سۋرەتتى تۇسىرگەن – ەرلان ومار, «EQ»
ويىنشىق وتاندىق ءوندىرىس ءۇشىن قولايلى سالا ما؟
ەلىمىزدە ساتىلاتىن ويىنشىقتاردىڭ 80%-دان استامى قىتاي, تۇركيا, رەسەي مەن ەۋروپادان يمپورتتالادى. بۇل – تاڭداۋ اياسىن كەڭەيتسە دە, ساپاعا دەگەن سەنىمگە كولەڭكە تۇسىرەدى. ويىنشىق – ەڭ الدىمەن قاۋىپسىزدىكپەن ولشەنەتىن ءونىم. بىلتىر ەلىمىزدە جالپى قۇنى
58 ملن تەڭگەنى قۇراعان 14 پارتيا ويىنشىقتىڭ تەحنيكالىق رەگلامەنت تالاپتارىنا سايكەس كەلمەيتىنى انىقتالىپ, ساتىلىمى توقتاتىلعان. نەگىزگى كەمشىلىكتەر قاتارىندا مەحانيكالىق قاۋىپسىزدىك تالاپتارىنىڭ بۇزىلۋى, وتكىر قىرلاردىڭ بولۋى جانە ساپاسىز ماتەريالداردىڭ قولدانىلۋى بار.
ەلدە ويىنشىق شىعاراتىن كاسىپورىندار سانى شەكتەۋلى. كوبى شاعىن جانە ورتا بيزنەس وكىلدەرى. نەگىزىنەن اعاشتان, ماتادان, قاۋىپسىز ماتەريالداردان جاسالعان ونىمدەر ۇسىنادى. دەگەنمەن ۇلكەن وندىرىستىك قۋاتتىلىق پەن نارىققا كەڭىنەن تارالۋ مۇمكىندىگى ءالى دە تومەن. وتاندىق برەندتەردى تۇتىنۋشىلار ءجيى تانىمايدى, جارناما مەن ماركەتينگتىك قولداۋ ءالسىز. ال بالالارعا ارنالعان كىتاپ پەن ويىنشىق ونىمدەرىن جاساپ شىعارۋ ۇلكەن شىعارماشىلىقپەن قاتار, كۇردەلى وندىرىستىك جانە لوگيستيكالىق ۇدەرىستى تالاپ ەتەدى.
سۇرانىس بار, جۇيە جوق
نارىقتاعى بەلسەندى كومپانيانىڭ ءبىرى – قازاقشا كىتاپتار مەن ويىنشىقتار وندىرەتىن «Tanu» باسپاسى. جوبا اۆتورلارىنىڭ ءبىرى ديانا سۇلتانمۇراتتىڭ ايتۋىنشا, باسپانى اشۋعا ەڭ الدىمەن اتا-انا رەتىندەگى قاجەتتىلىك سەبەپكەر بولعان.
« ۇلىمىز مانسۇر دۇنيەگە كەلگەننەن كەيىن قازاق تىلىندە ساپالى, مازمۇندى, زاماناۋي بالالار كىتاپتارىن تابۋ قيىن ەكەنىن بايقادىق. قازىرگى اتا-انالار بالاسىنىڭ قازاق تىلىندە ەركىن سويلەپ, ۇلتتىق قۇندىلىقتاردى بويىنا ءسىڭىرىپ وسكەنىن قالايدى. بىراق وتاندىق نارىقتا بۇل قاجەتتىلىككە تولىق جاۋاپ بەرەتىن ساپالى ونىمدەر وتە از. وسى ولقىلىقتى سەزىنگەننەن كەيىن ءوزىمىز ىزدەگەن ءونىمدى ءوزىمىز جاسايىق دەپ شەشتىك», دەيدى باسپاگەر.
ايتۋىنشا, بۇل باعىتتاعى باستى قيىندىق – ينفراقۇرىلىم مەن قولداۋ جۇيەسىنىڭ السىزدىگى. شەتەلدىك ونىمدەر ساپا, ديزاين, ءوندىرىس تەحنولوگياسى جاعىنان الدەقايدا وزىق.
«كەيىنگى جىلدارى اتا-انالار اراسىندا ۇلتتىق مازمۇنداعى ونىمدەرگە دەگەن سۇرانىس ارتىپ كەلەدى, الايدا سۇرانىس جۇيەلى تۇردە قامتاماسىز ەتىلمەي جاتىر. مەملەكەتتىك دەڭگەيدە قولداۋ كەرەك – مىسالى, گرانت, كورمە-جارمەڭكە, ءبىلىم بەرۋ ۇيىمدارىمەن ارىپتەستىك. ەگەر سالانى دامىتۋدى جۇيەلى جولعا قويساق, ۇلتتىق ونىمدەر ناعىز ترەندكە اينالارىنا سەنەمىز», دەيدى باسپانىڭ نەگىزىن قالاۋشىلار.
اسەم جاناتوۆا,
ل.ن.گۋميلەۆ اتىنداعى ەۇۋ-دىڭ 3-كۋرس ستۋدەنتى
