«قىزىلوردا قالالىق جولاۋشىلار كولىگىن جاڭارتۋ» جوباسى 2013 جىلى باستالعان. سول جىلدىڭ اياعىندا قىزىلوردا وبلىسىنىڭ اكىمدىگى, «بايقوڭىر» اكك, «قىزىلوردا اۆتوبۋس پاركى» مەن ەۋروپا قايتا قۇرۋ جانە دامۋ بانكى اراسىندا جوبانى قولداۋ تۋرالى كەلىسىمگە قول قويىلادى. جالپى قۇنى 27,11 ملن دوللار بولاتىن جوبانى جۇزەگە اسىرۋ ماقساتىندا اۆتوبۋس پاركى مەن ەقدب اراسىندا, ون جىل مەرزىمگە نەسيەلىك كەلىسىم جاسالىپ, ونىڭ العاشقى 3 جىلى جەڭىلدىك كەزەڭى بولىپ بەلگىلەنەدى.
جوبانىڭ باستاپقى قۇنى تەڭگەمەن 4,17 ملرد بولسا, اياقتالعانشا تولەنگەن قارجى 9 ملرد تەڭگەگە جەتكەن. امالى تاۋسىلعان اۆتوبۋس پاركى اينالدىرعان 5-6 جىلدا جارامسىز كۇيگە تۇسكەن كولىكتەردىڭ نەسيەسىن سۋبسيديا ەسەبىنەن تولەپ كەلىپتى.
«سوڭعىسى 2016 جىلى كەلگەن اۆتوبۋستاردىڭ الدى 2022 جىلدارى ىستەن شىعا باستادى. قوسىمشا بولشەكتەرى دە پايدالانۋعا كەلمەي تۇر. وسىدان ەكى جىل بۇرىن عانا بانك الدىنداعى بەرەشەكتى تولەپ بولدىق», دەيدى «قىزىلوردا اۆتوبۋس پاركى» جشس ديرەكتورى ابدىباكىر ماشتاەۆ.
«بايقوڭىر» اكك اۆتوبۋس پاركىنە ەنشىلەس مەكەمە رەتىندە كرەديتتىك شارت جاساۋعا كومەك بەرگەن. 2017 جىلى «قىزىلوردا اۆتوبۋس پاركى» قالا اكىمدىگىنىڭ تەڭگەرىمىنە وتكىزىلگەن. جاقىندا ءماجىلىس دەپۋتاتى مۇرات ابەنوۆ الەۋمەتتىك جەلىدە وسى ماسەلەنى كوتەرىپ, وبلىس بيۋدجەتىن ويسىراتىپ كەتكەن جوبادان سىبايلاس جەمقورلىقتىڭ بەلگىسى بايقالاتىنىن اشىق ايتتى.
«جوبانىڭ باسىندا-اق مۇنداي كولىك بۇرىن-سوڭدى ەلگە يمپورتتالماعاندىقتان دا, سەرتيفيكاتتاۋ تالاپتارىنا بايلانىستى اۆتوبۋستى جەتكىزۋ 43 اپتاعا كەشىكتىرىلدى. ول كەزدە ەلىمىزگە قىتايداعى تانىمال كومپانيالاردىڭ اۆتوبۋستارىن ەش كەدەرگىسىز اكەلۋگە بولاتىن. جوعارى دەڭگەيدە جابدىقتالعان, ساپاسى الەمگە بەلگىلى سول اۆتوبۋستار بىزگە جەتكىزىلىپ جاتقان كۇماندى كولىكتەردەن 3-4 ەسە ارزان ەدى. وسىنى كورە تۇرا, اۆتوبۋستى بەلگىسىز وندىرۋشىلەردەن يمپورتتاۋعا بەل بۋعانداردىڭ قانداي ويدا بولعانى بەيمالىم. باستالعاننان-اق وسىنداي قولدان جاسالعان كەدەرگىلەر سالدارىنان اۆتوپارك بانك الدىنداعى نەسيەسىن 2024 جىلى عانا وتەپ ءبىتىردى», دەيدى دەپۋتات.
