نەمىس تىلىنە تىكەلەي اۋدارىلىپ, Steppe & World باسپاسىنان شىققان وسىمدىكتەر مەن گۇلدەر تۋرالى قوس ءتىلدى كىتاپ Goethe-Institut-تىڭ «تىرشىلىك بۇرشىكتەرى» (Lebenssprossen) جوباسىنىڭ قولداۋىنا يە بولعان.
ورايى كەلىپ تۇرعان بەلگىلى كاسىپكەر بۇعان دەيىن دە الماتى وبلىسى كەربۇلاق اۋدانىنىڭ باسشي اۋىلىندا ەلىمىزدەگى العاشقى تاقىرىپتىق «اباي باعىن» وتىرعىزىپ قانا قويماي, ءوز دەمەۋشىلىگىمەن تۋعان جەرىندە 2 گەكتار جەرگە قاراعايلى باق, 7 گەكتارعا كوكتەرەك ورمانى, حالىق ءارتىسى نۇرعالي ءنۇسىپجانوۆتىڭ قۇرمەتىنە 5 گەكتار الما باعى, 10 گەكتاردا «باتىر انالار» ساياباعىن وتىرعىزىپ, جايقالتقانىن ەسكە سالا كەتۋگە بولادى. وسى كىسىنىڭ ارقاسىندا اۋىلىنىڭ مەكتەپتەرى دە بوتانيكالىق باققا اينالدى.
تۋعان ولكەسىنىڭ جاس-كارىسىن قۋانتىپ, جەلدىڭ وتىندەگى اۋىلىنا سايا بولعان, كەيىنگى ءوسىپ كەلە جاتقان بۋىن ۇلگى تۇتارلىق ءتالىمدى ءىستى قاراپايىم عانا قازاقاتىڭ قىزى, كاسىپكەر ءوز قاجىر-قايراتىمەن, ءوز قاراجاتىمەن جوبالارىن جۇزەگە اسىرىپ كەلە جاتقان «Gulstan-dala» قوعامدىق قورىنىڭ جەتەكشىسى گوزەل قۇلجاباەۆا قازىرگى تاڭدا كوگالداندىرۋ, ەكوتۋريزم جوبالارىمەن اينالاسىپ ءجۇر.
ال گيوتە ينستيتۋتىنىڭ وكىلدەرى, كىتاپ اۆتورى مەن اۋدارماشىلار – انيا تۋككەرمان, رايحان شالعىنباەۆا قاتىسقان كىتاپتىڭ تۇساۋكەسەرى دە ەرەكشە اسەرلى, قىزىقتى ءوتتى. سالتاناتتى وقيعانىڭ ءسانىن كەلتىرگەن بالالار ەكى تىلدە كىتاپتان ۇزىندىلەر وقىپ, رۋحاني ەستەلىك بولاتىن سىيلىقتارعا يە بولدى. باعداگۇل ەراليەۆا بەزەندىرگەن ەرەكشە كىتاپتان ۇلكەن دە, كىشى دە تابيعاتتاعى اسەم گۇلدەر تۋرالى قىزىقتى ءارى ماڭىزدى مالىمەت الىپ, كوركەم يلليۋستراتسيالار ارقىلى تانىم كوكجيەگىن كەڭەيتە الادى.
