فوتو: mugalzhar.kz
ەرتىس-بايان وڭىرىندە 11 مىڭعا جۋىق ادام سوزىلمالى جۇرەك جەتىسپەۋشىلىگى دياگنوزىمەن ديسپانسەرلىك ەسەپكە الىنعان. مامانداردىڭ سوزىنشە, جۇرەك جەتىسپەۋشىلىگى كوبىنە ۇزاق ۋاقىت ەسكەرۋسىز قالعان گيپەرتونيا مەن ينفاركتتىڭ, سونداي-اق قانت ديابەتىنىڭ سالدارىنان تۋىندايدى. ال الدىن الۋدىڭ ەڭ ءتيىمدى جولى – دەر كەزىندە جۇرەك ساۋلىعىن تەكسەرۋ. وڭىردە سوزىلمالى اۋرۋلار كەشەنى بويىنشا مەديتسينالىق كومەكتى جەتىلدىرۋ جونىندەگى جول كارتاسى ازىرلەندى. ونىڭ اياسىندا ارنايى كابينەتتەر اشىلعان.
- سوزىلمالى جۇرەك جەتىسپەۋشىلىگى – جۇرەك اۋرۋىنىڭ اسقىنعان ساتىسى. ياعني, جۇرەك اعزاعا قاجەتتى قان مەن وتتەگىنى تولىق كولەمدە جەتكىزە المايدى. سونىڭ سالدارىنان تىندەر مەن مۇشەلەرگە قورەكتىك زاتتار جەتىسپەي, بۇكىل اعزادا گيپوكسيا داميدى. ناۋقاستار بۇل دەرتتىڭ بەلگىلەرىن بىردەن بايقاي بەرمەيدى. كوپ جاعدايدا دارىگەرگە كەش جۇگىنەدى. اۋرۋدىڭ نەگىزگى بەلگىلەرى – ەنتىگۋ, جۇرەك ىرعاعىنىڭ بۇزىلۋى, اياق-قولداردىڭ ءىسىنۋى, مويىن كوكتامىرلارى كەڭەيىپ, السىزدىك پەن تەز شارشاعىشتىقتىڭ پايدا بولۋى, دەيدى كارديولوگ-دارىگەر ايگەرىم راحيموۆا.
دارىگەرلەر جۇرەك-قانتامىر جۇيەسىنىڭ اۋرۋلارى بۇگىندە جاسارعانىن ايتادى. بۇرىن مۇنداي دياگنوز 50 جاستان اسقان ادامدارعا ءجيى قويىلسا, قازىر 30 جاستاعى, ءتىپتى ودان دا جاس ناۋقاستار ءجيى تىركەلەدى.
پاۆلودار وبلىسى