دەپۋتاتتىڭ ايتىپ وتىرعانى, تر تس 018/2011 تالاپتارىنا سايكەس الىناتىن وتتس سەرتيفيكاتى. ەلىمىزدە اككرەديتتەلگەن زەرتحانالار بولماعاندىقتان, مۇنداي سىناق رەسەيدەگى دميتروۆ اۆتوپوليگونىندا جۇرگىزىلىپ, ونىڭ سوڭى قوسىمشا ۇيىمداستىرۋ مەن جوبادا جوق لوگيستيكالىق شىعىندارعا ۇلاسقان. وسىلايشا, 92 اۆتوبۋستىڭ جەتكىزىلۋى ۇزاققا سوزىلىپ, بەلگىلەنگەن كەستەدەن كەشىگەدى. سالدارىنان ءبىر اۆتوبۋستىڭ باستاپقى قۇنى 2014 جىلعى باعاممەن 194 076 دوللار نەمەسە 35,3 ملن تەڭگە شاماسىندا باعالانعانىمەن, جوبا اياقتالعانشا ەسەلەپ ءوسىپ كەتەدى.
2014–2024 جىلدار ارالىعىندا دوللار باعامى 153,8 تەڭگەدەن 450 تەڭگەگە دەيىن ءوسىپ, نەسيە جونىندەگى تولەم كولەمى دە ۇلعايعان. كەشىگۋگە بايلانىستى ەقدب تاراپىنان 139 945,44 دوللار كولەمىندە رەزەرۆتەۋ كوميسسياسى ەسەپتەلگەنى دە كەپىلدىك بەرگەن وبلىستىق بيۋدجەتكە ارتىق جۇك بولعان.
«ەڭ ۇلكەن ستراتەگيالىق قاتەلىك نەسيەنى دوللارمەن راسىمدەۋ بولدى. ۆاليۋتالىق تاۋەكەلدەر ەسكەرىلمەگەندىكتەن, تەڭگە السىرەگەن كەزدە جوبا قۇنى شارىقتاپ كەتكەن. بىراق سول ميللياردتاعان تەڭگە جۇمسالعان اۆتوبۋستاردىڭ قاڭتارىلىپ تۇرعانى جۇرت كوكەيىندە كوپ سۇراق تۋىنداتىپ تۇر. جۇمسارتا ايتقاندار مۇنى جاۋاپسىزدىققا بالاسا, دۇرىس جوسپارلانباعان جوبادان سىبايلاس جەمقورلىق بەلگىلەرىن بايقايتىندار دا از ەمەس. اينالىپ كەلگەندە, ءار اۆتوبۋسقا بارلىق پايىزدى, ايىپپۇلداردى, قوسىمشا تولەمدەردى, جول اقىسىن, باج سالىعىن ساناعاندا, ورتا ەسەپپەن 100 ملن تەڭگەگە جۇمسالعان. سول تۇستا ءار سالىق تولەۋشىنىڭ قالتاسىنان شىققان بۇل قارجىعا كەمىندە 10 شاقتى مەكتەپ نەمەسە بىرنەشە اۋرۋحانا سالۋعا بولاتىن ەدى. سوندىقتان قۇزىرلى ورگاندار تەكسەرىس جۇرگىزىپ, كىنالىلەر زاڭ اياسىندا جاۋاپقا تارتىلۋى قاجەت. كەز كەلگەن لاۋازىمدى تۇلعا اتقارعان قىزمەتىنە, اتاق-دارەجەسىنە قاراماستان «زاڭ مەن ءتارتىپ» قاعيداسى اياسىندا جاۋاپ بەرۋگە ءتيىس», دەيدى م.ابەنوۆ.
بۇگىندە «قىزىلوردا اۆتوبۋس پاركى» مەكەمەسىندە 300-گە جۋىق اۆتوبۋس بار. ولاردىڭ 280-گە جۋىعى كۇندەلىكتى جولعا شىعادى. ال وبلىس بيۋدجەتىنە تىم قىمباتقا ءتۇسىپ, مەجەلى مەرزىمىنە جەتپەي قاڭتارىلعان 84 قوعامدىق كولىكتى الداعى ۋاقىتتا اۋكتسيون ارقىلى ساتۋ جوسپارلانىپ وتىر.
قىزىلوردا
