سۋرەت: brak-zakon.kz
ادىلەت مينيسترلىگىنىڭ ماجبۇرلەپ ورىنداتۋ كوميتەتى اتقارۋشىلىق قۇجاتتاردىڭ ورىندالۋىن قامتاماسىز ەتۋ سالاسىنداعى مەملەكەتتىك ساياساتتى ىسكە اسىرۋدى جانە وسى سالاداعى قىزمەتتى مەملەكەتتىك رەتتەۋدى جۇزەگە اسىرادى. بيىلعى I توقساندا سوت ورىنداۋشىلارى 5,9 ملن قۇجاتتى قاراعان. ونىڭ ىشىندە تولىق كولەمدە ورىندالعاندارى – 489 مىڭ. ناتيجەسىندە, مەملەكەت كىرىسىنە 10,6 ملرد تەڭگە وندىرىلگەن.
– الەۋمەتتىك ماڭىزدى ساناتتاردىڭ ءبىرى سانالاتىن اليمەنت ءوندىرىپ الۋ بويىنشا 285 مىڭ قۇجات تىركەلدى. ولاردىڭ ىشىندە 278 مىڭعا جۋىق قۇجات مەرزىمىندە ءوندىرىپ الىنىپ جاتىر. ياعني اليمەنت بورىشكەردىڭ جۇمىس ورنىنان اي سايىنعى جالاقىسىنان ۇستالادى. 2025 جىلى اليمەنت بويىنشا ءوندىرىپ الىنعان بەرەشەك سوماسى 1,6 ملرد تەڭگەدەن اسادى, – دەدى م.بالابەكوۆ.
سپيكەردىڭ ايتۋىنشا, قازىر ەلىمىزدە اليمەنت تولەۋدەن جالتارىپ جۇرگەندەر سانى 15 مىڭدى قۇرايدى. ولاردىڭ بەرەشەگى شامامەن 19 ملرد تەڭگەگە جەتكەن. وسى ورايدا سوت ورىنداۋشىلارى ىشكى ىستەر ورگاندارىمەن بىرلەسە وتىرىپ, بورىشكەرلەردىڭ اۆتوكولىكتەرىن ارنايى ايىپپۇل تۇراعىنا قاماۋ بويىنشا رەيدتىك ءىس-شارالار جۇرگىزەدى. ءارى قاراي بەرەشەكتى ءوندىرىپ الۋ ءۇشىن م ۇلىكتى وتكىزەدى.
قازىرگى تاڭدا جەكە سوت ورىنداۋشىلارى بورىشكەردىڭ تابىسىن قاساقانا جاسىرۋىن بولدىرماۋ ماقساتىندا ولاردىڭ ەلەكتروندىق اقشالارى مەن جاسىرىن كىرىستەرىن انىقتاۋعا باعىتتالعان جۇمىستاردى قارقىندى جۇرگىزىپ جاتىر. بورىشكەرلەرگە قاتىستى قولدانىلاتىن شارالاردىڭ ەڭ سوڭعىسى – ولاردى اكىمشىلىك جانە قىلمىستىق جاۋاپكەرشىلىككە تارتۋ. بيىل 1 596 بورىشكەر اكىمشىلىك جاۋاپكەرشىلىك ارقالادى.
