ەندى قايتالانۋى نەعايبىل بولسا دا, وتاندىق دارىگەرلەردىڭ بىلىكتىلىگىن سىناققا سالعان وسىناۋ وقيعانى ءبىز اراعا ۋاقىت سالىپ بارىپ بايانداپ وتىرۋىمىزدىڭ وزىندىك سىرى بار. دەنساۋلىعى دۇرىستالعان نارەستە ءدال وسى كۇندەرى ۇيىنە, اتا-اناسىنىڭ باۋىرىنا ورالدى. ىلۋدە ءبىر كەزدەسەتىن مۇنداي كىنارات الەمدىك مەديتسينا تاجىريبەسىندە نەبارى 30 رەت تىركەلگەن.
سونىمەن ءسابيدىڭ ءومىرى ءۇشىن جانتالاس ونىڭ جارىق دۇنيەگە كەلگەن ساتىنەن باستالعان. بەت پەن مويىن تۇسىنداعى كولەمى 4ح4 سانتيمەترلىك ۇلكەن وسكىن كەڭىردەك پەن جوعارعى تىنىس جولدارىن قىسىپ تاستاعاندىقتان, نارەستە وزدىگىنەن دەم الا الماعان.
مۇندايدا ءاربىر مينۋت ساناۋلى بولعاندىقتان, نارەستە شۇعىل تۇردە تاسىمال ينكۋباتورى بار رەانيموبيلمەن بالالار شۇعىل مەديتسينالىق كومەك كورسەتۋ ورتالىعىنا جەتكىزىلەدى. دارىگەرلەر ءسابيدى بىردەن ينتۋباتسيالاۋعا ءماجبۇر بولعان, ويتكەنى جاساندى تىنىس الۋ اپپاراتىنان اجىراتقان سايىن ول تۇنشىعا باستايتىن.
– بالانىڭ جاعدايى اۋرۋحاناعا تۇسكەن كەزدە وتە اۋىر ەدى. دەم جەتىسپەۋشىلىگى, جۇرەك-قانتامىرلارى جەتكىلىكسىزدىگى مەن قان اينالىمىنىڭ دۇرىس ەمەستىگى بايقالدى. نارەستەنىڭ ءاربىر تىنىس الۋى – ءومىر ءۇشىن ارپالىس بولاتىن, – دەپ ەسكە الادى سول ءساتتى جاڭا تۋعان نارەستەلەر رەانيماتسياسى بولىمشەسىنىڭ مەڭگەرۋشىسى ۇلىقپان السەيىتوۆ.
باستاپقىدا ماماندار بۇل ادەتتە ءجيى كەزدەسەتىن قاتەرسىز – ليمفانگيوما ىسىگى دەپ توپشىلايدى. الايدا, جاعداي ودان دا كۇردەلى بولىپ شىعادى. رەنتگەن, كومپيۋتەرلىك جانە ماگنيتتىك-رەزونانستىق توموگرافيا وسكىننىڭ ومىرلىك ماڭىزى بار قان تامىرلار مەن شەتكى جۇيكە تالشىقتارىنا شاپقانىن كورسەتەدى.
– وسكىن جۇتقىنشاق پەن كومەيدى, قۇلاق ماڭىنداعى جاق بۇلشىقەتتەرىن باسىپ, تىنىس جولدارىن تارىلتقاندىقتان, ءسابيدىڭ ءومىرىن ساقتاۋ ءۇشىن دەرەۋ وتا جاساۋ تۋرالى شەشىم قابىلداندى, – دەيدى جاق-بەت حيرۋرگى, مەديتسينا عىلىمدارىنىڭ دوكتورى سەرىك نۇرماعانوۆ.
وسىدان كەيىن ورتالىقتىڭ بۇكىل مۇمكىندىگى شۇعىل ىسكە قوسىلىپ, رەانيماتولوگتار, جاق-بەت حيرۋرگتەرى مەن نەۆرولوگتاردان قۇرالعان بىرنەشە كونسيليۋم وتا جاساۋ ءادىسىن ەگجەي-تەگجەيلى پىسىقتايدى.
