وڭىردەگى ەگىستىك القاپتاردىڭ باسىم بولىگى – ءداندى جانە مايلى داقىلدار. استىق داقىلدارى اراسىندا بيداي مەن ارپا نەگىزگى ورىن الادى. كەيىنگى جىلدارى سۇرانىستىڭ ارتۋىنا بايلانىستى مايلى داقىلعا, اسىرەسە كۇنباعىس پەن راپستىڭ ەگىس كولەمى ۇلعايدى. بۇل داقىلداردان الىناتىن ونىمدەر ىشكى نارىقتى قامتاماسىز ەتىپ قانا قويماي, ەكسپورتقا دا شىعارىلادى.
اۋىل شارۋاشىلىعى باسقارماسىنىڭ باسشىسى ەرتاي قۋانباەۆتىڭ مالىمەتىنشە, كوكتەمگى ەگىس جۇمىسى بارلىق اۋداندا باستالعان. وعان 12 900 تەحنيكا جۇمىلدىرىلعان. بيىل وڭىردە 753,1 مىڭ گەكتار القاپقا (وتكەن جىلمەن سالىستىرعاندا 3,6 مىڭ گەكتار ارتىق) اۋىل شارۋاشىلىعى داقىلدارى ەگىلمەك. 46,2 مىڭ توننا تۇقىم دايىندالعان. 27,5 مىڭ توننا ارزانداتىلعان ديزەل وتىنى دا ءبولىندى.
جۋىردا وبلىس اكىمى بەرىك ءۋالي جۇمىس ساپارىمەن بورودۋليحا اۋدانىنا بارىپ, وڭىردەگى ءىرى اگروقۇرىلىمداردىڭ ءبىرى – «لازارەۆ ي ك» جشس-ءنىڭ كوكتەمگى دالا جۇمىستارى بارىسىمەن تانىستى. ءوڭىر باسشىسى شارۋاشىلىقتىڭ ەگىس القابىن ارالاپ, اۋىل شارۋاشىلىعى وندىرىسىندەگى وزىق تەحنولوگيالار مەن جاڭا تاسىلدەردىڭ قولدانىلۋىنا نازار اۋداردى. قازىر سەرىكتەستىك وسىمدىك جانە مال شارۋاشىلىعىن قاتار دامىتىپ وتىر. يەلىگىندە 13 مىڭ گەكتاردان استام جەرى بار قۇرىلىمنىڭ 10 مىڭ گەكتارىنا جۋىق بولىگىنە بيىل ەگىن سالىنباق.
«شارۋاشىلىق مايلى داقىلداردى وڭدەۋگە باسىمدىق بەرىپ, كۇنباعىس مايىن قىتايعا ەكسپورتتايدى. بيىل 4 000 گەكتارعا كۇنباعىس, 6 00 گەكتارعا زىعىر جانە راپس ەگۋ جوسپارلانعان. داقىلداردىڭ ساپاسىن ارتتىرۋ ءۇشىن درون ارقىلى سەبۋ ءتاسىلى العاش رەت ەنگىزىلدى. كەلەر جىلى كوكتەمگى ىلعال تولىق كەپپەي تۇرىپ, ءدال وسى ادىسپەن راپس ەگۋگە نيەتتى. سونىمەن قاتار ۇساق ءداندى داقىلداردى سەبۋگە ارنالعان جاڭا تەحنيكا ساتىپ الىنعان», دەيدى سەرىكتەستىك ماماندارى.
ولاردىڭ ايتۋىنشا, سەرىكتەستىكتە مال شارۋاشىلىعى باعىتى دا قارقىندى دامىپ جاتىر. 1 500-گە جۋىق ءىرى قارا مال بار. 100 ادام تۇراقتى جۇمىسپەن قامتىلعان. تۇقىمدىق وڭدەۋ مەن ورگانيكالىق تىڭايتقىش ەنگىزۋ جۇيەسى دە جولعا قويىلعان. قىتاي ماماندارىمەن بىرلەسىپ كۇنباعىس بۋدانىن الۋ جولعا قويىلىپتى.
اباي وبلىسى,
بورودۋليحا اۋدانى
