فوتو: سۋ رەسۋرستارى جانە يرريگاتسيا مينيسترلىگى
نۇرجان نۇرجىگىتوۆ جالاعاش, قازالى جانە قارماقشى اۋداندارىنىڭ شارۋالارىمەن كەزدەسىپ, ولاردى تولعاندىرعان سۇراقتارعا جاۋاپ بەرىپ, سۋدىڭ «كولەڭكەلى نارىعىنا» قارسى كۇرەس شارالارى, سۋ ۇنەمدەۋ تەحنولوگيالارىن ەنگىزۋدى سۋبسيديالاۋ جانە سۋارمالى سۋدى ءادىل ءبولۋدى قامتاماسىز ەتۋ شارالارى تۋرالى ايتىپ بەردى.
جالاعاش جانە قارماقشى اۋداندارىنىڭ ديقاندارى مينيسترلىكتەن قوسىمشا سورعىلار ساتىپ الۋعا كومەك كورسەتۋدى سۇرادى. ن.نۇرجىگىتوۆ بۇل ماسەلەدە ۆەدومستۆو فەرمەرلەرگە قولداۋ كورسەتەتىنىن ايتتى.
«بىلتىر قازان ايىنان باستاپ ءبىز قىزىلوردا وبلىسىنا, سونىڭ ىشىندە سولتۇستىك ارال مەن ءوڭىردىڭ كول جۇيەلەرىنە سۋ بەرۋدى ۇلعايتتىق, الايدا اۋا رايى جاعدايلارى مەن جاۋىن-شاشىننىڭ ازدىعىنا بايلانىستى ۆەگەتاتسيالىق كەزەڭ 20 كۇن بۇرىن باستالدى. كليماتتىڭ وزگەرۋى سىرداريا باسسەينىنىڭ سۋ رەسۋرستارىنا ودان ءارى اسەر ەتەدى. سوندىقتان سۋ ۇنەمدەۋ تەحنولوگيالارىن ەنگىزۋدى جەدەلدەتۋ, ىلعالدى از قاجەت ەتەتىن داقىلدارعا كوشۋدى قاراستىرۋ جانە جالپى سۋارمالى سۋدى نەعۇرلىم ۇتىمدى پايدالانۋ قاجەت», دەدى مينيستر ن.نۇرجىگىتوۆ.
مينيستر «قازسۋشار» رمك-ءنىڭ «سىر سۋى» فيليالىنا جاڭا ارنايى تەحنيكالاردىڭ كىلتتەرىن تاپسىرۋ راسىمىنە قاتىستى. جالپى العاندا, فيليال 30 تەحنيكا الدى, ونىڭ ىشىندە ەكسكاۆاتور-تيەگىشتەر, شىنجىر تاباندى ەكسكاۆاتورلار, تراكتورلار, تىركەمەلەر, سۋ تاسىعىشتار, ساموسۆالدار, اۆتوكران, تارتقىش, اسپالى جابدىق, ديزەلدى گەنەراتور جانە ت.ب. بار. فيليالعا جالپى سانى 35 تەحنيكا ءبولىندى, ەندى قالعان 5 تەحنيكا بيىل قىركۇيەككە دەيىن جەتكىزىلەدى.
ەستەرىڭىزگە سالايىق, قازىرگى ۋاقىتتا «قازسۋشار» رمك فيليالدارىن بۇكىل ەل بويىنشا جاڭا جابدىقتارمەن جاراقتاندىرۋ جالعاسىپ جاتىر. بۇگىندە كاسىپورىن فيليالدارى جوسپارلانعان 757 ارنايى تەحنيكا مەن اۆتوكولىكتىڭ 439-ىن الدى.
ارال اۋدانىندا نۇرجان نۇرجىگىتوۆ «كوكارال بوگەتىن ساقتاۋ جانە سىرداريا وزەنىنىڭ اتىرابىن قالپىنا كەلتىرۋ» جوباسىنىڭ ىسكە اسىرىلۋ بارىسىمەن تانىستى. بۇگىنگى تاڭدا «تۇششى», «سارىتەرەڭ» جانە «قاراشالان-1» كانالدارىن مەحانيكالىق ادىسپەن تازالاۋ, سونداي-اق ء«تاۋىر» قورعانىس بوگەتىن قالپىنا كەلتىرۋ جۇمىستارى جۇرگىزىلدى. سونىمەن قاتار «كوكارال» جانە «اقشاۋىت» بوگەتتەرىن قالپىنا كەلتىرۋ جانە نىعايتۋ, سونداي-اق «قاراشالان-2» كانالىن تازارتۋ جالعاسىپ وتىر. جوعارىدا اتالعان ءتورت كانالدا باس قۇرىلىستاردىڭ قۇرىلىسى جۇرگىزىلىپ جاتىر. 2026 جىلدىڭ سوڭىنا دەيىن جۇمىستى تولىق اياقتاۋ جوسپاردا بار.
ءىرى ەكولوگيالىق جوبا ارال ماڭى ءوڭىرىنىڭ ەكولوگيالىق تەپە-تەڭدىگىن قالپىنا كەلتىرۋگە, سۋ رەسۋرستارىن ءتيىمدى پايدالانۋدى ارتتىرۋعا جانە ايماقتاعى حالىقتىڭ ءومىر ءسۇرۋ ساپاسىن جاقسارتۋعا باعىتتالعان. سۋ رەسۋرستارى جانە يرريگاتسيا ءمينيسترى بارلىق جوسپارلانعان جۇمىستىڭ ساپالى ءارى مەرزىمىندە ورىندالۋىن قامتاماسىز ەتۋدى تاپسىردى.
