فوتو: اشىق دەرەككوز
سوت كۇزەتشىنى قىلمىستىق كودەكستىڭ 252-بابىنىڭ 1-بولىگى — لاۋازىمدىق وكىلەتتىگىن اسىرا پايدالانۋ بابى بويىنشا كىنالى دەپ تانىدى. ۇكىمگە سايكەس, ول جىل سايىن 100 ساعاتتىق قوعامدىق جۇمىسقا تارتىلىپ, ەكى جىل بويى كۇزەت سالاسىندا جۇمىس ىستەۋ قۇقىعىنان ايىرىلدى.
2024 جىلدىڭ 11 قاراشاسىندا شىمكەنتتەگى قوناقۇيلەردىڭ بىرىنەن ماس ادامنىڭ قىزمەتكەرلەرگە كەدەرگى كەلتىرىپ جاتقانى تۋرالى قوڭىراۋ تۇسكەن. وقيعا ورنىنا كەلگەن كۇزەتشىلەردىڭ ءبىرى ەر ادامدى سىرتقا شىعارماق بولادى. كۇزەتشىنىڭ ايتۋىنشا, جابىرلەنۋشى ونى بالاعاتتاعان.
سوت ماتەريالدارىنا سايكەس, كۇزەتشى ماس ادامدى عيمارات سىرتىنا شىعارىپ, كۋاگەرسىز جەردە ۇرىپ-سوققان. زارداپ شەككەن ازامات العاشىندا ەسىن جيعانىمەن, كەيىن ۇيىندە ەسىنەن تانىپ, جەدەل جاردەممەن رەانيماتسياعا جەتكىزىلگەن.
مەديتسينالىق قورىتىندىعا ساي, جابىرلەنۋشى جابىق باس سۇيەك-مي جاراقاتىن, ميدىڭ كوگەرۋىن, قابىرعالاردىڭ سىنۋىن, وكپەنىڭ زاقىمدانۋىن جانە كوپتەگەن دەنە كوگەرۋلەرىن العان.
كۇزەتشى سوتتا كىناسىن مويىنداۋدان باس تارتتى. الايدا ول دا, قورعاۋشى تاراپ تا ۇكىمگە اپەللياتسيالىق شاعىم تۇسىرمەگەن.
جانەل تولەۋبەكوۆا, ەۇۋ ستۋدەنتى