وتانىڭ ءاربىر ءساتى زەرگەردىڭ قيمىلىنداي جوسپارلانىپ, وپەراتسيا بريگاداسىن جاق-بەت حيرۋرگى سەرىك نۇرماعانوۆ باسقاراتىن, انەستەزيولوگياعا ۇلىقپان السەيىتوۆ جاۋاپتى بولدى. اسسيستەنت رەتىندە – ەلىمىزدەگى جەتەكشى نەوناتالدى حيرۋرگتەردىڭ ءبىرى, ورتالىقتىڭ حيرۋرگيا بولىمشەسىنىڭ مەڭگەرۋشىسى ساماتبەك مىرزاحمەت تاڭدالادى.
ەكى ساعاتقا سوزىلعان كۇردەلى وتا كەزىندە كولەمدى وسكىن تۇبىرىمەن الىنىپ, نارەستە ءبىرىنشى رەت ەركىن تىنىس العانى بىلىنەدى. دەگەنمەن, دارىگەرلەردى الدا مۇنان دا كۇردەلى توسىنسىي كۇتىپ تۇرعان ەدى, گيستولوگيالىق زەرتتەۋلەردىڭ ناتيجەسى «ىسىك» دەپ ويلاعان وسكىننىڭ مي ءتىنى ەكەنىن انىقتايدى. بۇل – تاجىريبەلى مامانداردىڭ ءوزىن تاڭعالدىرعان جاڭالىق بولاتىن.
– گەتەروتوپيالىق مي ءتىنى – ىشتەگى شارانا دامىپ جاتقان كەزدە مي جاسۋشالارىنىڭ باس سۇيەك قۋىسى سىرتىنا ورنالاسۋىنان پايدا بولاتىن, اسا سيرەك كەزدەتىن ءتۋابىتتى انوماليا, – دەپ تۇسىندىرەدى ورتالىق ديرەكتورى الىبەك سماعۇلوۆ.
ستاتيستيكاعا سۇيەنسەك, كومەي-جۇتقىنشاق ايماعىنا ورنالاسقان مۇنداي مي ءتىنى بارلىق گەتەروتوپيالىق جاعدايدىڭ 0,1%-ىنا دا جەتپەيدى. ال دۇنيەجۇزىلىك مەديتسينالىق ادەبيەتتە وسىعان ۇقساس وقيعا نەبارى 30 جاعداي عانا كەزدەسىپ, سيپاتتالعان. قىسقاسى, قايعىلى جاعدايعا دۋشار ەتۋى ابدەن مۇمكىن وقيعا جاقسىلىقپەن اياقتالىپ وتىر.
تاناۋى پىسىلداعان كىپ-كىشكەنتاي پاتسيەنت قازىر وزدىگىنەن تىنىس الا الادى, ەمۋدى ۇيرەنىپ, جاعدايى دۇرىستالعان سوڭ ۇيىنە شىعارىلدى.
– پرەناتالدىق دياگنوستيكانىڭ ماڭىزى سوندا – ەكىنشى, ءۇشىنشى سكرينينگ كەزىندە-اق ۇرىقتا بەت پەن مويىن تۇسىنداعى ءتۇزىلىس انىقتالعان. حيرۋرگيالىق جولمەن تولىق الىنعان جاعدايدا, مۇنداي ناۋقاستاردىڭ ءومىر ءسۇرۋ مۇمكىندىگى جوعارى, – دەيدى الىبەك سماعۇلوۆ.
قالاي دەسەك تە, وتاندىق مەديتسينا تاريحىنا ەنەتىن وسىناۋ وقيعا – بالالار شۇعىل مەديتسينالىق كومەك كورسەتۋ ورتالىعى دارىگەرلەرىنىڭ كاسىبي بىلىكتىلىگىن دالەلدەيتىن جالعىز جاعداي ەمەس.
ماسەلەن, 2024 جىلى ورتالىقتا دامۋىنان ءتۇرلى كىنارات تابىلعان 49 نارەستەگە وتا جاسالسا, بيىل جىل باسىنان بەرى پەرزەنتحانالاردان 24 نارەستە جەدەل حيرۋرگيالىق وپەراتسيا جاساتۋ ءۇشىن وسى ورتالىققا جەتكىزىلگەن.
