بايقاۋ قارساڭىندا «بۇلكىلدەر انگە سالسا كومەيى...» اتتى كىتاپتىڭ تۇساۋكەسەر ءراسىمى جاسالدى. ەلدىڭ تۇكپىر-تۇكپىرىنەن كەلگەن 30-عا جۋىق ونەرپاز ءداستۇرلى ءان جانرىندا باق سىنادى. وعان رامازان ستامعازيەۆ, تولعانباي سەمباەۆ, ەربول ايتباەۆ, ەركىن شۇكىمان, ەرلان رىسقالي, مەدىعات ماناپوۆ سىندى ەلىمىزگە بەلگىلى ونەر مايتالماندارى قازىلىق جاسادى.
ءان ونەرىنىڭ مايتالمانى مادەنيەت ەشەكەەۆ 1934 جىلى بۇرىنعى سەمەي وبلىسى بورودۋليحا اۋدانى قۇرمانقوجا اۋىلىندا دۇنيەگە كەلگەن. اۋەلى اعاسى جۇقابايدان ءتالىم الىپ, ايگىلى جۇسىپبەك ەلەبەكوۆ, ماناربەك ەرجانوۆ سەكىلدى انشىلەردى تىڭداپ وسەدى.
«2017 جىلى قۇرمانعازى اتىنداعى قازاق ۇلتتىق كونسەرۆاتورياسىندا م.ەشەكەەۆكە ارناپ رەسپۋبليكالىق كونفەرەنتسيا, ۇلكەن گالا-كونتسەرت ۇيىمداستىرىلىپ, دومبىراسى ىقىلاس دۇكەن ۇلى اتىنداعى حالىق اسپاپتار مۋزەيىنە قويىلدى. «سۇرجەكەي» اتتى ءان جيناعى قۇراستىرىلدى. بيىل وسى جيناقتى ۇستازىمىزدىڭ 90 جىلدىعى قارساڭىندا شاكىرتى تولعانباي سەمباەۆ ەكەۋمىز ءانشىنىڭ ورىنداۋىنداعى كەيىننەن ەل ىشىنەن تابىلعان اندەرىن جانە ول تۋرالى ماقالا, سۇحباتتاردى تولىقتىرىپ, «بۇلكىلدەر انگە سالسا كومەيى...» دەگەن اتپەن قايتا جارىققا شىعاردىق», دەيدى شاكىرتى, ءانشى ەركىن شۇكىمان.
مادەنيەت ەشەكەەۆ – ايگىلى ج.ەلەبەكوۆتىڭ العاشقى شاكىرتتەرىنىڭ ءبىرى. ونىڭ رەپەرتۋارىنان قازاق حالىق اندەرىمەن بىرگە ءبىرجان سال, اقان سەرى, اباي, جاياۋ مۇسا, بالۋان شولاق, ت.ب. حالىق كومپوزيتورلارىنىڭ اندەرى كەڭ ورىن الدى. اسىرەسە ەشەكەەۆتىڭ وزىنە عانا ءتان انشىلىك مانەرىن ايقىن تانىتاتىن, ونىڭ ەرەكشە ناقىش-بوياۋمەن ورىندايتىن اباي مەن اسەتتىڭ اندەرى, بالۋان شولاقتىڭ «عالياسى», ر.ەلەباەۆتىڭ «جاس قازاعى», س.كارىمباەۆتىڭ «اق ەركەسى» جانە حالىق اندەرى «سۇرجەكەي», «اققۇم» جاتادى. ورىنداۋىنداعى تۋىندىلار قازاق راديوسىنىڭ التىن قورىندا ساقتالعان.
