اباي وبلىسى ماقانشى اۋدانىنداعى «دارابوز» جازعى ساۋىقتىرۋ-دەمالىس لاگەرى بالالاردىڭ العاشقى لەگىن قابىلدادى. وبلىستىق ءبىلىم باسقارماسىنىڭ مالىمەتىنشە, لاگەر جۇمىسى 6 ماۋسىم ء(ار ماۋسىم – 10 كۇن) وتەدى. ءار كەزەڭدە 120 بالا قابىلدانىپ, جاز بويى 720 وقۋشى ەلىمىزدىڭ تانىمال تۋريستىك ايماعى – الاكول جاعاسىندا دەمالادى. دەمالۋشىلاردىڭ قاتارىندا مەكتەپتە وقۋ جىلىن ۇزدىك اياقتاپ, بەلسەندىلىك تانىتقان اۋىلدىق جەرلەردەگى 250 وقۋشى بار.
«دارابوز» لاگەرىندە 5-8 سىنىپ وقۋشىلارىنىڭ (10-14 جاستاعى) جازعى دەمالىسىن مازمۇندى دا ماعىنالى وتۋىنە بار مۇمكىندىك قاراستىرىلعان. وقۋشىلار جەرگىلىكتى بيۋدجەت پەن «قازاقستان حالقىنا» قوعامدىق قورى ەسەبىنەن دەمالادى. بالالاردىڭ دەمالىسىن ۇيىمداستىرۋعا 10 پەداگوگ تارتىلعان. ولاردىڭ قاتارىندا اعا تالىمگەر, تاربيەشىلەر, دەنە شىنىقتىرۋ ءپانىنىڭ مۇعالىمى, جۇزۋدەن نۇسقاۋشى جانە مەدبيكە بار. ماماندار بالالارعا قىزىقتى, ويىن-ساۋىق جانە تاربيەلىك ءماندى باعدارلامالار ۇيىمداستىرۋمەن قاتار, قاۋىپسىزدىگىن دە قاداعالايدى. لاگەر اۋماعى سانيتارلىق-ەپيدەميالىق جانە ءورت قاۋىپسىزدىگى تالاپتارىنا تولىقتاي ساي كەلەدى.
دەمالىس باعدارلاماسىندا تاڭعى جاتتىعۋ, ءجۇزۋ, سپورتتىق جارىس, شىعارماشىلىق ۇيىرمەلەر مەن كلۋبتار (بي, قولونەر, سپورت, اقىندار ۇيىرمەسى), ەكسكۋرسيالار, زياتكەرلىك ويىندار, بي كەشتەرى, وزگە دە ءىس-شارالار بولماق. «دارابوز» لاگەرى بالالاردىڭ دەنساۋلىعىن نىعايتىپ, قاي سالادا دا قابىلەتىن دامىتۋعا كۇش سالادى.
بيىل اباي وبلىسىندا شامامەن 5000-عا جۋىق مەكتەپ وقۋشىسى قالا سىرتىنداعى لاگەرلەردە دەمالادى. بۇل تۋرالى وڭىرلىك كوممۋنيكاتسيالار قىزمەتى الاڭىندا وتكەن ءباسپاسوز ءماسليحاتىندا وبلىستىق ءبىلىم باسقارماسى تاربيە جۇمىسى جانە قوسىمشا ءبىلىم بەرۋ ءبولىمىنىڭ باسشىسى ساۋلە قوجەبەكوۆا باياندادى.
– جاز مەزگىلىندە وڭىردە بارلىعى 9 لاگەر تۇراقتى تۇردە جۇمىس ىستەيدى. ولاردىڭ قاتارىندا 8-ءى مەملەكەتتىك, 1-ەۋى جەكەمەنشىك. الەۋمەتتىك وسال ساناتتاعى 4713 بالا «ۆسەوبۋچ» قورىنىڭ ەسەبىنەن تەگىن جولدامامەن قامتىلادى, – دەيدى س.قوجابەكوۆا.
سونىمەن قاتار وبلىستاعى 128 وقۋشى رەسپۋبليكالىق «بالداۋرەن» جانە «بوبەك» لاگەرىنە بارادى. ال كەلەر جىلى كوكپەكتى اۋدانىنداعى «بالداۋرەن» لاگەرىن قالپىنا كەلتىرۋ جوسپارلانىپ وتىر.
اباي وبلىسى
