ۇلتتىق سپورت تۇرىنەن ءوتىپ جاتقان جارىسقا كوماندالار تىڭعىلىقتى دايىندىقپەن كەلگەن. جاتتىقتىرۋشىلار دا تۋرنير بويى كومانداسىنا دەم بەرىپ, قولداۋ كورسەتۋمەن بولدى. ال جارىستىڭ تۇپكى ماقساتى – كوماندالار ىشىنەن ءادىس-ءتاسىلى كەلىسكەن كىل مىقتىلاردى ىرىكتەۋ ەدى. الايدا, ناقتى ىرىكتەۋ قاراشا ايىنا قالدى.
– ءبىز ارقان تارتۋ سپورت ءتۇرىن الەمدىك دەڭگەيدە دامىتۋ ماقساتىندا رەسپۋبليكالىق تۋرنيرلەر وتكىزىپ جاتىرمىز. بۇگىنگى سايىسقا ەرلەر, ايەلدەر عانا ەمەس, ءبىرىنشى رەت جاستار قۇراماسى دا قاتىسىپ جاتىر. سولاردىڭ ىشىنەن ارقان تارتۋعا ەبى بار, بىلەك كۇشى بار جاستاردى ۇلكەن جارىستارعا شىعارۋىمىز كەرەك, – دەدى ارقان تارتىس فەدەراتسياسىنىڭ ۆيتسە پرەزيدەنتى نۇرلان جاباەۆ.
جارىسقا قىزدار, ەرلەر, جاسوسپىرىمدەر جانە قىز-جىگىتتەر ارالاسقان ءتورت كاتەگوريا بويىنشا كوماندالار قاتىستى. شىعىستىڭ شىمىر قىزدارى دا الاڭعا رۋحتانىپ شىعىپ, قارسىلاستارىن ويسىراتا ۇتىپ جاتتى.
اتالعان جارىستىڭ جالپى جۇلدە قورى 1,5 ملن تەڭگە. دەگەنمەن, قاتىسۋشىلار جۇلدە دەپ ەمەس, اركىم ءوز ايماعىنىڭ نامىسى ءۇشىن تارتىسقا ءتۇستى. سايىس قورىتىندىسى بويىنشا ارالاس كوماندالىق جارىستا وسكەمەندىكتەر استاناعا ەسە جىبەرىپ الدى. ال شىعىستىڭ نامىسىن قورعاعان ەرلەردىڭ جانە ايەلدەردىڭ ەكى كومانداسى ءبىرىنشى ورىندى قانجىعاعا باستى.
جاستار اراسىندا ۇزدىك ناتيجە كورسەتكەن سپورتشىلار ازەربايجاندا وتەتىن حالىقارالىق «تۇران» ويىندارىندا ارقان تارتىستان باق سىناسادى.
شىعىس قازاقستان وبلىسى
