فوتو: ۇكىمەتتىڭ ءباسپاسوز قىزمەتى
سالتاناتتى راسىمگە قاتىسقان قر پرەمەر-ءمينيسترى ولجاس بەكتەنوۆ بۇل باستامانى پرەزيدەنتتىڭ قوعامدىق قاۋىپسىزدىك پەن قۇقىقتىق ءتارتىپتى نىعايتۋ, سونداي-اق باسقارۋ جۇيەسىن جاڭعىرتۋ جونىندەگى ناقتى ساياساتىنىڭ ماڭىزدى ناتيجەسى ەكەنىن اتاپ ءوتتى.
قۇقىق قورعاۋ سالاسىنداعى رەفورمالار جۇيەلى تۇردە جۇزەگە اسىپ جاتىر. اتاپ ايتساق, ەسىرتكى قىلمىسىنا قارسى ءىس-قيمىل كوميتەتى قۇرىلدى, كيبەرقاۋىپتەرگە جانە تۇرمىستىق زورلىق-زومبىلىققا قارسى ءىس-قيمىل بويىنشا مامانداندىرىلعان بولىمشەلەر اشىلدى, تسيفرلى ينفراقۇرىلىم مەن تالدامالىق بازا نىعايتىلىپ جاتىر.
«اكادەميانىڭ قۇرىلۋى – مەملەكەت باسشىسى جاريالاعان قۇقىق قورعاۋ جۇيەسىنىڭ دامۋ جولىنداعى ەلەۋلى كەزەڭ. ءبىزدىڭ مىندەتىمىز – كادرلىق الەۋەتتى نىعايتۋ ارقىلى قۇقىقتىق ءتارتىپتى قامتاماسىز ەتۋدىڭ جاڭا مودەلىن ەنگىزۋ. ينستيتۋتسيونالدىق رەفورمالار قۇقىق قورعاۋ ورگاندارىنىڭ سەرۆيستىك مودەلىن دامىتۋعا ىقپالىن تيگىزەدى. پرەزيدەنت ۇسىنعان باسىم باعىت – ازاماتتاردىڭ قاۋىپسىزدىگى جانە “زاڭ جانە ءتارتىپ” قاعيداتىن قامتاماسىز ەتۋ», دەدى ولجاس بەكتەنوۆ.
اكادەميا زاماناۋي ءبىلىم بەرۋ تەحنولوگيالارىمەن جابدىقتالعان. جاڭا وقۋ ورنىندا تسيفرلى زەرتحانالار, «اقىلدى كوزىلدىرىك», جاساندى ينتەللەكتى قولداناتىن جۇيەلەر, روبوت تەحنيكاسى, پاترۋلدىك اۆتوكولىكتەردى باقىلاۋ پلاتفورمالارى مەن باسقا دا جاڭا شەشىمدەر ەنگىزىلگەن. ىشكى ىستەر ءمينيسترى ەرجان سادەنوۆ پرەمەر-مينيسترگە ۆەدومستۆوارالىق جوعارى اكادەميالىق كۋرس تىڭداۋشىلارىن سىناقتان وتكىزۋ ناتيجەلەرىن كورسەتتى.
وقىتۋ باعدارلاماسى باسقارۋ قۇزىرەتتەرىن دامىتۋعا, ستراتەگيالىق ويلاۋ مەن جاڭا تەحنولوگيالاردى مەڭگەرۋگە باعىتتالعان. اكادەميادا جىل سايىن 100-دەن استام باسقارۋ قىزمەتكەرلەرى جانە 30 ماگيستراتۋرا مەن دوكتورانتۋرا ستۋدەنتتەرى وقىتىلادى.
قازىرگى تاڭدا اكادەميا ءىىم اۋماقتىق بولىمشەلەرىنەن كەلگەن تىڭداۋشىلاردىڭ العاشقى لەگىن وقىتۋدى باستاعان. اشىلۋ راسىمىنە باس پروكۋراتۋرا, ۇقك, جوعارعى سوت كەڭەسى, مينيسترلىكتەر, اكىمدىكتەر, پارلامەنت دەپۋتاتتارى, حالىقارالىق ۇيىمدار, ساراپشىلار مەن شەتەلدىك دەلەگاتسيالار قاتىستى.
