اۋە كومپانيالارى وتباسى مۇشەلەرىنىڭ جۇگىن بىرىكتىرۋى قاجەت - دەپۋتات

ماسەلەن, ءبىر وتباسىنان 4 ادام ءار قايسىسىنا 23 كەلىگە دەيىن جۇك الۋعا رۇقسات ەتىلەتىن بيلەتتى ساتىپ الادى. ءىس جۇزىندە ولار 30 كەلىلىك ەكى چەموداندى تاپسىرادى. اۋە كومپانيالارى وسى تۇستا چەمودان سالماعىنىڭ بەلگىلەنگەن نورمادان اسىپ كەتكەنىن ايتىپ, 40 مىڭ تەڭگە قوسىمشا اقى تالاپ ەتەدى. بۇل ۇشۋ قۇنىن تاعى دا 15-20 پايىزعا قىمباتتاتىپ جىبەرەدى. فراكتسيا ساۋالىن جولداعان دەپۋتات نيكولاي ارسيۋتين مۇنداي جاعدايدا وتباسىعا تيەسىلى جالپى جۇكتى بىرىكتىرۋدى, وعان قوسىمشا قارجى الماۋ تەتىگىن قاراۋدى ۇسىندى. 

دەپۋتات قر باس كولىك پروكۋراتۋراسى بىرگە ساياحاتتايتىن وتباسى مۇشەلەرىنىڭ جول جۇگىن بىرىكتىرۋ نورماسىنا تىيىم سالماعانمەن, اۋە كومپانيالارى بۇل نورمانى  ەسكەرمەي وتىرعانىن اتاپ ءوتتى. سونداي-اق, ەو ەلدەرىندەگى جولاۋشىلاردىڭ قۇقىن قورعاۋ بويىنشا ديرەكتيۆالار جولاۋشىلاردىڭ جۇگىن بىرىكتىرۋدە ولار ءۇشىن قولايلى جاعداي جاسايتىنىن قاپەرگە سالدى. 

وسىعان بايلانىستى دەپۋتات پرەمەر-ءمينيستردىڭ ءبىرىنشى ورىنباسارى ر.سكليار اتىنا بىرنەشە ۇسىنىس جولداپ, قايتا قاراۋدى سۇرادى.  

ء«بىرىنشى – نورماتيۆتىك قۇقىقتىق اكتىلەردە (ونىڭ ىشىندە جولاۋشىلار مەن باگاجدى تاسىمالداۋ قاعيدالارىندا) جولاۋشىلاردىڭ, ەگەر ولار ءبىر بيلەتپەن جۇرەتىن بولسا, باگاج نورمالارىن ءوزارا بىرىكتىرۋ قۇقىعىن بەلگىلەۋ. بۇل تاجىريبە ىشكى جانە حالىقارالىق رەيستەردى ورىندايتىن بارلىق اۆياكومپانيالار ءۇشىن مىندەتتى بولۋى كەرەك;
ەكىنشىسى – وسى تالاپتاردى ورىنداماۋ, اۋە كومپانيالارى تاراپىنان تەرىس پايدالانۋ جانە جوسىقسىز ارەكەتتەر ءۇشىن جاۋاپكەرشىلىك (سانكتسيالار) ەنگىزۋ ارقىلى وسى ستاندارتتاردى ورىنداۋعا باقىلاۋ ورناتۋ;
ۇشىنشىدەن, تاسىمالداۋ ەرەجەلەرىنە اۆياكومپانيالارعا بيلەتتەردى برونداۋ كەزىندە جولاۋشىلارعا باگاجدى بىرىكتىرۋ مۇمكىندىگى تۋرالى اقپارات بەرۋدى تالاپ ەتەتىن ەرەجەنى ەنگىزۋ. اۋە تاسىمالداۋشىلارى بيلەتتەردى ساتىپ الۋ ساتىسىندا, سونداي-اق تىركەۋ كاسسالارىندا جانە رەسمي سايتىندا كليەنتتەردى باگاجدى بىرىكتىرۋ قۇقىعى تۋرالى حاباردار ەتۋگە مىندەتتەۋ;
تورتىنشىدەن, بىرقاتار ەلدە, سونىڭ ىشىندە ەۋروپالىق وداق پەن اقش-تا باسەكەگە قابىلەتتىلىك دەڭگەيىن جانە جولاۋشىلاردىڭ سۇرانىسىن ورىنداۋ دەڭگەيىن ارتتىرۋعا مۇمكىندىك بەرەتىن مۇنداي تاجىريبەلەر ءساتتى ەنگىزىلگەنىن ەسكەرە وتىرىپ, حالىقارالىق تاجىريبە مەن زاڭنامانى باعالاۋ كەرەك», دەدى ن. ارسيۋتين.

ول ساۋالىنىڭ سوڭىندا مۇنداي شارالار ازاماتتار ءۇشىن باگاجدى تاسىمالداۋ جاعدايلارىن جاقسارتۋعا, ولاردىڭ قۇقىعىن قورعاۋعا, ازاماتتاردىڭ قازاقستاندىق اۆياكومپانيالارعا سەنىم دەڭگەيىن ارتتىرۋعا جانە حالىقارالىق ستاندارتتارعا ساي ءادىل قىزمەت كورسەتۋ جۇيەسىن قۇرۋعا ىقپال ەتەتىنىنە سەنىم ءبىلدىردى.