قىزدار ينستيتۋتىنداعى كىتاپحانا 1945 جىلى قۇرىلىپ, العاشقى مەڭگەرۋشىسى قاليلا يسماگۋلوۆا بولدى. العاشقى كىتاپ قورى نەبارى 3190 دانادان تۇرسا, ونىڭ دەنى وقىتۋشىلار مەن قىزمەتكەرلەردىڭ جەكە كىتاپتارىنان قۇرالعان. تۇڭعىش رەكتور تۇرسىن مىرزابەكوۆانىڭ ماسكەۋ مەن لەنينگراد قالالارىنان اكەلگەن قۇندى ەڭبەكتەرى كىتاپحانانىڭ قورىن بايىتتى. كەيىنىرەك, 1980 جىلدارى رەكتور ءجاميلا ەلەمەسوۆا مەن كىتاپحانا ديرەكتورى راۋشان ايتيەۆا جاڭا كىتاپحانانىڭ ىرگەسىن قالاپ, 1985 جىلى جاڭا عيمارات پايدالانۋعا بەرىلدى. بۇل كەزەڭدە قازكسر مەمجوسپار توراعاسى مۇحامەد-راحيموۆ كىتاپحانا قۇرىلىسىنا جەكە باقىلاۋ جاساعانىن اتاپ وتكەن ءجون.
40 جىلعا جۋىق قىزدار ينستيتۋتىندا ەڭبەك ەتكەن سەرالى قاني ۇلى قانيەۆ – تەك ءبىلىم مەن عىلىمعا عانا ەمەس, ىزگىلىك پەن پاراساتتىلىققا نەگىزدەلگەن ۇلاعات يەسى. عىلىم مەن پەداگوگيكانى ۇشتاستىرا وتىرىپ, سان مىڭداعان شاكىرت تاربيەلەگەن ول – قازاق سسر اعارتۋ ءىسىنىڭ ۇزدىگى, كسرو جوعارى مەكتەبىنىڭ ۇزدىگى اتانعان. سەرالى قاني ۇلى – ەسەپتەردى بىرىكتىرىپ شەشۋدىڭ وزىندىك امالدارىن اشىپ, وقىتۋدا جاڭاشىل ادىستەردى ۇسىنعان عالىم. ونىڭ تاعىلىمدى جولى – بۇگىنگى جاسقا باعىت, ەرتەڭگىگە مۇرا.
جاڭعىرتىلعان كىتاپحانا زاماناۋي تالاپتارعا ساي قايتا جابدىقتالدى. بۇل اۋقىمدى جوبا بەلگىلى كاسىپكەر, ءبىلىم مەن مادەنيەت جاناشىرى بەرىك قانيەۆتىڭ قولداۋىمەن جۇزەگە اسىرىلدى. جوباعا حالىقارالىق ديزاينەرلەر مەن ساۋلەتشىلەر تارتىلىپ, كىتاپحانا كەڭىستىگى جاڭا مازمۇنمەن تولىقتى جانە وعان ... ملن ينۆەستيتسيا قۇيىلدى. بۇل – ينۆەستيتسيا عانا ەمەس, بولاشاققا سالىنعان رۋحاني كاپيتال.
كىتاپحانانىڭ ءبىرىنشى قاباتىندا ستۋدەنتتەر مەن وقىتۋشىلار ءۇشىن قولايلى, كوپفۋنكتسيالى ايماقتار ۇيىمداستىرىلعان. اتاپ ايتقاندا, اكادەميالىق جازىلىم ورتالىعى, 72 ورىندىق كونفەرەنتس-زال (سينحروندىق اۋدارما كابيناسىمەن), Mosaic كافەسى, توپتىق جانە جەكە جۇمىس كابينالارى, زاماناۋي كومپيۋتەرلىك سىنىپ, دەمالىس بولمەسى, بالالارعا ارنالعان ويىن الاڭى, انا مەن بالا بولمەسى, ينكليۋزيۆتى سانيتارلىق توراپتار.
كىتاپحانا كەڭىستىگى LCC (Library of Congress Classification) جۇيەسى بويىنشا جابدىقتالىپ, اشىق قور ءپرينتسيپى ەنگىزىلگەن. ستۋدەنتتەر مەن وقىتۋشىلار كىتاپتاردى ءوز بەتىنشە تاڭداپ, زاماناۋي ەلەكتروندى رەسۋرستارعا ەركىن قول جەتكىزە الادى.
كىتاپحانا جانىنداعى اكادەميالىق جازىلىم ورتالىعى ستۋدەنتتەردىڭ جازۋ داعدىسىن جەتىلدىرۋمەن قاتار, جاريالانىم مادەنيەتىن, اكادەميالىق ادالدىق پرينتسيپتەرىن قالىپتاستىرۋعا باعىتتالعان. سونىمەن قاتار مۇندا soft skills داعدىلارىن دامىتۋعا ارنالعان ترەنينگتەر مەن ۆوركشوپتار وتەدى.
ۋنيۆەرسيتەت اۋماعىنان تابىلعان, 1970 جىلدارى مولداحمەت كەنباەۆ پەن نيكولاي تسيۆچينسكي سالعان موزايكالىق پاننو دا 2024 جىلى قايتا قالپىنا كەلتىرىلىپ, كىتاپحانا ماڭىنا ورناتىلدى. بۇل – وتكەنگە تاعزىم, بولاشاققا باعدار.
سەرالى قانيەۆ اتىنداعى عىلىمي كىتاپحانا – تەك اقپارات كوزى ەمەس, ول – ىزدەنىستىڭ, زەرتتەۋدىڭ, دامۋدىڭ ورداسى. بۇل جاڭارتىلعان كەڭىستىك ۋنيۆەرسيتەتىمىزدىڭ زاماناۋي ءبىلىم بەرۋ ۇردىستەرىنە بەيىمدەلۋىنىڭ, ساپالى كادر دايارلاۋ جولىنداعى جاڭا قادامىنىڭ ناقتى ايعاعى.
گۇلميرا قاناي, قازاق ۇلتتىق قىزدار
پەداگوگيكالىق ۋنيۆەرسيتەتىنىڭ باسقارما توراعاسى – رەكتورى
