كەزدەسۋ بارىسىندا قالا پروكۋرورى ءبىلىم گرانتىنىڭ تالاپتارى تۋرالى اڭگىمەلەپ, گرانتتى جەڭىپ العان وزات ءبىلىم الۋشىلارمەن سۇحبات قۇردى. جاستاردىڭ ايتۋىنشا بۇل ولاردى قاناتتاندىرىپ جىگەرلەندىرە ءتۇستى. پروكۋرور قۇقىق قورعاۋ سالاسىنداعى مول تاجىريبەسىمەن بولىسە وتىرىپ, بىلىمگە قۇشتار جاستاردىڭ ءارتۇرلى سۇراقتارىنا جان-جاقتى جاۋاپ بەردى.
ءوز كەزەگىندە جۇمابەك تاشەنەۆ اتىنداعى ۋنيۆەرسيتەتتىڭ باسقارما باسشىسى, قر ۇعا اكادەميگى, پەداگوگيكا عىلىمدارىنىڭ دوكتورى, پروفەسسور وڭالباي اياشەۆ وقۋ ورداسىنىڭ جاستارعا كورسەتىپ جاتقان الەۋمەتتىك قولداۋلارى مەن الداعى ستراتەگيالىق دامۋ جوسپارى تۋرالى باياندادى.
گەنەرال ع.مۇقانوۆ ءوز سوزىندە قالا اۋماعىندا قوعامدىق ءتارتىپتىڭ ساقتالۋىنا جاستاردىڭ دا ۇلەسى باسىم ەكەنىن اتاپ ءوتتى. سونىمەن قاتار ستۋدەنتتەردى پروكۋراتۋرا ورگاندارىندا وندىرىستىك ءىس-تاجىريبەدەن وتۋگە بار مۇمكىندىكتى قاراستىراتىنىن جەتكىزدى. سونداي-اق, ستۋدەنتتىك ومبۋدسمەن باستاعان جوو بەلسەندى جاستارىمەن بىرگە كەشەندى باعدارلامالىق جوبالاردى ىسكە اسىراتىنىن ايتتى.
كەزدەسۋ بارىسىندا ءسوز العان ۋنيۆەرسيتەتتىڭ الەۋمەتتىك-مادەني دامۋ جونىندەگى پرورەكتورى ۇلتتىق زاڭ اكادەمياسىنىڭ كوررەسپوندەنت مۇشەسى بيتۇرسىن عالىمجان: «مەملەكەت باسشىسى قاسىم-جومارت توقاەۆتىڭ «زاڭ مەن ءتارتىپ» يدەولوگياسى ءوزىن «قۇقىقتىق, دەموكراتيالىق, زايىرلى جانە الەۋمەتتىك مەملەكەت» دەپ تانىعان ەلىمىزدى جارقىن بولاشاققا باستايتىن اسا ماڭىزدى باستاما دەپ سانايمىز. ولاي دەيتىنىمىز, زاڭ تالاپتارى بارشاعا ورتاق, ءتارتىپ بولعان جەردە تارازى باسى تەڭەسەدى. ال زاڭ تالاپتارى بۇزىلىپ, تارتىپسىزدىك ورىن العان جاعدايدا ادامدار ازعىنداپ, قوعام قۇلدىرايدى. قوعامداعى ساياسي تۇراقتىلىق پەن ءتارتىپتىڭ ساقتالۋىنا بىردەن-ءبىر جاۋاپتى ءارى قۇزىرلى ورگان – قازاقستان رەسپۋبليكاسىنىڭ پروكۋراتۋراسى» دەدى.
كەزدەسۋ سوڭىندا قالا پروكۋرورى باستاعان اۋدان پروكۋرورلارى ۋنيۆەرسيتەت جاستارىنىڭ قولىمەن جاسالعان «جاساندى ينتەللەكت» الاڭىمەن جانە «كوۆوركينگ» ورتالىعىنىڭ جۇمىسىمەن تانىستى.
شىمكەنت
