سەمەي قالاسىندا سالىناتىن وبلىستىق كوپسالالى اۋرۋحانانىڭ ىرگەتاسىن قالاۋ ءراسىمى ءوتتى. يگىلىكتى ءىس-شاراعا وبلىس اكىمى بەرىك ءۋالي, دەنساۋلىق ساقتاۋ سالاسىنىڭ ارداگەرلەرى, دارىگەرلەر قاتىستى.
اباي وبلىسىن دامىتۋدىڭ كەشەندى جوسپارىنا سايكەس بوي كوتەرەتىن, 300 توسەكتىك كوپسالالى اۋرۋحانادا ءبىر اۋىسىمدا 250 ادامدى قابىلدايتىن كەڭەس بەرۋ, تەكسەرۋ ءبولىمى جۇمىس ىستەمەك. وبلىس باسشىسى مەديتسينالىق نىساننىڭ ءوڭىر تۇرعىندارى ءۇشىن ماڭىزى زور ەكەنىن اتاپ ايتتى.
«اباي وبلىسى – ەرتەدەن دارىگەرلىك ءداستۇرى قالىپتاسقان ءوڭىر. ايماعىمىزدان شىققان بىلىكتى ماماندار قازاق مەديتسيناسىنىڭ نەگىزىن سالدى. سوڭعى شيرەك عاسىر يىنىندە بۇل سالا نازاردان تىس قالىپ, بىلىكتى مامانداردىڭ باسىم بولىگى باسقا وڭىرلەرگە قونىس اۋداردى. سوندىقتان بۇل اۋرۋحانانىڭ ىرگەتاسىن قالاۋ – سول ۇزىلگەن ءداستۇردى قايتا جالعاۋدىڭ نىشانى. مەردىگەر كومپانيا وكىلدەرى اتاپ وتكەندەي, اۋرۋحانا وزىق ۇلگىلى مەديتسينالىق تەحنولوگيالارمەن جابدىقتالادى. وبلىسىمىزدا وسى ۋاقىتقا دەيىن مۇنداي سان سالالى اۋرۋحانا بولعان ەمەس. ەندى سول ولقىلىقتىڭ ورنى تولادى», دەدى وبلىس اكىمى.
وبلىستا بۇگىندە 31 ستاتسيونارلىق مەديتسينالىق ۇيىم جۇمىس ىستەيدى, ونىڭ 20-ى مەملەكەتتىك, 11-ءى جەكەمەنشىك. ايماق كولەمىندە ءار 10 مىڭ تۇرعىنعا نەبارى 59 توسەكتىك ورىننان كەلەدى. بۇل – ەلىمىزدەگى ەڭ تومەنگى كورسەتكىشتەردىڭ ءبىرى. مامانداندىرىلعان مەديتسينالىق قىزمەتتىڭ 70%-ى سەمەي قالاسىندا شوعىرلانعان. قازىرگى ستاتسيونارلاردىڭ باسىم بولىگى ەسكى, ماتەريالدىق-تەحنيكالىق بازاسى توزعان. جەدەل مەديتسينالىق جاردەم اۋرۋحاناسى 300 توسەككە شاقتالعانىمەن, ءىس جۇزىندە 375 ناۋقاستى قابىلداپ وتىر. كارديولوگيا, ينسۋلت, گينەكولوگيا, توكسيكولوگيا, نەۆرولوگيا, تراۆماتولوگيا بولىمدەرىندە توسەكتىك ورىن تاپشى. جاڭا اۋرۋحانا وسى تاپشىلىقتى جويىپ, زامان, قوعام تالابىنا ساي مەديتسينالىق كومەك كورسەتۋدى قامتاماسىز ەتەدى. سونىمەن قاتار اۋىل تۇرعىندارىنا قاشىقتان كەڭەس بەرەتىن تەلەمەديتسينا ورتالىعى قۇرىلادى. مەديتسينالىق نىسان 2027 جىلى پايدالانۋعا بەرىلمەك.
اباي وبلىسى
