اباي وبلىسى كاسىپكەرلەر پالاتاسىنىڭ شاعىن كاسىپكەرلىكتى دامىتۋ ءبولىمىنىڭ باسشىسى نۇراسىل مۇراتوۆتىڭ ايتۋىنشا, جوباعا ءوڭىر كاسىپكەرلەرىنەن 29 ءوتىنىم تۇسكەن. سەمەي قالاسىن قوسا ەسەپتەگەندە 40-تان استام كەڭەس بەرۋ شاراسى, 20-دان استام قاتىسۋشى ءوز ونىمدەرىن ۇسىنعان جارمەڭكە ۇيىمداستىرىلعان. جوبانىڭ ماڭىزدى كەزەڭدەرىنىڭ ءبىرى – برەندتىك كوميتەت پەن ارنايى كوميسسيانىڭ جۇمىسى. ناتيجەسىندە, ءتورت كاسىپكەر جەڭىمپاز بولىپ تانىلعان.
– الەۋمەتتىك كاسىپكەرلىكتى دامىتۋعا ارنالعان مەملەكەتتىك گرانتتار بايقاۋىنىڭ ناتيجەسىندە ەكى قاتىسۋشى – راۋشان مۇقاجانوۆا مەن گۇلميرا ايعوجينا 5 ميلليون تەڭگەدەن گرانت يەگەرى اتاندى. قوماقتى قاراجات ولاردىڭ ءوندىرىسىن كەڭەيتىپ, جاڭا نارىققا شىعۋىنا مۇمكىندىك بەرەدى. بىلتىرعى جەڭىمپازدار نۇرزيا ءتاشىموۆا مەن ايزەرە امانگەلديەۆا كاسىپكەرلەر پالاتاسى ارقىلى ءونىمدى ىلگەرىلەتۋ, پاتەنتتەۋ, ماركەتپلەيستەرگە شىعۋ, برەند ايدەنتيكا جاساۋعا قاتىستى ارنايى كۋرستان ءوتتى, – دەيدى ن.مۇراتوۆ.
گرانت يەگەرى گۇلميرا ايعوجينا جوبانىڭ ارتىقشىلىقتارى تۋرالى ايتا كەلىپ:
– ءبىز ءوز يدەيامىزدى ناقتى جۇمىس ىستەيتىن بيزنەسكە اينالدىرۋعا مۇمكىندىك الدىق. جاڭا ءبىلىم مەن تەحنولوگيالاردى مەڭگەرىپ, سەرىكتەستەر مەن جەتكىزۋشىلەردى تابۋ داعدىلارىن ۇيرەندىك, ساپالى ءونىم شىعارا باستادىق. ءونىمدى وتكىزۋگە, تابىستى ارتتىرۋعا قول جەتكىزدىك. الداعى ۋاقىتتا ءونىمىمىزدى برەندكە اينالدىرىپ, ونى كەڭىنەن تانىمال ەتكىمىز كەلەدى. بۇل – وڭىردەگى جەرگىلىكتى تاۋارلار مەن قىزمەتتەردىڭ ءوندىرىسىن دامىتۋعا, تەك جەرگىلىكتى شيكىزاتتى پايدالاناتىن وندىرۋشىلەر بىرلەستىكتەرىن قۇرۋعا باعىتتالعان جوبا, – دەدى.
اباي وبلىسى
