فوتو: freepik.com
ارنايى كۋرستاردا وقىعان پەداگوگتەر ەل مەكتەپتەرىندە كاسىپتىك باعدار بەرۋ قىزمەتىن اتقارىپ, وقۋشىلاردىڭ دۇرىس ماماندىق تاڭداۋىنا وزىندىك ۇلەس قوسىپ كەلەدى.
ەسكە سالايىق, بيىل 31 ناۋرىزدا ورتا ءبىلىم بەرۋ ۇيىمدارىندا مەملەكەت باسشىسىنىڭ تاپسىرماسىنا سايكەس پەداگوگ-كاسىپتىك باعدار بەرۋشى لاۋازىمى رەسمي تۇردە بەكىتىلىپ, سالانى ودان ءارى دامىتۋ كوزدەلدى.
ال, كۇنى كەشە ورتالىق كوممۋنيكاتسيالار قىزمەتىندەگى بريفينگ بارىسىندا ەرتە كاسىبي باعدار بەرۋ تۋرالى وقۋ-اعارتۋ ءمينيسترى عاني بەيسەمباەۆ «كەلەشەك مەكتەپتەرى» جوباسى اياسىندا سالىنعان مەكتەپتەردە باستاۋىش سىنىپتاردان باستاپ ءتۇرلى ماماندىق يەلەرىمەن كەزدەسۋلەر ۇيىمداستىرىلاتىنىن, 7-سىنىپتا وقۋشىلار ءۇشىن تەرەڭدەتىلگەن بەيىندىك وقىتۋ, تالىمگەرلىك جۇيەسى جانە جەكە ءبىلىم بەرۋ كۋرستارى ەنگىزىلەتىنىن, اتالعان جايتتار بويىنشا ازىرلەنىپ جاتقان ارنايى تسيفرلىق پلاتفورما – وقۋشىلارعا بولاشاق كاسىبي باعىتىن جانە ءارى قارايعى ءبىلىم الۋ جولىن سانالى تۇردە تاڭداۋعا سەپتەسەتىنىن اتاپ ءوتتى.
ايتا كەتەلىك, قازىرگى ۋاقىتتا مەكتەپتەردەگى كاسىپتىك باعدار بەرۋ جۇمىسىنىڭ نەگىزگى مىندەتتەرى بويىنشا وقۋشىلارعا ماماندىقتار تۋرالى تۇسىنىكتەر بەرىلىپ, كاسىپتىك قىزىعۋى مەن بەيىمدىلىگىن, قابىلەتتىلىگىن قالىپتاستىرۋ-دامىتۋ ءۇشىن وقۋشىنىڭ دارا ەرەكشەلىكتەرى زەرتتەلەدى. سونىمەن قوسا, مەكتەپ بىتىرۋشىلەرگە ماماندىق تاڭداۋعا كومەك جاسالىپ, وقۋشىلاردى بەلگىلى ءبىر ماماندىقتىڭ ءتۇرىن مەڭگەرۋگە بەيىمدەۋ جۇمىسى جۇرگىزىلەدى.
9-11 سىنىپتاردا بەيىندى وقىتۋعا كوشۋ ارقىلى وقۋشىلاردىڭ ماماندىق تاڭداۋىنا سەپتەسۋ كوزدەلىپ, وسى كەزەڭدە جاس ۇرپاقتىڭ بولاشاعى ءۇشىن نەگىزگى كومەككە مەكتەپ پروفەريونتولوگتارى كەلەتىنى ءمالىم.
مەكتەپتەردەگى كاسىپتىك باعدار بەرۋدىڭ جالپى جاي-جاپسارى تۋرالى تۇركىستان وبلىسىنىڭ شاردارا اۋدانىنا قاراستى «سىرداريا» جببم-ءنىڭ بەيىندىك وقىتۋ ءىسى جونىندەگى ديرەكتوردىڭ ورىنباسارى باقتىگۇل بەكتاستىڭ ايتۋىنشا, جوعارى سىنىپتاردا جەكەلەگەن پاندەر تەرەڭدەتە وقىتىلىپ, سونىڭ ناتيجەسى وقۋشى, اتا-انا, پسيحولوگ جانە سىنىپ جەتەكشىسىنىڭ بىرلەسكەن جۇمىستارىمەن, ونىڭ ىشىندە ساۋالنامالار ارقىلى انىقتالىپ وتىرادى.
«بەيىندى سىنىپتارعا وقۋشىلاردىڭ بەلگىلى ءبىر ماماندىققا يكەمدىلىگىن انىقتاۋ جۇمىستارى اتا-انالاردىڭ تالاپتارى جانە جازباشا وتىشتەرى بويىنشا دا جۇيەلى تۇردە ىسكە اسىپ كەلەدى», دەيدى باقتىگۇل ايدارحانقىزى.
مەكتەپتەردە وقۋشىلاردىڭ بولاشاق باعىتى مەن وقۋ ورىندارىن تاڭداۋ ماسەلەسىن شەشۋ ءۇشىن كوللەدجدەرمەن جانە ۋنيۆەرسيتەتتەرمەن ىنتىماقتاستىق جۇمىسى ۇيىمداستىرىلاتىنى ءمالىم.
«مەكتەپ ءبىتىرۋشى تۇلەكتەرگە دۇرىس تاڭداۋ جاساۋىنا كەڭ تۇسىنىك بەرە وتىرىپ, كوپ سالالى وقۋ ورىندارىمەن ونلاين-وفلاين كەزدەسۋ باستى ماقساتىمىزدىڭ ءبىرى. جالپى ايتقاندا, مەكتەبىمىزدە اتا-انالار مەن وقۋشىلارعا زاماناۋي جاڭا ماماندىقتارمەن تانىستىرىپ, كەڭىنەن اقپاراتتاندىرۋ جۇمىستارى, اشىق ساباقتار, ماماندارمەن كەزدەسۋلەر جانە دوڭگەلەك ۇستەلدەر ءجيى ءوتىپ جاتادى», دەدى ب.بەكتاس.
ب.ايدارحانقىزى كەلەشەكتە جۇمىسشى بولاتىن بالالاردى انىقتاۋ ماسەلەسىنە دە توقتالدى.
«جالپى قاراپايىم جۇمىسشى بولاتىن بالالاردى اتا-انالارىنا اۋىل شارۋاشىلىعىنداعى ءتۇرلى ەڭبەك داعدىسىن يكەمدى يگەرۋى تۇرعىسىندا جانە وقۋشىلاردىڭ ءبىلىم, بىلىك, بەيىن داعدىسى بويىنشا الەۋمەتتىك ساۋالناما سۇراقتارىنا جاۋاپتارى ارقىلى انىقتاپ وتىرمىز», دەيدى باقتىگۇل بەكتاس.
قازاقستاندا پروفوريەنتاتسيا سالاسى دامىپ كەلە جاتىر. كەلەشەكتە كوللەدجدەر مەن جوو-لاردا كاسىبي باعىت-باعدار بەرۋ ارنايى ماماندىق رەتىندە وقىتىلسا, قوعام ودان ءارى وركەندەيتىنى ءسوزسىز.
