ءتورتىنشى رەت ۇيىمداستىرىلعان ءداستۇرلى بايقاۋعا قاتىسۋعا اۋەلى 45 ۇمىتكەردەن ءوتىنىش ءتۇسىپتى. ونلاين ىرىكتەۋ سىنىن ءجىتى قاداعالاعان قازىلار القاسى 45 ءانشىنىڭ ىشىنەن 18-35 جاس ارالىعىنداعى 20 مىقتى ونەرپازدى تاڭداپ الىپ, فينالدىق كەزەڭگە وتكىزدى. حالىقارالىق ونەر الامانىنا قاتىسقان ونەرپازدار التىنبەك قورازباەۆتىڭ حيتكە اينالعان تۋىندىلارىن ناشىنە كەلتىرە شىرقادى.
ەرەجەگە سايكەس ەكى كەزەڭدى قامتىعان بايقاۋدا قاتىسۋشىلار اۋەلى كومپوزيتوردىڭ ەكى ءانىن ورىنداسا, كەيىننەن ەركىن تاقىرىپتا ءان شىرقاپ, وزدەرىنىڭ ۆوكالدىق الەۋەتىن كورسەتتى. توقتار سەرىكوۆ, مەيرامبەك بەسپاەۆ باستاعان قازىلار القاسىنىڭ ايتۋىنشا, انشىلەر بايقاۋعا ۇلكەن دايىندىقپەن كەلگەن.
حالىقارالىق بايقاۋ قورىتىندىسىندا الماتى وبلىسىنان كەلگەن مەدەت ورىنباەۆ باس جۇلدە يەگەرى اتانىپ, 1 ميلليون تەڭگەنىڭ سەرتيفيكاتىنا يە بولدى. قىتاي حالىق رەسپۋبليكاسىنان كەلگەن قانداسىمىز ۇلبوسىن كەنجابايقىزىنىڭ تالانتى تالايعا تاڭداي قاقتىردى. وزىندىك ۇنىمەن كورەرمەندەردى ءتانتى ەتكەن ۇلبوسىنعا 1-جۇلدە (800 مىڭ تەڭگە) بۇيىردى. اتىراۋلىق ءانشى مەرجان قابدولوۆ جۇلدەلى ەكىنشى, تۇركىستاندىق اسىل جومارتوۆ پەن ەلوردالىق اقبوپە الىبەكوۆا ءۇشىنشى ورىنعا لايىق دەپ تانىلدى.
ونەر دوداسىندا وزىندىك شەبەرلىگىمەن كوزگە تۇسكەن بىرنەشە قاتىسۋشىعا ىنتالاندىرۋ سىيلىعى (200 مىڭ تەڭگە), جۇلدەدەن تىس قالعان تالانتتارعا ارنايى العىسحاتتار (100 مىڭ تەڭگە) تابىستالدى. ءبىر سوزبەن ايتقاندا, حالىقارالىق بايقاۋ كوپتىڭ كوڭىلىنەن شىقتى.
تاراز
