فوتو: اشىق دەرەككوز
«بۇگىندە ديسپانسەرلىك ەسەپتە «الكوگولدىك تاۋەلدىلىك» دياگنوزىمەن, ەسىرتكىگە تاۋەلدى, سونداي-اق ويىنعا تاۋەلدىلىك بەلگىلەرى بار ازاماتتار از ەمەس. اتالعان تاۋەلدىلىكتەردەن ەمدەۋ جانە وڭالتۋ بويىنشا جۇمىستار نەگىزىنەن جەكە مەنشىك مەديتسينالىق جانە پسيحولوگيالىق ورتالىقتاردا جۇزەگە اسىرىلادى. الايدا ولاردىڭ قىزمەت قۇنى كوپشىلىككە قولجەتىمسىز. بۇل ءوز كەزەگىندە حالىقتىڭ اۋقىمدى بولىگىنە كومەك الۋ مۇمكىندىگىن شەكتەيدى», دەدى دەپۋتات.
دەپۋتاتتىڭ ايتۋىنشا, مەملەكەتتىك مەكەمەلەر كوبىنە تەك مەديكامەنتوزدى ەمدەۋمەن شەكتەلىپ, الەۋمەتتىك وڭالتۋدىڭ تولىققاندى جۇيەسىن ۇسىنبايدى. سونىمەن قاتار, تاۋەلدى ازاماتتارعا تەگىن نەمەسە سۋبسيديالانعان كومەك كورسەتۋ, قارجىلاندىرۋ مەحانيزمى مەن ەمدەۋ ستاندارتتارى ءالى كۇنگە دەيىن جۇيەلەنبەگەن.
«سينتەتيكالىق ەسىرتكىلەردى تۇتىنۋعا بايلانىستى كەي وڭىرلەردە قىلمىس دەڭگەيىنىڭ كۇرت ارتۋى دا – پروفيلاكتيكانىڭ, ەرتە دياگنوستيكالاۋ مەن وڭالتۋدىڭ بولماۋىنىڭ سالدارى. حالىقارالىق تاجىريبە كورسەتىپ وتىرعانداي, تاۋەلدىلىكپەن كۇرەس – تەك مەملەكەتتىك قاتىسۋ, ۆەدومستۆوارالىق ۇيلەستىرۋ جانە قىزمەتتەردىڭ قولجەتىمدىلىگى نەگىزىندە عانا ءتيىمدى بولادى», دەدى دەپۋتات.
مىسال رەتىندە تۇرلىحانوۆ قىتايداعى الەۋمەتتىك-تۇرمىستىق بەيىمدەۋدى قامتيتىن كوپدەڭگەيلى وڭالتۋ ورتالىقتارىن, ۇندىستانداعى ارنايى مەملەكەتتىك باعدارلامالاردى, بەلارۋستە تەگىن قىزمەت كورسەتەتىن ناركوديسپانسەرلەر جەلىسىن جانە رەسەيدەگى 2030 جىلعا دەيىنگى انتيناركوتيكالىق مەملەكەتتىك ساياساتتى اتاپ ءوتتى. سونىمەن قاتار, پورتۋگاليا مەن نيدەرلاندى سەكىلدى ەۋروپا ەلدەرىندە تاۋەلدىلىك مەديتسينالىق ماسەلە رەتىندە قاراستىرىلىپ, رەسوتسياليزاتسياعا باسىمدىق بەرىلەتىنىن مىسال ەتتى.
«وزبەكستان 2024–2028 جىلدارعا ارنالعان ۇلتتىق ستراتەگيا قابىلدادى, قىرعىزستاندا تاۋەلدىلىكتى ەمدەۋ العاشقى مەديتسينالىق كومەكتىڭ قۇرامداس بولىگىنە ەنگىزىلسە, تاجىكستان 2021–2030 جىلدارعا ارنالعان ۇلتتىق ستراتەگيا اياسىندا ۆەدومستۆوارالىق ۇيلەستىرۋدى قولعا الدى», دەدى دەپۋتات ورتالىق ازيا ەلدەرىندەگى احۋالعا توقتالىپ.
وسىعان بايلانىستى داۋلەت تۇرلىحانوۆ ۇكىمەت باسشىسىنا كەلەسى ۇسىنىستارىن جەتكىزدى:
- تاۋەلدى ازاماتتاردى وڭالتۋدىڭ ۇلتتىق باعدارلاماسىن ازىرلەۋ جانە بەكىتۋ, ونىڭ اياسىندا تەگىن نەمەسە سۋبسيديالانعان مەملەكەتتىك وڭالتۋ ورتالىقتارى جەلىسىن قۇرۋ;
- دەنساۋلىق ساقتاۋ, ىشكى ىستەر, عىلىم جانە جوعارى ءبىلىم, ەڭبەك جانە حالىقتى الەۋمەتتىك قورعاۋ, تۋريزم جانە سپورت مينيسترلىكتەرى مەن باسقا دا مۇددەلى ۇيىمداردىڭ قاتىسۋىمەن ۆەدومستۆوارالىق ۇيلەستىرۋ مەحانيزمىن ەنگىزۋ;
- ددۇ جانە دامىعان ەلدەردىڭ تاجىريبەسىن ەسكەرە وتىرىپ, تاۋەلدىلىكتەرگە شالدىققان ادامداردى دياگنوستيكالاۋ, ەمدەۋ جانە الەۋمەتتىك وڭالتۋ بويىنشا بىرىڭعاي ۇلتتىق ستاندارتتاردى ازىرلەۋ;
- رەسپۋبليكالىق بيۋدجەتتە تاۋەلدىلىكتىڭ الدىن الۋ مەن وڭالتۋعا, اقپاراتتىق-اعارتۋ ناۋقاندارىنا جانە ماماندار دايارلاۋعا باعىتتالعان ماقساتتى قارجىلاندىرۋدى كوزدەۋ.
«بۇل ۇسىنىستار ۇكىمەت دەڭگەيىندە كەشەندى تۇردە قابىلداناتىن بولسا, تاۋەلدىلىككە شالدىققان ادامداردى ەمدەۋ مەن وڭالتۋ بويىنشا تۇراقتى مەملەكەتتىك جۇيە قالىپتاسادى جانە ەلىمىزدىڭ ازاماتتارىنىڭ دەنساۋلىعى مەن ءال-اۋقاتىنا وڭ اسەرىن تيگىزەدى», دەدى دەپۋتات ءوز ساۋالىندا.
