س.اسفەندياروۆ اتىنداعى قازۇمۋ, كارديولوگيا جانە ىشكى اۋرۋلار عزي, قر كارديولوگتار قاۋىمداستىعى, قازاقستان جۇرەك قىزمەتىنىڭ جەتكىلىكسىزدىگى جانە اتەروسكلەروز ماماندارىنىڭ قوعامدارى, تۇركىستان وبلىسىنىڭ اكىمدىگى ۇيىمداستىرعان حالىقارالىق جيىن جۇرەك-قان تامىرلارى اۋرۋلارىن دياگنوستيكالاۋ, ەمدەۋ, الدىن الۋلا وتاندىق جانە شەتەلدىك كارديولوگيا ماماندارىن بىرىكتىرىپ, ءبىلىمىن كوتەرۋدى, ءوزارا ارەكەتتەسۋ, تاجىريبە الماسىپ كارديولوگيا سالاسىنداعى يننوۆاتسيالاردى جاريالاۋدى كوزدەيدى.
وسىناۋ وقيعا قازاقستان, تۇركيا, وزبەكستان, قىرعىزستان, ازەربايجان, تۇرىكمەنستان, رەسەي, بەلارۋس, گەرمانيا, يتاليا, پورتۋگاليا مەن اۆستراليا مەملەكەتتەرىنىڭ جۇزدەن استام كورنەكتى ماماندارىن - جەتەكشى كارديولوگيالىق مەكتەپتەر مەن عىلىمي ورتالىقتاردىڭ وكىلدەرىن بىرىكتىردى.
بۇگىن جالعاسىن تاۋىپ وتىرعان فورۋم باعدارلاماسى ارتەريالىق گيپەرتەنزيادان باستاپ كارديوگەنەتيكاداعى جانە جاساندى ينتەللەكتتى قولدانۋداعى جاڭا تاسىلدەرگە دەيىنگى وزەكتى تاقىرىپتاردى قامتيدى.
قۇرىلتاي دەلەگاتتارى مەن قوناقتارىنا قۇتتىقتاۋ سوزىندە كارديولوگيا جانە ىشكى اۋرۋلار عزي باسقارما توراعاسى مارات پاشيموۆ:
«وڭىرلەرىمىز ءۇشىن ماڭىزدى ماسەلەلەرگە جانە تۇركى مەملەكەتتەرىنىڭ كارديولوگيالىق باعىتتاعى ماماندارى اراسىنداعى ىنتىماقتاستىقتى نىعايتۋعا ەرەكشە نازار اۋدارىلدى. ويتكەنى, جۇرەك-قان تامىرلارى اۋرۋلارى ءبىزدىڭ ەلدەرىمىزدەگى جالپى ءولىم-ءجىتىم مەن سىرقاتتانۋشىلىقتىڭ نەگىزگى سەبەبى بولىپ وتىر جانە ءبىزدىڭ بىرلەسكەن مىندەتىمىز - وسى سىناقپەن كۇرەسۋدىڭ ءتيىمدى جولدارىن تابۋ بولعاندىقتان, ينستيتۋتىمىزدىڭ عالىمدارى مەن پراكتيكالىق دارىگەرلەرى بەلسەندى تۇردە كونگرەسس جۇمىسىنا قاتىسۋدا. كىاعزي قازاقستاننىڭ كارديولوگيالىق, كارديوحيرۋرگيالىق جانە تەراپيالىق قىزمەتتەرىنىڭ فلاگمانى بولىپ قالۋدا, وندا ەلىمىزدىڭ بارلىق وڭىرلەرىنەن كەلەتىن جۇرەك جانە باسقا دا ىشكى ورگانداردىڭ اۋىر جانە دياگنوستيكالاۋدا كۇردەلى اۋرۋلارى بار پاتسيەنتتەرگە ەڭ زاماناۋي مەديتسينالىق كومەكتىڭ بارلىق تۇرلەرى جۇزەگە اسىرىلۋدا. تاجىريبە الماسۋ, عىلىمي ديالوگ جانە دوستىق بايلانىستار ءبىزدىڭ پاتسيەنتتەرىمىزدىڭ دەنساۋلىعىن جاقسارتۋعا ىقپال ەتەتىنىنە سەنىمدىمىن, دەدى.
قازاقستان كارديولوگتارى قاۋىمداستىعىنىڭ پرەزيدەنتى ءسالىم بەركىنباەۆ:
«مۇنداي كەزدەسۋلەر وزىق عىلىمي دەرەكتەر مەن كلينيكالىق تاجىريبەمەن الماسۋ, جۇرەك-قان تامىرلارى اۋرۋلارىمەن كۇرەستە ودان ءارى ىلگەرىلەۋ ءۇشىن نەگىز بولا الاتىن جاڭا كاسىبي بايلانىستار, بىرلەسكەن جوبالار مەن باستامالار ورناتۋ ءۇشىن مۇمكىندىكتەر بەرەتىنىنە سەنىمدىمىز», دەدى.
ەكى كۇن ىشىندە قۇرىلتاي وتىرىستارى, اتەروسكلەروز جانە ديسليپوپروتەينەميا, جۇرەك قىزمەتى جەتكىلىكسىزدىگى, اريتميا, جەدەل كورونارلىق سيندروم مەن ميوكاردتىڭ قۇرىلىمدىق اۋرۋلارىن ەندوۆاسكۋليارلىق ەمدەۋ, كارديوونكولوگيا, بالالار كارديولوگياسى جانە ەحوكگ بويىنشا سەسسيالار وتۋدە.
سونىمەن بىرگە جاس عالىمداردىڭ ءداستۇرلى بايقاۋى ءوتىپ, قازاقستاندىق جوعارى وقۋ ورىندارى مەن ورتالىقتاردىڭ رەزيدەنت - كارديولوگتارى اراسىندا بايقاۋى مارەگە جەتتى.
كارديولوگيا جانە ىشكى اۋرۋلار عزي باسقارما توراعاسى مارات پاشيموۆ كارديولوگيا جانە كارديوحيرۋرگيا سالاسىنداعى قىزمەتى ءۇشىن قازاقستان كارديولوگتار قاۋىمداستىعىنىڭ «اق جۇرەك» سىيلىعىنا يە بولدى.
