وسىعان وراي, شاردارا قويماسىنا تۇراقتى سۋ كەلۋىن قامتاماسىز ەتۋ ماقساتىندا, مينيسترلىك كورشىلەس ەلدەرمەن جۇيەلى جۇمىس جۇرگىزىپ جاتىر. مەجەلى تۇردە تۇراقتى سۋ جەتكىزۋدى قامتاماسىز ەتۋ ماقساتىندا, 30 مامىردا قازاقستان, تاجىكستان جانە وزبەكستان اراسىنداعى «باحري توچيك» سۋ قويماسىنىڭ ماۋسىم-تامىز ايلارىنداعى جۇمىس رەجيمى بويىنشا ۇشجاقتى كەستە بەكىتىلگەن. بۇل قۇجات شەڭبەرىندە قازاقستانعا ۆەگەتاتسيالىق كەزەڭدە دوستىق كانالى ارقىلى كەمىندە 491 ملن تەكشە مەتر سۋ جەتكىزىلەدى دەپ جوسپارلانىپ وتىر.
2 ماۋسىمداعى جاعداي بويىنشا ارال-سىرداريا باسسەينىندەگى سۋ قويمالارىنىڭ ورتاشا تولىمدىلىعى – 66% نەمەسە 3,6 ملرد تەكشە مەتر. وسىعان بايلانىستى مينيسترلىك تۇركىستان جانە قىزىلوردا وبلىستارىندا تاۋەكەلدەر ساقتالۋدا ەكەنىن حابارلادى. اتاپ ايتقاندا, 1 ساۋىردەگى جاعداي بويىنشا بوگەن سۋ قويماسىنا 357 ملن تەكشە مەتر سۋ جينالعان. بۇل وتكەن جىلعى كورسەتكىشپەن شامالاس بولعانىمەن, بۇگىندە قويماداعى سۋ كولەمى 229 ملن تەكشە مەترگە دەيىن تومەندەدى. بۇل جاعداي ۆەگەتاتسيالىق كەزەڭنىڭ باستاپقى ساتىسىندا سۋ الۋدىڭ قارقىندى جۇرۋىمەن تىكەلەي بايلانىستى.
قازگيدرومەتتىڭ مالىمەتى بويىنشا, الداعى ۆەگەتاتسيا ماۋسىمى ەلىمىزدىڭ وڭتۇستىك جانە باتىس وڭىرلەرىندە جاۋىن-شاشىن تاپشىلىعى جاعدايىندا وتەدى. وسىعان بايلانىستى, اۋىل شارۋاشىلىعى تاۋار وندىرۋشىلەرى سۋ ۇنەمدەۋ تەحنولوگيالارىن, تۇنگى جانە كەزەكتەسىپ سۋارۋدى قولدانۋ قاجەت.
ايتا كەتەلىك, جۋىردا شاردارا اۋدانىنداعى «Nur-delux» جاعاجايىندا شومىلۋ ماۋسىمىنىڭ اشىلۋى ءوتتى. مەرەكەلىك شارا اياسىندا جاعاجاي اۋماعىندا ءتۇرلى سپورتتىق جارىستار – ۆولەيبول, فۋتبول, ارقان تارتۋ, قوشقار كوتەرۋ جانە گىر تاس كوتەرۋ بويىنشا باسەكەلەر, سونداي-اق وتباسىلىق «تولاعاي» سايىستارى وتكىزىلدى. سونىمەن قاتار اۋداندىق كوركەمونەرپازدار كونتسەرتتىك باعدارلاماسىن ۇسىنىپ, قاتىسۋشىلارعا كوتەرىڭكى كوڭىل-كۇي سىيلادى.
