سونىمەن 2025 جىلى 16-18 مامىر ارالىعىندا قىتاي مەملەكەتىندەگى FTC (FIRST Tech Challenge) جارىسى – 5-ءشى تساولۋ كۋبوگى: جاسوسپىرىمدەرگە ارنالعان روبوت جوبالاۋ جانە قۇراستىرۋدان ۇيىمداستىرىلعان چەمپيوناتىنا جەتىسۋ وبلىسىنداعى دارىندى بالالارعا ارنالعان جىلاندى مامانداندىرىلعان ليتسەي-ينتەرناتىنىڭ WATER7 كومانداسى Connect Award ماراپاتىن يەلەندى. بۇل – جاسوسپىرىمدەردىڭ شىعارماشىلىعى مەن تەحنيكالىق قابىلەتتەرىن الەمدىك دەڭگەيدە تانىتۋعا بەرىلگەن تاماشا مۇمكىندىك بولاتىن. بۇل – اۋىلدان شىققان جاس دارىنداردىڭ عىلىم مەن تەحنيكا الەمىندەگى زور جەتىستىگى.
ال وسى جەڭىستىڭ ارتىندا – اۋىل مەكتەبىنىڭ وقۋشىلارىن حالىقارالىق دەڭگەيگە كوتەرىپ جۇرگەن ەرەكشە مامان, روبوتوتەحنيكا جاتتىقتىرۋشىسى ايدوس ورداباەۆتى بولە-جارىپ اتاپ وتكەن ءجون. ءوز ماماندىعىنىڭ بىلگىرى ليتسەي-ينتەرناتىنا ارنايى شاقىرتۋمەن كەلىپ, ءبىر جىلدىڭ ىشىندە جىلاندى مەكتەبىندە روبوتوتەحنيكا باعىتىن جاڭا بەلەسكە كوتەردى. ناتيجەسىندە وقۋشىلار رەسپۋبليكالىق جانە حالىقارالىق دەڭگەيدە توپ جارىپ كەلەدى.
ءبىلىم ورداسىنىڭ جىلاندى مەكتەبىندە روبوتوتەحنيكا زەرتحاناسىنىڭ اشىلۋىنا دەمەۋشىلىك كورسەتىپ, اۋىل بالالارىنا ۇلكەن مۇمكىندىك سىيلاعان مەتسەنات, وسى اۋىل تۋماسى باۋىرجان كەڭەسبەك ۇلىنا دەگەن العىستارى شەكسىز.
سول سياقتى دارىندى وقۋشىلاردىڭ حالىقارالىق جارىستا باق سىناۋىنا جەتىسۋ وبلىسىنىڭ اكىمدىگى مەن جەتىسۋ وبلىستىق ءبىلىم باسقارماسى دا يگى ىقپال ەتىپ وتىر.
مۇنداي دەمەۋ مەن قولداۋ قابىلەتتى بالالاردىڭ جاڭا جەتىستىكتەرگە جەتۋىنە ۇلكەن سەرپىن بەرىپ وتىر.
حالىقارالىق جارىستا WATER7 كومانداسى قۇرامىنداعى 11 وقۋشى مەن 2 جەتەكشى جارىس الاڭىندا قازاقتىڭ قارا دومبىراسىمەن كۇي ورىنداپ, كوك بايراقتى جەلبىرەتتى.
