وڭىردە «جايلى مەكتەپ» ۇلتتىق جوباسى اياسىندا 12200 ورىنعا ارنالعان 9 بىردەي «جايلى مەكتەپ» پايدالانۋعا بەرىلدى. بۇل ءوز كەزەگىندە وڭىردەگى مەكتەپ تاپشىلىعى مەن ءۇش اۋىسىمدا وقىتۋ ماسەلەسىن تۇبەگەيلى شەشۋگە مۇمكىندىك بەردى. اتالعان 9 مەكتەپتىڭ 7-ەۋى تسەلينوگراد اۋدانىندا, ال قالعان ەكەۋى كوكشەتاۋ قالاسىندا بوي كوتەردى. وسىلايشا تسەلينوگراد اۋدانىندا وقۋشى ورنىنىڭ تاپشىلىعى سەگىز ەسەگە, ال كوكشەتاۋدا 1,5 ەسەگە قىسقاردى. جالپى اقمولا وبلىسى - ەلىمىز بويىنشا العاشقى بولىپ جوسپارلانعان مەكتەپ قۇرىلىسىن ۋاقىتىندا اياقتاعان وڭىرلەردىڭ ءبىرى.
–«جايلى مەكتەپ» - بۇل جاي عانا وقۋ ورنى ەمەس, بالالاردىڭ ساپالى ءبىلىم الۋى ءۇشىن بارلىق جاعداي جاسالعان زاماناۋي ءبىلىم بەرۋ كەشەنى, – دەيدى وبلىستىق ءبىلىم باسقارماسى باسشىسىنىڭ ورىنباسارى ۆالەري گامازوۆ, – سونداي-اق, مۇندا باستاۋىش, ورتا, جوعارى سىنىپتار ءۇشىن ارنايى جەكە بلوكتار قاراستىرىلعان. «جايلى مەكتەپ» بىرنەشە سپورت زالى, فيزيكا, حيميا, بيولوگيا پاندەرىنە ارنالعان زاماناۋي زەرتحانالار, STEM-زەرتحانالار, روبوتوتەحنيكا كابينەتتەرى قاراستىرىلعان. جالپى العاندا, «جايلى مەكتەپ» ۇلتتىق جوباسى وڭىرىمىزدە كوپتەگەن وقۋشى مەن پەداگوگيكالىق ۇجىم ءۇشىن زاماناۋي, جايلى, ساپالى ءبىلىم الۋعا مۇمكىندىك بەرەتىن ورتا قالىپتاستىردى.
كوكشەتاۋ قالاسىندا بوي كوتەرگەن №20 مەكتەپ-گيمنازيا «جايلى مەكتەپ» ۇلتتىق جوباسى اياسىندا سالىنعان زاماناۋي ءبىلىم بەرۋ كەشەنىنىڭ ءبىرى. 1500 ورىنعا ارنالعان جاڭا وقۋ ورداسى قاڭتاردا جۇمىسىن باستادى. وقۋشىلار تەك ءبىر اۋىسىمدا وقيدى. ال ەكىنشى اۋىسىمدا وقۋشىلار سپورتتىق سەكتسيالار, ءتۇرلى ۇيىرمەلەر, شىعارماشىلىق بايقاۋلار مەن ءىس-شارالارعا قاتىسا الادى.
–كەلەشەك مەكتەپتەرىنىڭ ەرەكشەلىگى, بۇل اركىمنىڭ قولى جەتەتىن, ەشقانداي ەمتيحانسىز قابىلداناتىن بارلىق وقۋشىلاردى قابىلداۋعا دايىن مەكتەپ, –دەيدى №20 مەكتەپ-گيمنازياسىنىڭ ديرەكتورى مانارگۇل توقان, –وسى عيماراتتىڭ ىشىندە 356 كابينەت جۇمىس جاساپ تۇر. ونىڭ ىشىنە لابوروتوريالار, وقۋ كابينەتتەرى, باسقا دا جۇمىس جاسايتىن قىزمەتكەرلەردىڭ ورنى جەكە-جەكە تاعايىندالعان. ەكىنشى جارتىجىلدىقتى بۇل مەكتەپتى 60 مۇعالىم اياقتادى. الداعى ۋاقىتتا وقۋشىلاردىڭ جيناۋىنا بايلانىستى تاعى دا مۇعالىمدەردىڭ سانى ارتادى دەپ كۇتىلىپ وتىر.
جالپى العاندا, وبلىس اۋماعىندا ءبىلىم بەرۋ ينفراقۇرىلىمىن جاڭعىرتۋ جۇمىستارى قارقىندى جۇرگىزىلىپ جاتىر. قازىر ءوڭىردىڭ تاعى بىرنەشە ەلدى مەكەنىندە جاڭا مەكتەپتەردىڭ قۇرىلىسى قولعا الىنعان. ماسەلەن, تسەلينوگراد اۋدانىنا قاراستى جاڭاجول جانە جارقايىڭ اۋدانىنىڭ ءبىرسۋات اۋىلىندا 80 ورىنعا شاقتالعان مەكتەپ سالىنۋدا. سونداي-اق, كوكشەتاۋدا 500 ورىندىق №10 مەكتەپ پەن ستەپنوگورسك قالاسىنا قاراستى بەستوبە كەنتىندە 300 ورىندىق ءبىلىم ورداسىنىڭ قۇرىلىسى ءجۇرىپ جاتىر. بارلىق مەكتەپ زاماناۋي قۇرال-جابدىقتارمەن قامتاماسىز ەتىلەدى.
اقمولا وبلىسى
