فوتو: triathlonorgkz
ەليتا ساناتى ءۇشىن ستاندارتتى وليمپيادالىق قاشىقتىق قولدانىلدى: 1500 م ءجۇزۋ, 40 كم ۆەلوجارىس جانە 10 كم جۇگىرۋ, ال جاسوسپىرىمدەر مەن قىزدار ءۇشىن – سپرينتەرلىك قاشىقتىق: 750 م ءجۇزۋ, 20 كم ۆەلوكەزەڭ جانە 5 كم جۇگىرۋ.
ەليتا, ەرلەر: قازاقستان اتىنان قاتىسقان دارىن قونىسباەۆ جەڭىمپاز اتاندى. ول بارلىق كەزەڭدە تۇراقتى ونەر كورسەتىپ, مارە سىزىعىندا قارقىندى فينيش جاساپ, ناتيجەسىندە — 1:46:28 ۋاقىت كورسەتكىشىمەن رومان مينەۆتى (رەسەي) جانە تيل كرامپتى (گەرمانيا) باسىپ وزدى. ەكىنشى جانە ءۇشىنشى ورىنداردى تيىسىنشە وسى سپورتشىلار يەلەندى.
ءجاسوسپىرىم قىزدار: التىن مەدالدى وتانداسىمىز ديانا ەرجانوۆا جەڭىپ الدى – 1:08:20. كۇمىس – ديانا بيكتيميروۆا (وزبەكستان), ال قولا مەدال – انەل يساباەۆاعا (قازاقستان) بۇيىردى. ول 1:10:54 ناتيجەسىمەن مارە سىزىعىن كەسىپ, سوڭعى جۇگىرۋ كەزەڭىندە تاباندىلىق پەن توزىمدىلىك تانىتتى.
ءجاسوسپىرىم ەرلەر: قازاقستان سپورتشىلارى تولىق پوديۋمدى يەلەندى:
ەلمۇرات قاناي – 59:57 (التىن), يليا كرۋپياكوۆ – 1:00:05 (كۇمىس), رامازان اينەگوۆ – 1:00:21 (قولا).
بۇل كوماندالىق جەتىستىك ەلدەگى جاس ترياتلەتتەر مەكتەبىنىڭ جۇيەلى جانە ساپالى دايىندىعىن كورسەتەدى.
15 ماۋسىمدا وتكەن اۋەسقويلار جارىسىنا قازاقستاننىڭ تۇكپىر-تۇكپىرىنەن 150-دەن استام قاتىسۋشى جينالدى. فەدەراتسيا ۆيتسە-پرەزيدەنتى قايىرگەلدى جاندوس:
«بۋرابايداعى جارىس World Triathlon كۇنتىزبەسىندەگى ماڭىزدى كەزەڭگە اينالدى. كولدەر مەن قاراعايلى ورماندار اياسىنداعى كوركەم مارشرۋتتار سپورتشىلار ءۇشىن ەرەكشە جاعداي جاسادى. اۋا رايىنىڭ قۇبىلمالى بولۋىنا قاراماستان, جارىس شىنايى سپورت مەرەكەسىنە اينالىپ, كاسىبي جانە اۋەسقوي سپورتشىلاردى بىرىكتىردى», دەدى.
بۋرابايداعى جارىس – قازاقستان ترياتلون سپورتى ءۇشىن ۇلكەن جەتىستىك. ءارتۇرلى جاس ساناتتارى مەن قاشىقتىقتاردا قول جەتكىزىلگەن جەڭىستەر – ەلىمىزدەگى سپورت دامۋىنىڭ جوعارى دەڭگەيىن دالەلدەيدى. تۋرنير جوعارى ۇيىمداستىرۋ دەڭگەيىندە ءوتتى جانە ول سپورتتىق دوستىق پەن حالىقارالىق ىنتىماقتاستىقتىڭ نىشانى بولدى.
ايتا كەتەلىك, جارىستىڭ باس دەمەۋشىسى «ERG كومەك» كورپوراتيۆتىك قورى, ال ۇيىمداستىرۋشىلارى: تۋريزم جانە سپورت مينيسترلىگىنە قاراستى سپورت جانە دەنە شىنىقتىرۋ ىستەرى كوميتەتى, «سپورتتى دامىتۋ ديرەكتسياسى» رمك, «قازاقستان ترياتلون فەدەراتسياسى» قب, اقمولا وبلىستىق ترياتلون فەدەراتسياسى.
