فوتو: قر ساۋدا جانە ينتەگراتسيا مينيسترلىگى
قر ساۋدا جانە ينتەگراتسيا مينيسترلىگىنىڭ مالىمەتىنشە, جوبا اياسىندا Ekazent Management GmbH كومپانياسى اۋتلەت-ورتالىقتى ورنالاستىرۋعا ەڭ قولايلى ورىندى انىقتاۋ ءۇشىن كەشەندى ماركەتينگتىك زەرتتەۋ جۇرگىزەدى.
«كومپانيا بولاشاق ورتالىقتىڭ ارحيتەكتۋرالىق جانە وپەراتسيالىق تۇجىرىمداماسىن ازىرلەپ, باسقارۋ ستراتەگياسىن قالىپتاستىرادى. نىسان ىسكە قوسىلعاننان كەيىن كۇندەلىكتى وپەراتسيالىق باسقارۋ مىندەتىن دە ءوز موينىنا الادى. بۇدان بولەك, Ekazent حالىقارالىق برەندتەر مەن جالعا الۋشىلاردى تارتۋ جۇمىستارىمەن اينالىسادى», دەلىنگەن حابارلامادا.
اۋتلەت-ورتالىقتىڭ جالپى اۋدانى 80 000-نان 120 000 شارشى مەتردى قۇرايدى. ونىڭ اۋماعىندا ءىرى ساۋدا گالەرەيالارى, قوناقۇيلەر, قوعامدىق تاماقتانۋ ورىندارى, بالالار ويىن الاڭدارى جانە باسقا دا قاجەتتى ينفراقۇرىلىم نىساندارى ورنالاسادى.
قازاقستاننىڭ ساۋدا جانە ينتەگراتسيا ءمينيسترى ارمان شاققاليەۆتىڭ ايتۋىنشا, بۇل جوبا بولشەك ساۋدا سالاسىنا جاڭا سەرپىن بەرىپ, ەلىمىزگە ەرەكشە باسەكەلەستىك ارتىقشىلىق اكەلەدى. قازىرگى تاڭدا ورتالىق ازيادا باتىستىق ۇلگىدەگى اۋتلەت-ورتالىقتار جوق..
«بۇل جوبانىڭ ىسكە اسىرىلۋى قازاقستاننىڭ بولشەك ساۋدا سالاسىنا جاڭا سەرپىن بەرەدى. قازىرگى تاڭدا ورتالىق ازيادا باتىستىق ۇلگىدەگى اۋتلەت-ورتالىقتار جوق, بۇل – ەلىمىز ءۇشىن ەرەكشە باسەكەلەستىك ارتىقشىلىق. قازاقستاندىق تۇتىنۋشىلار برەندتىك تاۋارلارعا ەرەكشە قىزىعۋشىلىق تانىتىپ, ءسان مەن lifestyle مادەنيەتىن جوعارى باعالايدى. سونىمەن قاتار, الماتى وبلىسىنىڭ وزبەكستان مەن قىرعىزستان استانالارىنا جاقىن ورنالاسۋى, قىتاي, تۇركيا, ءباا جانە رەسەي باعىتىنداعى لوگيستيكالىق دالىزدەردىڭ قيىلىسىندا ورنالاسۋى ءوڭىردىڭ كولىك-لوگيستيكالىق الەۋەتىن ارتتىرادى», دەدى مينيستر.
جوبا سەرىكتەسى, The College Group كومپانياسىنىڭ وپەراتسيالىق ديرەكتورى ۋيلل كيففەر قازاقستاندى بولشەك ساۋدا مەن تۋريزم تۇرعىسىنان ورتالىق ازياداعى ەڭ الەۋەتتى ءوڭىر رەتىندە اتاعان.
«قازاقستان, اسىرەسە استانا مەن الماتى قالالارى – ورتالىق ازياداعى ەڭ قىزىقتى ايماقتاردىڭ ءبىرى. ءبىز اۆستريامەن سەنىمدى سەرىكتەستىك ورناتىپ, بۇل جوبانى الداعى ەكى جىل ىشىندە تولىق اياقتايمىز دەپ جوسپارلاپ وتىرمىز», دەدى ول.
قازىرگى تاڭدا جاھاندىق اۋتلەت-ريتەيل نارىعىنىڭ كولەمى 100 ميلليارد اقش دوللارىنان اسىپ, جىل سايىن 5–7 پايىز قارقىنمەن ءوسىپ كەلەدى. بۇل ءۇردىس ازيا ەلدەرىندە ايرىقشا بايقالىپ كەلەدى. جوبا QSM توبىنا قاراستى Multibrand Holding كومپانياسى ارقىلى جۇزەگە اسىرىلادى. حولدينگ قۇرامىنا ەلىمىزدەگى العاشقى CFBO (Centralized Fulfillment by Operator) مودەلىندە جۇمىس ىستەيتىن ماركەتپلەيس TEEZ, ونلاين-گيپەرماركەت Clever, جانە FMCG ونىمدەرىنىڭ ديستريبيۋتورى Clever Distribution كىرەدى. تسيفرلىق لوگيستيكا مەن حالىقارالىق دەۆەلوپەرلىك تاجىريبەنىڭ ۇيلەسۋى بۇل جوبانىڭ تابىستى بولۋىنا ۇلكەن مۇمكىندىك بەرەدى.
