فوتو: سۋ رەسۋرستارى جانە يرريگاتسيا مينيسترلىگى
زەرتتەۋ توبى بالقاش كولىنىڭ باسسەينىندەگى سۋ رەسۋرستارىنىڭ قازىرگى جاي-كۇيىن جان-جاقتى باعالاۋدى ماقسات ەتتى. سونىمەن قاتار نەگىزگى مىندەتتەردىڭ قاتارىنا جەرۇستى جانە جەراستى سۋلارىن باقىلاۋ, سۋارمالى ەگىنشىلىكتىڭ جاعدايىن تالداۋ, سونداي-اق وڭىرلىك سۋ بالانسىن مودەلدەۋ ءۇشىن ناقتى دەرەكتەر جيناۋ كىردى.
ەكسپەديتسيا قۇرامىندا فرانتسيانىڭ عىلىمي كونسورتسيۋم وكىلدەرى, قر سۋ رەسۋرستارى جانە يرريگاتسيا مينيسترلىگى, بالقاش-الاكول باسسەيندىك ينسپەكتسياسى, «قازگيدروگەولوگيا» رمك, ۋ.م. احمەدسافين اتىنداعى ينستيتۋت جانە «قازاقمىس كورپوراتسياسى» جشس ساراپشىلارى بولدى.
مينيسترلىكتىڭ حابارلاۋىنشا, ماماندار بوياۋلى, بەرەكە, باقاناس, باقباقتى جانە بىرلىك اۋىلدىق وكرۋگتەرىندەگى سۋارۋ ينفراقۇرىلىمىن تەكسەرىپ, اۋىل شارۋاشىلىعىن سۋمەن قامتۋ, كانالداردىڭ تەحنيكالىق جاعدايى مەن جاڭعىرتۋ قاجەتتىلىگىن زەردەلەدى. سۋ ۇنەمدەۋ تەحنولوگيالارىن ەنگىزۋ, سۋدى قايتا پايدالانۋ جانە جەراستى سۋلارىنىڭ دەڭگەيى دە نازاردان تىس قالمادى.
ەكسپەديتسيا اياسىندا قاپشاعاي سۋ قويماسى, ىلە وزەنىنىڭ تومەنگى اعىسى, سوربۇلاق كولى, مەليوراتسيالىق جانە ارتەزيان ۇڭعىمالارى زەرتتەلىپ, الماتىداعى عىلىمي-زەرتتەۋ ينستيتۋتتارىندا كەزدەسۋلەر وتكەن.
«زەرتتەۋ قورىتىندىسى بويىنشا مەملەكەتتىك ورگاندار مەن مۇددەلى تاراپتارعا ۇسىنىستار قامتىلعان تالدامالىق ەسەپ دايىندالادى. فرانتسۋز ساراپشىلارىمەن بىرلەسىپ ىسكە اسىرىلىپ جاتقان بۇل جوبا 2040 جىلعا دەيىنگى بولجاممەن بالقاش كولىن ساقتاۋ بويىنشا ماستەر-جوسپار ازىرلەۋگە باعىتتالعان. جۇرگىزىلىپ جاتقان زەرتتەۋلەر قازاقستان مەن فرانتسيا اراسىنداعى ەكولوگيا, سۋ پايدالانۋ جانە عىلىمي الماسۋ سالاسىنداعى ستراتەگيالىق ارىپتەستىكتى نىعايتۋعا باعىتتالعان ماڭىزدى قادام», دەدى قر سۋ رەسۋرستارى جانە يرريگاتسيا مينيسترلىگىنىڭ سۋ ساياساتى دەپارتامەنتى ديرەكتورىنىڭ ورىنباسارى مارات يماناليەۆ.
ايتا كەتەيىك, بىلتىر جەلتوقساندا قر سۋ رەسۋرستارى جانە يرريگاتسيا مينيسترلىگى, فرانتسيانىڭ دامۋ اگەنتتىگى (AFD) جانە گەولوگيالىق جانە تاۋ-كەن زەرتتەۋ بيۋروسى (BRGM) اراسىندا بالقاش كولىنىڭ باسسەينىن كەشەندى زەرتتەۋ جانە ونى قورعاۋعا باعىتتالعان ماستەر-جوسپار ازىرلەۋ جونىندە ۇشجاقتى كەلىسىمگە قول قويىلعان بولاتىن.
