ءىس-شارا بارىسىندا كوزى ناشار كورەتىن وقىرماندار قازاق ادەبيەتىنىڭ مۇزارت شىڭدارىنا اينالعان شەرحان مۇرتازانىڭ «اي مەن ايشا», سايىن مۇراتبەكوۆتىڭ «جۋسان ءيىسى», ءابىش كەكىلباەۆتىڭ «ماحاببات مۇناراسى» جانە باسقا دا قالامگەرلەردىڭ شىعارمالارىنان ىقشامدالىپ الىنعان ساحنالىق قويىلىم قويدى.
اسقار توقپانوۆ اتىنداعى وبلىستىق قازاق دراما تەاترىنىڭ ساحناسىنا شىققان كىتاپحانا وقىرماندارىنىڭ بويىنان ونەرگە دەگەن ادالدىق بايقالىپ تۇردى. ولار وزدەرىنە بەرىلگەن رولدەردى بارىنشا جاقسى يگەرۋگە تىرىستى. كاسىبي رەجيسسەرلەرمەن جۇمىس ىستەۋدىڭ ءمانىن ۇققان وقىرماندارعا كورەرمەن قاۋىم رازى بولدى.
«بولاشاق» مەكتەپ ينتەرناتىنىڭ تۇلەكتەرى, «اسىل ارمان» شىعارماشىلىق ورتالىعىنىڭ وكىلدەرى, مەكتەپ وليمپيادالارىن جانە مەكتەپتەن تىس ءىس-شارالار وتكىزەتىن وبلىستىق ورتالىقتىڭ «دراما» ستۋدياسى جانە وزگە ۇجىمدار قولداۋ كورسەتكەن بايقاۋدا قاتىسۋشىلار «ۇزدىك اكتەرلىك شەبەرلىك», «ۇزدىك قويىلىم», «ۇزدىك ەكىنشى پلانداعى ءرول», «كورەرمەن كوزايىمى» اتالىمدارى بويىنشا ماراپاتتالدى.
«ەلىمىز بويىنشا كوزى ءالسىز كورەتىن ازاماتتار اراسىندا تۇڭعىش رەت وتكىزىلگەن بايقاۋدا كوركەم ادەبيەتتى ناسيحاتتاۋعا دەن قويدىق. وقىرماندارىمىز قازاق ادەبيەتى الىپتارىنىڭ كوركەم تۋىندىلارىن ساحناعا الىپ شىقتى. ارينە, بۇل باعىتتاعى جۇمىس الداعى ۋاقىتتا جالعاسادى. ەڭ باستىسى, كىتاپحانا وقىرماندارىنىڭ تەاتر ونەرىنە دەگەن قۇرمەتى بولەك», دەيدى ۇيىمداستىرۋشىلاردىڭ ءبىرى گۇلزادا قىرىقباەۆا.
تاراز
