سۋرەتتى تۇسىرگەن – ەسەنجول يسابەك
مەرەكەنىڭ شىمىلدىعىن قازاقتىڭ ۇلتتىق «قوسباسار» بيىمەن «ايگولەك» بي ءانسامبلى اشتى. كەيىن س.دونەنتاەۆ اتىنداعى مادەنيەت سارايىنىڭ ۇيىمداستىرۋىمەن جەرگىلىكتى ونەرپازدار مەن «اسىل مۇرا-اقسۋ» قوعامدىق بىرلەستىگى, «قازاق انالارى – داستۇرگە جول» رەسپۋبليكالىق قوعامدىق بىرلەستىگىنىڭ اجەلەرى تەاترلاندىرىلعان قىمىزمۇرىندىقتىڭ كورىنىسىن كورسەتتى.
مەرەكەگە اقسۋ قالاسىنا قاراستى التى اۋىلدىق وكرۋگىنىڭ بەلسەندى, شەبەر, ونەرپاز تۇرعىندارى اتسالىسىپ, قوناقتارعا قازاق سالت-ءداستۇرىنىڭ اتموسفەراسىن سىيلادى.
– ءار اۋىل 20 ليتر قىمىز بەن باۋىرساق اكەلدى. قالا تاراپىنان 40 ليتر قىمىز دايىندالىپ, 30 كيلو باۋىرساق ءپىسىرىلدى. پايدالى ءارى ەمدىك قاسيەتى بار سۋسىن مەن ىستىق باۋىرساقتار تۇرعىندارعا تاراتىلدى. بىراق ەڭ باستى ماقسات – قارىن تويدىرۋ ەمەس, جاڭعىرتىلعان ءداستۇردى كورسەتۋ بولدى, – دەيدى اقسۋ قالاسىنىڭ مادەنيەت جانە تىلدەردى دامىتۋ ءبولىمىنىڭ باسشىسى مەدعات ماناپوۆ.
بيە ءسۇتىنىڭ ادام اعزاسىنا اسا پايدالى ەكەنى ءمالىم. دارۋمەنگە باي قىمىزدىڭ ازىرلەنۋ جولدارى دا ءارتۇرلى. اسىرەسە ارقانىڭ بال تاتىعان قىمىزىن ىستىقتا ءشولىڭدى قاندىرىپ ىشكەنگە نە جەتسىن! ءبىر قىزىعى, بۇگىندە ەرتىس-بايان ءوڭىرىن مەكەن ەتكەن ءارتۇرلى ۇلت وكىلدەرى ءۇشىن قىمىز دوستىق سۋسىنىنا اينالعانداي. ونىڭ قاسيەتىن, پايداسىن ولار جوعارى باعالايدى. جازدىڭ العاشقى كۇندەرىندە وتەتىن قىمىزمۇرىندىقتى اسىعا كۇتىپ, ارقا-جارقا بولىپ قالاتىنى دا سودان.
– قىمىزمۇرىندىق دەگەنىمىز – مامىردىڭ اياعى, ماۋسىمنىڭ باس جاعىندا جاسىل ءشوپ ءوسىپ كەلە جاتقاندا بيەلەردى بايلاپ, العاشقى قىمىز ءىشۋدىڭ ءراسىمى. بيە ءسۇتى – دەنساۋلىققا ەڭ قاجەتتى, كەرەك دارۋمەن. قىمىزدىڭ ءتۇر-ءتۇرى بار. اششى قىمىز دەپ 4-5 كۇن تۇرىپ قالعان قىمىزدى ايتادى. ال بال قىمىزعا ءتاتتى زاتتار قوسادى, – دەيدى «قازاق انالارى – داستۇرگە جول» رەسپۋبليكالىق قوعامدىق بىرلەستىگىنىڭ اقسۋداعى توراعاسى ءشامشيا قۇسايىنوۆا.
پاۆلودار وبلىسى,
اقسۋ قالاسى
