سۋرەت: inbusiness.kz
مەملەكەت باسشىسى: «قالالار مەن اۋىلداردىڭ ساۋلەتتى, ساياباقتار مەن اۋلانىڭ تازا بولۋى, ەڭ الدىمەن, باسقاعا ەمەس, وزىمىزگە كەرەك», دەگەن ەدى. وسىعان وراي, اباي وبلىسىنىڭ اكىمى بەرىك ءۋالي ءوڭىر تۇرعىندارىنا بەينە ۇندەۋ جاساپ, ءاربىر تۇرعىندى تۋعان جەردىڭ تازالىعىنا, كوركەيۋىنە بىرگە ۇلەس قوسۋعا شاقىردى.
«اباي وبلىسى – ۇلى تۇلعانىڭ اتىمەن اتالعان, الاش ارىستارىنىڭ ءىزى قالعان تاريحى تەرەڭ, تابيعاتى كوركەم ءوڭىر. بۇل – ءبىزدىڭ ورتاق ءۇيىمىز. ونى تازا, جايلى, كورىكتى ەتىپ ۇستاۋ – ارقايسىمىزدىڭ ازاماتتىق بورىشىمىز. شىن مانىندە, ءبىزدىڭ ءوڭىر توعىز جولدىڭ تورابىندا تۇر. ەرتىستىڭ ەكى جاعاسىن جالعاعان جالعىز كوپىردەن ەكى الىپ كورشىمىزگە قاراي كولىك اعىنى وتەدى. بۇل تۇرعىدان العاندا سەمەيىمىز ايماقتىق كولىك-لوگيستيكالىق حابقا اينالىپ كەلەدى. بۇل بىزگە ۇلكەن مۇمكىندىك بەرگەنىمەن, زور جاۋاپكەرشىلىك تە جۇكتەيدى. شاھارىمىزدىڭ تازالىعى مەن ءوڭىرىمىزدىڭ ابىرويى سىنالاتىن دا وسى تۇس. ايماق ەكونوميكاسى, ونەرى مەن مادەنيەتى, ەكولوگياسى مەن تازالىعى – بارشامىزعا ورتاق. تازالىق دەگەنىمىز – جىلىنا ءبىر رەت سەنبىلىككە قاتىسۋ ەمەس, بۇل – وڭىردە قالىپتاسۋعا ءتيىس ۇلكەن مادەنيەت», دەگەن ەدى وبلىس اكىمى.
ۇندەۋگە ءۇن قوسقان اباي جۇرتشىلىعى تازالىققا راسىندا مىقتاپ كىرىستى. تابيعي رەسۋرستار جانە تابيعات پايدالانۋدى رەتتەۋ باسقارماسىنىڭ وكىلى بەكبولات مۇراتوۆتىڭ ايتۋىنشا, اباي وبلىسىندا «تازا قازاقستان» اكتسياسى قارقىندى, جوسپارعا ساي ءجۇرىپ جاتىر.
«كوكتەمگى ەكى ايلىق تازالىق مارافونىنا ءوڭىر تۇرعىندارى بەلسەنە قاتىسىپ, اباتتاندىرۋ جۇمىسى اتقارىلدى. اكتسياعا 100 مىڭنان استام ادام اتسالىسىپ, قالالار مەن اۋىل-اۋدان كوشەلەرى تازارتىلىپ, اباتتاندىرىلىپ جاتىر. سونىمەن قاتار پوليگوندارعا 20 مىڭ توننادان استام قالدىق شىعارىلدى, 500-دەن استام سۋ ايدىنى تازارتىلدى, ولاردىڭ جاعالاۋىنا ونداعان مىڭ جاڭا كوشەت وتىرعىزىلدى. تەك «سەمەي ورمانى» رەزەرۆاتىنىڭ وزىندە عانا 1,5 گا اۋماقتا جاستار مەن كورپوراتيۆتىك ەرىكتىلەردىڭ قاتىسۋىمەن كوشەت وتىرعىزۋ اكتسياسى ءوتتى», دەيدى مامان.
تال ەگۋ كۇنىنە وراي وبلىس اۋماعىندا 23 مىڭنان استام كوشەت ەگىلگەن. ەڭ وزەكتى ماسەلەلەردىڭ ءبىرى – قوقىس ۇيىندىلەرى. عارىشتىق مونيتورينگ جۇمىستارىنىڭ ناتيجەسىندە 266 قوقىس ورنى انىقتالىپ, وبلىس كولەمىندە ونداي ۇيىندىلەر تولىعىمەن جويىلدى.
وبلىس اكىمى سەمەي قالاسىنداعى كوممۋنالدىق تەحنيكالاردىڭ جۇمىسىن ارنايى بارىپ تەكسەردى. قالاداعى تازالىق جۇمىسىن كۇشەيتۋ ماقساتىندا مەردىگەر كومپانيالارمەن بىرلەسىپ 60-قا جۋىق جاڭا تەحنيكا ساتىپ الۋ جوسپارلانىپ وتىر. بۇگىندە 10 جاڭا تەحنيكا ىسكە قوسىلدى. بۇل ءوز كەزەگىندە 100-گە جۋىق جاڭا جۇمىس ورنىن قۇرۋعا مۇمكىندىك بەرەدى.
«قالا تازالىعىنا بايلانىستى تۇرعىندار تاراپىنان شاعىم از ايتىلمايدى. سوندىقتان بۇل باعىتتاعى جۇمىستى ءاردايىم نازاردا ۇستاپ, تاباندى تۇردە جالعاستىرا بەرەمىز. قالا كەلبەتىن جاقسارتۋ, تازالىقتى ساقتاۋ كۇندەلىكتى, جۇيەلى جۇمىستى قاجەت ەتەدى», دەدى ءوڭىر باسشىسى.
ارنايى تەحنيكالار قىستا قار كۇرەپ, كوكتەم, كۇز ايلارىندا جولداردى جۋىپ, تازالاۋعا, كوشەلەردى سىپىرۋعا, قۇم سەبۋگە ارنالعان. جاڭا تەحنيكالار قالانىڭ ورتالىق كوشەلەرىنەن باستاپ, بارلىق شاعىن اۋداندار مەن تۇرعىن ءۇي كەشەندەرىن تازالاۋعا جۇمىلدىرىلادى.
اباي وبلىسى
