاريالاندى. اتاۋلى جىلعا وراي, كاسىپورىنداردىڭ, شارۋاشىلىقتاردىڭ جۇمىسىمەن تانىسىپ, بولاشاعىنان ءۇمىت كۇتتىرەتىن كاسىبي مامانداردى پارتيالىق قىزمەتكە تارتۋدى ماقسات ەتىپ وتىرمىز. ءبىز ءوز ءىسىنىڭ بىلىكتى مامانى سانالاتىن جاستارعا قولداۋ كورسەتۋىمىز قاجەت. پارتيا بەرگەن ۋادەلەردىڭ, سايلاۋالدى باعدارلامانىڭ ورىندالۋى دا ۇدايى نازارىمىزدا تۇر. قازىر جىلىجاي شارۋاشىلىقتارى قارقىندى دامىپ جاتىر. وعان دالەل – بانان وسىرەتىن جىلىجاي شارۋاشىلىعىنىڭ جۇمىسى. ەلىمىزدە جاڭا سۋ كودەكسى قابىلداندى, بالىق شارۋاشىلىعىن دامىتۋعا مۇمكىندىك بەرەتىن قۇقىقتىق مەحانيزمدەر ءتۇزىلدى. ناتيجەسىندە ەلىمىز بويىنشا بالىق شارۋاشىلىعى ىلگەرى قادام باسىپ كەلەدى», دەدى ق.بالابيەۆ.