«سۇلتانماحمۇت تورايعىروۆتىڭ ء«بىر حالىقتىڭ ءانى كەتسە, ادەبيەتى جەسىر قالادى, ءسانى كەتەدى, ءسانى كەتسە جانى كەتەدى. قازاقتى جانسىز اعاش قىلىپ وتقا جاققىلارىڭ كەلمەسە, ءاندى ساقتاۋدىڭ قامىن قىلىڭدار» دەگەن ءسوزى بار. سوندىقتان مۇنداي بايقاۋلار كەرەك. ءولىسى دە, ءتىرىسى دە دارىپتەلۋگە ءتيىس. مادەنيەت ەشەكەەۆ – قازاق ءان ونەرىن قىزعىشتاي قورىپ, كوزىنىڭ قاراشىعىنداي قورعاعان ءانشى. حالقىمىزدىڭ ءداستۇرلى مۋزىكاسىن جوعارى دەڭگەيگە كوتەرگەن ونەرپاز. وسى رەتتە ءانشىنىڭ ەسىمىن ەسكە الىپ, ناسيحاتتالۋى – ەلدىكتىڭ بەلگىسى. بايقاۋ جوعارى دەڭگەيدە ءوتتى. ەندى توقتاپ قالماي, ءارى قاراي جالعاسا بەرگەنىن تىلەيمىز», دەيدى ءانشى ەربول ايتباەۆ.
بيىل العاش رەت وتكىزىلگەن بايقاۋدىڭ باس جۇلدەسىن استانالىق ايدوس سانيازبەك ۇلى يەلەنىپ, جەڭىمپاز اتاندى. ءى ورىن – تاڭات مۇقاشەۆ (اباي وبلىسى), ءىى ورىن – ايدا يسرايل (الماتى وبلىسى) جانە ساۋلەت امانعازين (اباي وبلىسى), ءىىى ورىن – ومىرزاق شەشحان (كوكشەتاۋ قالاسى), ۇلجان ابىلقاسىموۆا (الماتى قالاسى), ماديار ومىرعالى (قاراعاندى وبلىسى). الماعامبەت قاپسالام ۇلى اتىنداعى ارنايى جۇلدەنى – ايدان باۋىرجانوۆ (اباي وبلىسى), اقىلباي اباي ۇلى اتىنداعى ارنايى جۇلدەنى – ماعجان ىسقاق (پاۆلودار وبلىسى), بورودۋليحا اۋدانى اكىمىنىڭ ارنايى جۇلدەسىن – ابدۇرراحمەن ەستاي ۇلى (الماتى قالاسى) يەلەندى. ال كامشات قابىكەنوۆا (الماتى وبلىسى), دامير راحىمبەرديەۆ (تاراز قالاسى), رۇستەم ءجۇسىپوۆ (استانا قالاسى), قۋاندىق توكەنوۆ (قاراعاندى وبلىسى), جالىن قۇنانباي (پاۆلودار قالاسى) ديپلومانت اتاندى. بايقاۋ جەڭىمپازدارىنىڭ بارلىعى قوماقتى قارجىلاي سىيلىقتارمەن ماراپاتتالدى.
بايقاۋدى ۇيىمداستىرعان اباي وبلىستىق مادەنيەت, تىلدەردى دامىتۋ جانە ارحيۆ ءىسى باسقارماسىنىڭ باسشىسى جانجىگىت ومارحان قازىلار مەن قاتىسۋشىلارعا العىس ءبىلدىردى. كەش سوڭىندا بايقاۋعا قازىلىق جاساعان ەلىمىزگە بەلگىلى انشىلەر مادەنيەت تويىنا اننەن شاشۋ شاشتى.
ء«اربىر قاتىسۋشى ءوز ونەرىن ۇلكەن دايىندىقپەن, جان-تانىمەن كورسەتە ءبىلدى. ونەرپازداردىڭ دەڭگەيى وتە جوعارى, ءبىر-بىرىنەن قالىسپايدى. سول سەبەپتى ولاردىڭ ونەرىن باعالاۋ, شىن مىقتىنى انىقتاۋ وڭايعا سوقپادى. دەگەنمەن «كىل جۇيرىكتە كىم جۇيرىك؟» دەمەكشى, دارا شىققان تالانتتار انىقتالدى. بايقاۋدىڭ ۇيىمداستىرىلۋ دەڭگەيى بارلىق جاعىنان جوعارى بولدى», دەيدى قازىلار القاسىنىڭ مۇشەسى, ءانشى ەرلان رىسقالي.
اباي وبلىسى
