وڭىرلەردىڭ وركەنىن تەك وندىرىسپەن بايلانىستىرۋ قازىرگى كەزدە قيسىنسىزداۋ. سەبەبى قازىر تۋريزمەن ءبىر ءوڭىردى عانا ەمەس, ءبۇتىن ءبىر ەلدى قامتاماسىز ەتۋگە بولاتىنىن الەمدىك تاجىريبە كورسەتىپ وتىر. مۇنى پرەزيدەنت قاسىم-جومارت توقاەۆ ۇلتتىق قۇرىلتايدىڭ بيىلعى وتىرىسىندا دا ايتىپ, تۋريزم ايماقتىق دامۋعا سەرپىن بەرەتىن سالا ەكەنىن ايتتى.
مىسالى, اباي وبلىسى دەسە ەڭ الدىمەن ەسكە تۇسەتىن تاريحي نىساندار مول. بۇل ءوڭىر – اباي قۇنانباي ۇلى, شاكارىم قۇدايبەردى ۇلى, مۇحتار اۋەزوۆ سىندى ۇلى تۇلعالاردىڭ ءىزى قالعان, الاش تۋ تىككەن تاريحي مەكەن. سەمەي پوليگونى – يادرولىق سىناقتار وتكەن قاسىرەتتى ايماق, قوڭىر اۋليە ۇڭگىرى – ەمدىك قاسيەتى بار ورىن, ەرتىس وزەنى – ءوڭىردىڭ نەگىزگى سۋ ارتەرياسى, اسەم تارباعاتاي تاۋلارى – تابيعاتىڭ ناعىز تال بەسىگى. بۇعان قوسا سەمەي قالاسىنداعى تاريحي عيماراتتار مەن مەموريال-مۋزەيلەردىڭ ورنى مۇلدە بولەك. بۇل رەتتە سەمەي قالاسىنىڭ ءوزى ۇلكەن ءبىر تۋريستىك جوباعا سۇرانىپ-اق تۇر. ەلىمىزدە مۇنداي تاريح پەن تابيعاتتىڭ ۇيلەسىمى ورال مەن سەمەيدە عانا بار دەۋگە بولادى.
ءوڭىردىڭ وسىنداي ارتىقشىلىعىن كەڭىنەن زەرتتەگەن جەرگىلىكتى بيلىك جۋىردا اباي وبلىسىندا تاعى ءبىر جاعىمدى جاڭالىقتى جاريا ەتتى. وبلىس اكىمى بەرىك ءۋالي ايماقتا تۋريزم باسقارماسى قۇرىلاتىنىن مالىمدەدى.
مامانداردىڭ ايتۋىنشا, بۇل شەشىم ءوڭىردىڭ تۋريستىك ينفراقۇرىلىمىن جۇيەلى تۇردە دامىتۋعا, ىشكى جانە سىرتقى ءتۋريزمنىڭ وركەندەۋىنە سەرپىن بەرمەك. ويتكەنى قازىر ءوڭىردىڭ ەڭ باستى تۋريستىك نىساندارىنىڭ ءبىرى – الاكولگە دەگەن سۇرانىس جىلدان-جىلعا ارتىپ كەلەدى. بۇل ءۇردىس وبلىس ءۇشىن ۇلكەن مۇمكىندىكتەرگە جول اشادى.
وسى ورايدا اباي وبلىسىنىڭ اكىمى ماقانشى اۋدانىنا جاساعان جۇمىس ساپارى بارىسىندا الاكولدىڭ جاعدايىمەن تانىسىپ, تۋريستىك ماۋسىمعا دايىندىقتى پىسىقتادى. الاكولدىڭ ينفراقۇرىلىمىن جاقسارتۋ ماقساتىندا زاماناۋي قوقىس جاشىكتەرىن كوبەيتۋ, قوعامدىق اجەتحانالار سانىن ارتتىرۋ, جاعالاۋدى اباتتاندىرۋ, ەمدىك بالشىق ايماعىن رەتكە كەلتىرۋ, بالالارعا ارنالعان ويىن الاڭدارىن سالۋ, ءورت قاۋىپسىزدىگىن كۇشەيتۋ سەكىلدى ماڭىزدى ىستەر قولعا الىنىپ جاتىر. بۇل باستامالار دەمالۋشىلار مەن ەم الۋشىلارعا قولايلى جاعداي جاساپ, تۋريستەردىڭ سانىن ودان ءارى ارتتىرۋعا مۇمكىندىك بەرەتىنى ءسوزسىز.
بۇعان قوسا اباي وبلىسىنىڭ بىرەگەي تابيعي جانە تاريحي-مادەني مۇرالارىن قامتيتىن بىرنەشە تۋريستىك باعىتتارى قالىپتاسىپ ۇلگەردى. ايتالىق, بەسقاراعايداعى شوشقالى كولى, اباي اۋدانىنداعى قۇنانباي اۋلەتىنىڭ قورىمى, قوڭىر اۋليە ۇڭگىرى, جيدەبايداعى «اباي-شاكارىم» كەسەنەسى, بورىلىدەگى مۇحتار اۋەزوۆ مۋزەي-ءۇيى, ءۇرجار اۋدانىنداعى «تارباعاتاي» ۇلتتىق پاركى, اياگوز اۋدانىنداعى «قوزى كورپەش – بايان سۇلۋ» مازارى, ماقانشىداعى «بارلىق اراسان» شيپاجايى, ءشۇلبى سۋ قويماسى, تاعىسىن-تاعىلار. بۇل تۋريستىك نىساندار تەك ىشكى عانا ەمەس, حالىقارالىق دەڭگەيدەگى تۋريستەردىڭ دە قىزىعۋشىلىعىن تۋدىرىپ وتىر.
ءتۋريزمدى دامىتۋ ءۇشىن بىلىكتى ماماندار دايارلاپ, قىزمەت ساپاسىن جاقسارتۋ كەرەك. وبلىستاعى تۋريستىك كاسىپكەرلىكتى قولداۋ, ينفراقۇرىلىمدى نىعايتۋ, ەكوتۋريزمدى دامىتۋ ءوڭىردىڭ ەكونوميكالىق ءارى الەۋمەتتىك ورلەۋىنە ىقپال ەتەدى.
قورىتا ايتقاندا, اباي وبلىسىنىڭ تۋريزم سالاسىنداعى الەۋەتى زور. بۇل سالانىڭ اياسىن كەڭەيتە تۇسسە ءوڭىردىڭ دامۋىنا سەپتىگى مول تيەدى. وسى رەتتە تۋريستىك نىسانداردى دامىتۋعا مەملەكەتتىك قولداۋ كورسەتىلسە, جەرگىلىكتى بيلىك باعدارلى, بەلسەندى قىزمەتى ارقىلى ولكەنى ەلىمىزدىڭ سىندارلى ساياحات ورتالىقتارىنىڭ بىرىنە اينالدىرۋعا بار كۇش-جىگەرىن جۇمساۋعا دايىن.
اباي وبلىسى
