2025 جىلى الماتى قالاسىندا كوحلەارلى يمپلانت ورناتۋ وپەراتسيالارىنا 2,3 ملرد تەڭگە جۇمساۋ قاراستىرىلعان. بيىلعى العاشقى 5 ايدا قۇلاق مۇكىسىمەن تۋعان بالالارعا ءمامس شەڭبەرىندە وسىنداي 36 قىمبات وتا جاسالسا, وعان مەديتسينالىق ساقتاندىرۋ قورى 283 ملن تەڭگەدەن استام قارجى تولەپ وتىر.
مەديتسينالىق ساقتاندىرۋ قورى الماتى قالالىق فيليالىنىڭ ءباسپاسوز قىزمەتى حابارلاعانداي, 2024 جىلى كومەكتىڭ بۇل ءتۇرى 277 بالاعا كورسەتىلىپ, وعان جالپى 2,1 ملرد تەڭگە تولەنگەن. ءاربىر وتانىڭ قۇنى ورتا ەسەپپەن 8 ملن تەڭگەگە جەتىپ جىعىلادى.
مۇنداي وپەراتسيانى كىمدەر جاساتا الادى؟
«بۇل ەم-شارا IV دارەجەلى ەكى جاقتى كەرەڭدىككە شالدىققان, ەستۋ اپپاراتتارىنىڭ كومەگى تيمەيتىن بالالارعا جاسالادى. دياگنوز اسقىندىرماي انىقتالىپ, وتا بارىنشا ەرتە جاسالسا بالانىڭ تولىققاندى سويلەپ, الەۋمەتتىك ورتامەن ارالاسىپ كەتۋ مۇمكىندىگى دە جوعارىلاي تۇسەدى», دەيدى ماماندار.
انار مەن ءايليننىڭ وقيعاسى
مىسالى, انار اتتى كەلىنشەك پەن قىزى ءايليننىڭ باسىنان كەشكەن وقيعا زاماناۋي مەديتسينانىڭ ادام ءومىرىن قانشالىقتى وزگەرتە الاتىنىنىڭ ايقىن دالەلى. ايلينگە دارىگەرلەر كەرەڭدىكتىڭ اۋىر ءتۇرى دەگەن دياگنوز قويىپ, كوحلەارلى يمپلانت ورناتۋدى ۇسىنعان. وتا جاساتىپ, مەديتسينالىق قىزمەتتىڭ بارلىق دەڭگەيلەرىنەن ءوتۋ ءۇشىن بۇل وتباسى قاراعاندىدان الماتىعا قونىس اۋدارعان ەكەن. وڭتۇستىك استاناداعى №5 قالالىق كلينيكالىق اۋرۋحانا دارىگەرلەرىنىڭ كومەگىنە جۇگىنىپ, پورتال ارقىلى سالالىق كلينيكاعا جاتقىزىلعان.
«مەن اۋەلدە وسىنداي قىمبات وتانى تەگىن جاساتۋعا بولادى دەگەنگە سەنە قويعان جوقپىن. قازىر قىزىمنىڭ قۇلاعى ەستيدى, داۋىستاساڭ قارايدى, سويلەۋدى دە اقىرىنداپ ۇيرەنىپ جاتىر. بۇل ءبىزدىڭ وتباسىمىز ءۇشىن ۇلكەن باقىت», دەيدى انار.
وتا قايدا جاسالادى؟
قازىرگى تاڭدا الماتى قالاسىندا كوحلەارلى يمپلانتتى ەكى مەكەمە – №5 قالالىق كلينيكالىق اۋرۋحاناسى مەن «س.اسفەندياروۆ اتىنداعى قازاقۇمۋ» كەاق «اقساي» بالالار ورتالىعىندا ورناتا الادى. بۇل كلينيكالاردىڭ ەكەۋى دە ءتيىستى قوندىرعىلارمەن جابدىقتالىپ, كارديوحيرۋرگتەردەن باستاپ, لوگوپەد, اۋديولوگ سىندى ماماندارمەن قامتاماسىز ەتىلگەن.
وپەراتسيا جاساتۋ ءۇشىن نە ىستەۋ كەرەك؟
الدىمەن ەمحاناداعى ۋچاسكەلىك دارىگەرگە نەمەسە لور ماماننىڭ كەڭەسىنە جازىلۋ قاجەت. ەكىنشىدەن, اۋديومەتريا, كت, مرت سىندى زەرتتەۋلەردەن ءوتىپ, سۋردولوگ ماماننىڭ قورىتىندىسىن الۋ كەرەك. ۇشىنشىدەن, قۇجاتتاردى تولىق جيناپ بولعان سوڭ ەمحانا ماماندارى ناۋقاستى «اۋرۋحاناعا جاتقىزۋ بيۋروسى» پورتالىنا تىركەيدى. اۋرۋحانا دياگنوزدى راستاعاننان كەيىن پاتسيەنت ءوزى تاڭداعان كلينيكاعا اتتانادى. دياگنوستيكادان باستاپ مەديتسينالىق وڭالتۋعا دەيىنگى ارالىقتاعى قىزمەتتىڭ بارلىق تۇرلەرى ءمامس قاراجاتى ەسەبىنەن تولەنەدى.
«بۇرىن مۇگەدەك دەگەن اتقا تاڭىلىپ, قاتارىنان قالىپ قوياتىن بالالاردىڭ دامىپ, ەستىپ, سويلەپ, بالا-باقشا مەن مەكتەپكە بارىپ جۇرگەنىن كورىپ ءجۇرمىز. ەڭ باستىسى – اتا-انالار ۋاقىتتى تەككە وتكىزىپ الماي, دەر كەزىندە جولداما السا بولعانى. وپەراتسيادان كەيىن بالا ۇزاق مەرزىمدى وڭالتۋدان وتەدى. جوعارىداعى كلينيكالار دا وسى الماتى قالاسىندا ورنالاسقان», دەيدى الماتى قالاسىنىڭ شتاتتان تىس باس سۋردولوگى نايليا تولەپبەكوۆا.
