جۋىردا اۋىلدا «زاڭ جانە ءتارتىپ» اتتى كەزدەسۋ ءوتىپ, ەلدى مەكەن اۋماعىندا الكوگول ونىمدەرىن ساتۋدان ەرىكتى تۇردە باس تارتۋ تۋرالى باستاما كوتەرىلدى. بۇل ۇسىنىستى العاشقىلاردىڭ ءبىرى بولىپ اۋىل اقساقالدارى قولدادى. ولار: «قوعامنىڭ بەرەكەسىن كەتىرەتىن نارسەنىڭ بەتى اۋلاق بولسىن. اراق ىشكەن جەردە ءتارتىپ پەن تياناق بولمايدى» دەگەن بايلامدارىن ورتاعا سالىپ, جاستاردىڭ بولاشاعى ءۇشىن بۇل شەشىمنىڭ ماڭىزىن اتاپ ءوتتى.
كەزدەسۋ قورىتىندىسىندا اۋىل تۇرعىندارى ءبىراۋىزدان ىشىمدىكتى ساتۋ مەن تاراتۋدان باس تارتۋ جونىندەگى حاتتاماعا قول قويدى. وسىلايشا, دالاباي اۋىلى ىشىمدىكسىز اۋىلداردىڭ قاتارىن تولىقتىردى.
وبلىستىق پروكۋراتۋرا بۇل باستامانىڭ قۇقىق بۇزۋشىلىقتىڭ الدىن الۋ مەن قوعامدىق كەلىسىمدى نىعايتۋدا ۇلگى بولارلىق تاجىريبە ەكەنىن اتاپ ءوتتى.
«مۇنداي قادامدار ەلىمىزدىڭ وزگە دە وڭىرلەرىندە قولعا الىنىپ جاتىر. كەيبىر اۋىلداردا سوڭعى جىلدارى بىردە-ءبىر قىلمىستىق ءىس تىركەلمەگەن. بۇل حالىقتىڭ ءوزى زاڭ مەن تارتىپكە تىرەك بولا الاتىنىن كورسەتەدى», دەلىنگەن پروكۋراتۋرانىڭ رەسمي حابارلاماسىندا.
ايتا كەتۋ كەرەك, وسىعان دەيىن الماتى وبلىسى بالقاش اۋدانىنا قاراستى بوياۋلى اۋىلى دا وسىنداي شەشىم قابىلداپ, ىشىمدىكتەن مۇلدە باس تارتقان. قازىر ول اۋىلدا ءتارتىپ بۇزۋ وقيعالارى مەن قۇقىققا قايشى ارەكەتتەر جوقتىڭ قاسى.
