ۆەدومستۆونىڭ رەسمي وكىلى شىڭعىس الەكەشەۆتىڭ ايتۋىنشا, سوڭعى ۋاقىتتا كەيبىر ازاماتتار تاراپىنان ماس كۇيىندە كولىك جۇرگىزگەنى ءۇشىن بەلگىلەنگەن جازانى جويۋ نەمەسە جەڭىلدەتۋ تۋرالى تالاپتار ءتۇسىپ جاتىر. مينيسترلىك بۇل تالاپتاردى ورىنسىز دەپ سانايدى جانە قولدانىستاعى ءتارتىپتى وزگەرتۋدى قۇپتامايدى.
«اكىمشىلىك قۇقىقبۇزۋشىلىق تۋرالى كودەكستىڭ 608-بابىندا كوزدەلگەن جازا 2020 جىلى بەكىتىلدى. بۇل شەشىم جول قاۋىپسىزدىگىن قامتاماسىز ەتۋ ماقساتىندا قابىلدانعان. اتالعان نورمالار – قوعام قاۋىپسىزدىگىن قورعاۋعا باعىتتالعان شارالار», دەدى دەپارتامەنت باستىعى.
مينيسترلىكتىڭ مالىمەتىنشە, سوڭعى بەس جىلدا ەلىمىزدە ماس جۇرگىزۋشىلەردىڭ قاتىسۋىمەن 2 500-دەن استام جول-كولىك وقيعاسى تىركەلگەن. 460-تان استام ادام قازا تاۋىپ, 3 300-دەن استام ازامات ءارتۇرلى دارەجەدەگى جاراقات العان. مۇنداي فاكتىلەردىڭ ءبىرى الماتى قالاسىندا ورىن العان. ماس كۇيدەگى جۇرگىزۋشى جول جوندەۋ جۇمىسىنا تارتىلعان ءۇش جۇمىسشىنى قاعىپ كەتىپ, سونىڭ ەكەۋى وقيعا ورنىندا كوز جۇمعان.
ءىىم وكىلى ماس كۇيىندە كولىك باسقارۋ تەك اكىمشىلىك قۇقىقبۇزۋشىلىق ەمەس, ول ادام ومىرىنە قاۋىپ توندىرەتىن ارەكەت ەكەنىن اتاپ ءوتتى. سوندىقتان مۇنداي قۇقىقبۇزۋشىلىقتارعا قاتىستى قولدانىلاتىن جازالار قوعامدىق قاۋىپسىزدىك تۇرعىسىنان ماڭىزدى.
مينيسترلىكتىڭ دەرەگىنشە, اۆتوكولىك سانى ارتقانىنا قاراماستان, ماس كۇيىندە ۇستالعان جۇرگىزۋشىلەر سانى ازايۋ ۇردىسىندە. بۇل قابىلدانعان شارالاردىڭ تيىمدىلىگىن كورسەتەدى. ءىىم وكىلى مۇنداي شەكتەۋلەر مەن جازالار قۇقىقبۇزۋشىلىقتىڭ الدىن الۋعا باعىتتالعانىن اتاپ ءوتتى.
باسقا ەلدەردىڭ تاجىريبەسىنە سايكەس, كەيبىر مەملەكەتتەردە مۇنداي ارەكەتتەر ءۇشىن جازا بۇدان دا قاتاڭ – مىسالى, جۇرگىزۋشى كۋالىگىن ءومىر بويىنا الىپ قويۋ نەمەسە كولىكتى تاركىلەۋ قاراستىرىلعان.
وسىعان وراي, ىشكى ىستەر مينيسترلىگى اكىمشىلىك جاۋاپكەرشىلىكتى جەڭىلدەتۋ تۋرالى ۇسىنىستاردى قاراستىرۋ ورىنسىز دەپ ەسەپتەيدى جانە زاڭ تالاپتارىنىڭ ساقتالۋىن قامتاماسىز ەتۋدى جالعاستىرا بەرمەك.
